“ສ້າງຄວາມເຂັ້ມແຂງພາຍໃນຊຸມຊົນທ້ອງຖິ່ນເພື່ອໃຫ້ເຂົາເຈົ້າເປັນຜູ້ນໍາໃນການປັບປຸງສະພາບການສໍາລັບຄອບຄົວຂອງເຂົາເຈົ້າເປັນຈຸດສຸມທີ່ສໍາຄັນຂອງໂຄງການໃຫມ່ຂອງພວກເຮົາ”ກ່າວໂດຍທ່ານ ໂຈນາທານ ສະໄຕເວີ້ສ,
ຮອງຜູ້ບໍລິຫານສຳລັບຂົງເຂດອາຊີ ຂອງ
ໂຄງການພັດທະນາສາກົນຂອງປະເທດສະຫະລັດອາເມລິກາ.
ນອກຈາກນັ້ນ, ເພິ່ນຍັງໄດ້ກ່າວອີກວ່າ:“ພວກເຮົາມີຄວາມຍິນດີທີ່ຈະສະໜັບສະໜູນຄວາມພະຍາຍາມເພື່ອໃຫ້ເດັກນ້ອຍໄດ້ມີສຸຂະພາບທີ່ດີ,
ມີໂອກາດໃນການຮ່ຳຮຽນ ແລະ
ເຂົ້າເຖິງສັກກະຍະພາບຂອງການເປັນຜູ້ໃຫຍ່ທີ່ມີປະສິດທິພາບ”.
ເຖິງແມ່ນວ່າຈະມີການຂະຫຍາຍຕົວທາງດ້ານເສດຖຸະກິດແລ້ວກໍ່ຕາມ, ສປປລາວມີການເສຍຊີວິດຂອງແມ່ແລະເດັກນ້ອຍລວມທັງການຂາດສານອາຫານໃນອັດຕາທີ່ສູງສຳລັບປະເທດໃນຂົງເຂດອາຊີຕາເວັນອອກສ່ຽງໃຕ້. ປະມານ 44% ຂອງເດັກນ້ອຍໃນສປປລາວແມ່ນມີພາວະຂາດສານອາຫານແລະ 27% ແມ່ນອັດຕາຂອງເດັກນ້ອຍທີ່ມີນ້ຳໜັກຕ່ຳກວ່າມາດຕະຖານ.
ໂຄງການດັ່ງກ່າວຈັດຕັ້ງປະຕິບັດໂດຍອົງກອນຊ່ວຍເຫລືອເດັກຮ່ວມກັບອົງການພັດທະນາຂອງປະເທດເນເທີແລນ
(SNV) ໄດ້ເຮັດວຽກຮ່ວມກັບຜູ້ປະສານງານກ່ຽວກັບດ້ານສາທາລະນະສຸກລະດັບຊຸມຊົນແລະບັນດາໝູ່ບ້ານເພື່ອຝຶກອົບຮົມການໃຫ້ອາຫານເດັກອ່ອນແລະເດັກນ້ອຍຮ່ວມກັບແມ່ມານແລະເດັກນ້ອຍອາຍຸຕ່ຳກວ່າ 2ປີ. ນອກຈາກນັ້ນ, ສະມາຊິກຂອງໂຄງການຍັງຊ່ວຍເຫລືອຊຸມຊົນໃນການປັບປຸງລະບົບສຸຂາພິບານອີກດ້ວຍ.
“ການລົງທຶນທາງດ້ານວຽກງານໂພຊະນາການກໍຄືການລົງທຶນເພື່ອການພັດທະນາທາງເສດຖະກິດ” ກ່າວໂດຍທ່ານນາງເບັດເພຈ, ຜູ້ອຳນວຍການຂອງອົງການພັດທະນາສາກົນຂອງປະເທດສະຫະລັດອາເມລິກາປະຈຳພາກພື້ນອາຊີ.
ການປະກາດໂຄງການໃໝ່ນີ້ເກີດຂຶ້ນໃນລະຫວ່າງການມາຢ້ຽມຢາມສປປລາວ ຄັ້ງທຳອິດຂອງທ່ານສະໄຕເວີ້ສ. ໃນໄລຍະການຢ້ຽມຢາມ, ເພິ່ນໄດ້ໄປເບິ່ງໝູ່ບ້ານຢູ່ແຂວງຫລວງພະບາງເພື່ອໄປເບິ່ງສະພາບກິດຈະກຳດ້ານສາທາລະນະສຸກແລະການສຶກສາ. ກ່ອນທີ່ຈະເດີນທາງກັບໃນວັນທີ 29 ມັງກອນ, ເພິ່ນໄດ້ເຂົ້າພົບທ່ານ ເອກສະຫວ່າງວົງວິຈິດ ລັດຖະມົນຕີກະຊວງສາທາລະນະສຸກ, ພ້ອມດ້ວຍເອກອັກຄະລັດຖະທູດແຫ່ງສະຫະລັດອາເມລິກາທ່ານແດນຽວເອຄລູນພ້ອມດ້ວຍທີມງານຜູ້ຊົງຄຸນນະວຸດທັງຝ່າຍລາວແລະສະຖານທູດອາເມລິກາ.
No comments:
Post a Comment