ຮຽກຮ້ອງໃຫ້ສັງຄົມຮີບຮ້ອນຊ່ວຍເຫລືອຜູ້ປະສົບໄພໜາວໃຫ້ທັນເວລາ

     ນັບແຕ່ວັນທີ 24 ມັງກອນນີ້ເປັນຕົ້ນມາ, ທົ່ວປະເທດເຮົາມີສະພາບອາກາດໜາວແຮງກວ່າປົກກະຕິ, ບາງເຂດອຸນຫະພູມຕ່ຳສຸດ -5 ອົງ ສາ, ພາໃຫ້ເກີດມີນ້ຳກ້າມ ແລະ ໝອກໜາວ, ບາງທ້ອງຖິ່ນມີຫິມະຕົກເປັນໄລຍະເປັນຕົ້ນຢູ່ບັນດາແຂວງພາກເໜືອຄື: ຜົ້ງສາລີ, ຫົວພັນ, ຊຽງຂວາງ, ໄຊສົມບູນ ແລະ ອື່ນໆ, ສົ່ງຜົນໃຫ້ມີສັດລ້ຽງປະເພດງົວ, ຄວາຍຂອງປະຊາຊົນລົ້ມຕາຍເປັນຈຳນວນຫລາຍ, ສ່ວນມີຄົນເສຍຊີວິດແມ່ນຍັງບໍ່ ທັນໄດ້ຮັບການລາຍງານ.

     ມາຮອດປັດຈຸບັນກະຊວງແຮງງານ ແລະ ສະຫວັດດີການສັງຄົມ ໄດ້ສົມທົບກັບພາກສ່ວນກ່ຽວ ຂ້ອງເພື່ອລົງໃຫ້ການຊ່ວຍເຫລືອດ້ານວັດຖຸ, ປັດ​ໄຈ ແລະ ສິ່ງຂອງໃນເບື້ອງຕົ້ນເຊັ່ນ: ເຄື່ອງນຸ່ງຫົ່ມ, ອາຫານ, ຢາປົວພະຍາດ ແລະ ສິ່ງຂອງທີ່ຈຳເປັນໃຫ້ແກ່ຄອບຄົວຜູ້ທຸກຍາກໃນເຂດຫ່າງໄກສອກ ຫລີກ, ພ້ອມນີ້ ທ່ານເຈົ້າແຂວງຫົວພັນໄດ້ມອບວຽກງານດັ່ງກ່າວ ໃຫ້ຫ້ອງວ່າການແຂວງເຮັດໜ້າທີ່ໂດຍກົງໃນການຮັບບໍລິຈາກວັດຖຸປັດ​ໄຈ ເພື່ອນຳໄປແຈກຢາຍໃຫ້ປະຊາຊົນ, ໃນນັ້ນ ປະກອບມີ: ບັນ ດາລັດວິສາຫະກິດ, ຫ້າງຮ້ານ, ອົງການຈັດຕັ້ງສາກົນ ແລະ ນັກທຸລະກິດຊາວຈີນ ທີ່ມາຄ້າຂາຍຢູ່ເມືອງຊຳເໜືອຈຳນວນໜຶ່ງໄດ້ຮ່ວມໃຈກັນນຳເອົາເຄື່ອງບໍລິຈາກເຊັ່ນ: ເຄື່ອງກັນໜາວ, ເຄື່ອງໃຊ້ທີ່ຈຳເປັນ, ຢາກັນພະຍາດຕ່າງໆ ແລະ ຜ້າຫົ່ມຈຳນວນ 300 ຜືນ ລວມູນຄ່າເກືອບ 20 ລ້ານກີບ ເພື່ອນຳໄປແຈກຢາຍໃຫ້ປະຊາຊົນຜູ້ທີ່ໄດ້ຮັບຜົນກະທົບ. ນອກນີ້ ແຂວງຫົວພັນ ຍັງໄດ້ຮຽກຮ້ອງໃຫ້ທຸກພາກສ່ວນໃນສັງຄົມກໍຄືສູນກາງໃຫ້ພ້ອມກັນລະດົມທຶນ ແລະ ບໍລິຈາກເຄື່ອງນຸ່ງຫົ່ມທີ່ຈຳເປັນສົ່ງຕໍ່ແຂວງຫົວພັນ ແລະ ແຂວງອື່ນໆທີ່ໄດ້ຮັບຜົນກະທົບໃຫ້ທ່ວງທັນເວລາ.