ໃນໂອກາດເຂົ້າຮ່ວມກອງປະຊຸມໃຫຍ່ຄັ້ງທີ V ອົງຄະນະພັກກະຊວງກະສິກຳ ແລະປ່າໄມ້ທີ່ຈັດຂຶ້ນໃນວັນທີ 2-3 ກໍລະກົດນີ້, ທ່ານ ສົມສະຫວາດ ເລັ່ງສະຫວັດ ກຳມະການກົມການເມືອງສູນກາງພັກຮອງນາຍົກລັດຖະມົນຕີທ່ານໄດ້ໃຫ້ກຽດໂອ້ລົມຄະນະຜູ້ແທນກອງປະຊຸມດັ່ງກ່າວ,
ໂດຍໄດ້ສະແດງຄວາມຍ້ອງຍໍຊົມເຊີຍຕໍ່ການຊີ້ນຳນຳພາຂອງຄະນະພັກຊຸດເກົ່າທີ່ສາມາດຍາດໄດ້ຜົນສຳເລັດຫລາຍດ້ານ, ພິເສດແມ່ນການຊຸກຍູ້ການຜະລິດເຂົ້າບັນລຸ 4 ລ້ານໂຕນຕໍ່ປີ, ຜະລິດຊີ້ນ, ປາ ແລະສະບຽງອາຫານຕ່າງໆໄດ້ພຽງພໍກັບຄວາມຕ້ອງການ ເຮັດໃຫ້ສິນຄ້າກະສິກຳມີຄວາມກ້າວໜ້າ, ພ້ອມນັ້ນກໍໄດ້ສະເໜີໃຫ້ຄະນະພັກຊຸດໃໝ່ເອົາໃຈໃສ່ປຸບປຸງບັນດາຂໍ້ຄົງຄ້າງຕ່າງໆ, ຕາມໜ້າທີ່ການເມືອງ ແລະຄວາມຮັບຜິດຊອບຂອງຕົນ, ເພື່ອກຽມຮອງຮັບການເຊື່ອມໂຍງກັບສາກົນ ແລະພາກພື້ນຢ່າງເປັນເຈົ້າການ, ປະກອບສ່ວນສຳຄັນເຂົ້າໃນການພັດທະນາປະເທດຊາດໃຫ້ຫລຸດພົ້ນອອກຈາກສະຖານະພາບດ້ອຍພັດທະນາ, ໂດຍສະເພາະແມ່ນຕ້ອງເອົາໃສ່ບັນຫາທີ່ສຳຄັນໃນການພັດທະນາກະສິດກຳໃນໄລຍະໃໝ່ຄື: ເອົາໃຈໃສ່ການຜະລິດເພື່ອ
ຄ້ຳປະກັນສະບຽງອາຫານໃນສະພາບການປ່ຽນແປງຂອງດິນຟ້າອາກາດ, ສ້າງພື້ນຖານວັດຖຸເຕັກນິກໃຫ້ຮັບປະກັນຄວາມຍືນຍົງ, ວາງແຜນພັດທະນາບຸກຄະລາກອນໃຫ້ເໝາະສົມໃນທົ່ວຂະແໜງການ, ໂດຍສະເພາະການປັບປຸງກົນຈັກຕາມທິດທາງ 3 ສ້າງ ແລະຄະນະພັກຊຸດໃໝ່ຕ້ອງເປັນແບບຢ່າງທີ່ດີຮອບດ້ານ, ສືບຕໍ່ຊີ້ນຳນຳພາຈັດຕັ້ງປະຕິບັດທິດຂອງກອງປະຊຸມໃຫຍ່ຄັ້ງທີ 5 ຂອງອົງຄະນະພັກກະຊວງກະສິກຳ ແລະປ່າໄມ້ກໍຄືແຜນການພັດທະນາກະສິກຳ ແລະປ່າໄມ້ ໃນໄລຍະໃໝ່ີໃຫ້ໄດ້ຮັບຜົນສຳເລັດຕາມຄາດໝາຍທີ່ວາງໄວ້.
ຮອງນາຍົກ ກ່າວວ່າ: ເພື່ອນຳພາປະເທດຊາດອອກຈາກສະຖານະພາບດ້ອຍພັດທະນາໃນປີ 2020 ມັນຈຳເປັນຢ່າງຍິ່ງທີ່ຄະນະພັກກະຊວງກະສິກຳຈະຕ້ອງກຳແໜ້ນພາລະບົດບາດ ແລະໜ້າທີ່ຂອງຕົນ, ເນື່ອງຈາກວ່າ 80% ຂອງພົນລະເມືອງລາວໃນປັດຈຸບັນແມ່ນກະສິກອນ
ແລະວຽກງານກະສິກຳກໍມີສ່ີວນສຳຄັນໃນອົງປະກອບເສດຖະກິດແຫ່ງຊາດ, ດັ່ງນັ້ນມັນມີຄວາມຈຳເປັນຢ່າງຍິ່ງທີ່ຈະຕ້ອງໄດ້ຮູ້ວ່າ: ໜ້າທີ່ການເມືອງຂອງກະຊວງກະສິກຳແມ່ນຫຍັງ ແລະ ເຮັດແນວໃດການຜະລິດສະບຽບອາຫານຈຶ່ງຈະພຽງພໍ ແລະຍືນຍົງ ແລະສິ່ງສຳຄັນອີກຢ່າງແມ່ນການກຽມພ້ອມໃຫ້ແກ່ການເຊື່ອມໂຍງເສດຖະກິດກັບພາກພື້ນ ແລະສາກົນ ແລະການຮອງຮັບກັບສະພາບດິນຟ້າອາກາດມີການປ່ຽນແປງຢ່າງໃຫຍ່ຫລວງນັ້ນພວກເຮົາຕ້ອງເຮັດແນວໃດຈຶ່ງຈະຂ້າມຜ່ານໄປໄດ້ ແລະສາມາດນຳເອົາປະເທດຊາດອອກຈາກປະເທດດ້ອຍພັດທະນາໄດ້ໂດຍໄວ.
ໃນກອງປະຊຸມຄັ້ງນີ້ ໄດ້ເປັນເອກະສັນເລືອກເອົາສະຫາຍດຣ. ເພັດ ພົມພິພັກ ເປັນເລຂາຄະນະພັກ, ສະຫາຍ ທອງພັດວົງມະນີ ເປັນຮອງເລຂາພັກ, ສະຫາຍນາງປີ່ງຄຳລາຊະສີມາ ເປັນປະທານກວດກາ, ສະຫາຍຄຳພອນລາຊະຈັກ ເປັນຮອງປະທານກວດກາ ແລສະຫາຍຄຳພຸດພັນດານຸວົງ ເປັນຮອງປະທານກວດກາ.
No comments:
Post a Comment