ໂດຍຕອບສະໜອງຕາມຄໍາເຊີນຂອງທ່ານຮອງນາຍົກລັດຖະມົນຕີ, ລັດຖະມົນຕີວ່າການກະຊວງການຕ່າງປະເທດແຫ່ງ ສປປ
ລາວ ທອງລຸນ ສີສຸລິດ, ທ່ານລັດຖະມົນຕີວ່າການກະຊວງການຕ່າງປະເທດສະຫະລັດອາເມລິກາ ຈອນ
ເຄຣີ ພ້ອມຄະນະຈະເດີນທາງມາຢ້ຽມຢາມ ສປປ ລາວ ຢ່າງເປັນທາງການໃນລະຫວ່າງວັນທີ
24-25 ມັງກອນ 2016 ເພື່ອເສີມຂະຫຍາຍການພົວພັນຮ່ວມມືລະຫວ່າງ ສປປ ລາວ ແລະ ສະຫະລັດອາເມລິກາໃຫ້ແໜ້ນແຟ້ນຍິ່ງຂຶ້ນ.
ທ່ານ ຈອນ ເຄຣີ ເກີດເມື່ອວັນທີ 11 ທັນວາ 1943 ທີ່ລັດໂຄໂລລາໂດ(Colorado) ສະ ຫະລັດອາເມລິກາ, ຈົບການສຶກສາຈາກມະຫາວິທະຍາໄລເຢວ(Yale) ແລະ ຫລັງຈາກນັ້ນເຂົ້າຮັບໃຊ້ກອງທັບ, ເຄີຍເປັນທະຫານເຮືອໃນກອງທັບເຮືອສະຫະລັດອາເມລິກາ
ແລະ ເປັນຫົວໜ້າໜ່ວຍເຮືອລາດຕະເວນໄວຢູ່ເຂດສາມຫລ່ຽມແມ່ນໍ້າຂອງໃນການເຂົ້າຮ່ວມສົງຄາມຫວຽດນາມ, ພາຍຫລັງກັບຈາກສົງຄາມໄດ້ເຂົ້າຮ່ວມຂະບວນການຂັດຄ້ານການດໍາເນີນສົງຄາມຢູ່ຫວຽດນາມ.
ປີ 1976 ຮຽນຈົບພາກວິຊາກົດໝາຍຈາກວິທະຍາໄລ ບອດສະຕັນ(Boston), ຫລັງຈາກນັ້ນເຮັດວຽກເປັນໄອຍະການຢູ່ ມິດເດີນເຊັກ ຄັນທຼີ (Middlesex Country)ລັດແມັດຊາຊູເຊັດ (Massachusetts), ປີ
1982 ໄດ້ຮັບການເລືອກຕັ້ງເປັນຮອງຜູ້ວ່າການລັດແມັດຊາຊູເຊັດ ແລະ ອີກ 2 ປີຕໍ່ມາໄດ້ຮັບການເລືອກຕັ້ງເປັນສະມາຊິກສະພາສູງ, ປີ
2002 ເປັນປະທານກໍາມາທິການຕ່າງປະເທດຂອງສະພາສູງສະຫະລັດອາເມລິກາຮັບຜິດຊອບວຽກງານກ່ຽວກັບການທະຫານອາເມລິກາທີ່ຫາຍສາບສູນໃນປາງສົງຄາມ, ຮັບຜິດຊອບການພິຈາລະນາໃຫ້ສັດຕະຍາບັນກ່ຽວກັບສັນຍາສະບັບໃໝ່ວ່າດ້ວຍການຄວບຄຸມອາວຸດນິວເຄລຍລະຫວ່າງສະຫະລັດອາເມລິກາ
ແລະ ຣັດເຊຍ ແລະ ບັນຫາອື່ນໆ, ຊຶ່ງຕະຫລອດ 28 ປີທີ່ເຮັດວຽກຢູ່ສະພາສູງອາເມລິກາທ່ານເຄີຍເປັນປະທານອານຸກໍາມະການຕ່າງໆທີ່ມີບົດບາດສໍາຄັນ ແລະ ໃນປີ
2004 ທ່ານລົງສະໝັກຮັບເລືອກຕັ້ງເປັນປະທານາທິບໍດີສະຫະລັດອາເມລິກາໃນນາມຂອງພັກເດໂມແຄຼັດ ແລະ ໃນວັນທີ 1 ກຸມພາ 2013 ໄດ້ຮັບຕໍາແໜ່ງເປັນລັດຖະມົນຕີວ່າການກະຊວງການຕ່າງປະເທດສະຫະລັດອາເມລິກາຄົນທີ 68, ເຊິ່ງເປັນຄັ້ງທໍາອິດໃນຮອບສະຕະວັດທີ່ສະມາຊິກສະພາສູງ ແລະ ທັງເປັນປະທານກໍາມາທິການຕ່າງປະເທດໄດ້ດໍາລົງຕໍາແໜ່ງດັ່ງກ່າວຈົນເຖິງປັດຈຸບັນ.
No comments:
Post a Comment