ພະແນກແຮງງານ ແລະ ສະຫວັດດີການນະຄອນຫລວງ ມອບເຄື່ອງຊ່ວຍເຫລືອໃຫ້ຜູ້ປະສົບເຄາະຮ້າຍຈາກໄຟ​ໄໝ້ ຢູ່ບ້ານດົງປ່າລານທົ່ງ

     ພິທີມອບ-ຮັບເຄື່ອງຊ່ວຍເຫລືອດັ່ງກ່າວ, ໄດ້ຈັດໃຫ້ມີຂຶ້ນໃນວັນທີ 5 ກຸມພານີ້, ຢູ່ຫ້ອງການປົກຄອງ ບ້ານດົງປ່າລານທົ່ງ, ເມືອງສີສັດຕະນາກ ນະຄອນຫລວງວຽງ ຈັນ, ລະຫວ່າງທ່ານ ແນນທອງ ລືໄມສອນ ຮອງຫົວໜ້າພະແນກແຮງງານ ແລະ ສະ ຫວັດດີການສັງຄົມ ນະຄອນຫລວງ ແລະ ທ່ານ ອາລຸນໄຊ ສີວິໄລ ນາຍບ້ານດົງປ່າ ລານທົ່ງພ້ອມດ້ວຍຜູ້ຕາງໜ້າຄອບຄົວຜູ້ປະ ສົບເຄາະຮ້າຍຈາກໄຟ​ໄໝ້ ເມື່ອຄືນ ວັນ ທີ 2 ກຸມພາຜ່ານມານີ້.

     ເຄື່ອງທີ່ນຳມາມອບໃນຄັ້ງນີ້ ປະກອບມີ: ສາດປູນອນ ຈຳນວນ 30 ຜືນ, ມຸ້ງ 30 ດາງ, ໝອນ  60 ໜ່ວຍ, ຜ້າຫົ່ມ 30 ຜືນ, ໝີ່ແຫ້ງ  5 ແກັດ, ປ໋ອງປາ 5 ແກັດ ແລະ ນ້ຳດື່ມ  60 ແກັດ ລວມມູນຄ່າຫລາຍກວ່າ 12 ລ້ານກີບ.

     ທ່ານ ອາລຸນໄຊ ສີວິໄລ ນາຍບ້ານ ບ້ານດົງປ່າລານທົ່ງ ກ່າວວ່າ: ປັດຈຸບັນທາງບ້ານຂອງຕົນກໍໄດ້ ລະດົມຂົນຂວຍການ ຊ່ວຍເຫລືອຈາກພາກສ່ວນຕ່າງໆໃຫ້ແກ່ຄອບຄົວຜູ້ທີ່ໄດ້ປະສົບເຄາະຮ້າຍດັ່ງກ່າວໄດ້ບັນເທົາທຸກຊົ່ວຄາວ. ນອກຈາກນີ້ ທ່ານ ຍັງຮຽກຮ້ອງມາຍັງພາກສ່ວນຕ່າງໆທີ່ມີຈິດໃຈສັດທາຊ່ວຍເຫລືອຜູ້ປະສົບເຄາະຮ້າຍດັ່ງກ່າວແມ່ນສາມາດພົວພັນໄປຫ້ອງການບ້ານດົງປ່າລານທົ່ງໂດຍກົງ ຫລື ຈະຕິດຕໍ່ໄປທີ່ເບີໂທ 020 5561 6744, 020 9771 2698 ໄດ້ທຸກເວລາ.