ໃນວັນທີ 11-15 ມັງກອນ 2016, ຄະນະບໍລິຫານງານສູນກາງພັກ ໄດ້ດຳເນີນກອງປະຊຸມຄົບຄະນະຄັ້ງທີ 12 ສະໄໝທີ
IX ເປັນນຄັ້ງສຸດທ້າຍ
ພາຍໃຕ້ການເປັນປະທານຂອງສະຫາຍ ຈູມມາລີ ໄຊຍະສອນ ເລຂາທິການໃຫຍ່ຄະນະບໍລິຫານງານສູນກາງພັກປະຊາຊົນປະຕິວັດລາວ.
ກອງປະຊຸມໄດ້ຟັງລາຍງານ, ປຶກສາຫາລືຕໍ່ບັນຫາເນື້ອໃນເອກະສານຕົ້ນຕໍທີ່ຈະສະເໜີຕໍ່ກອງປະຊຸມໃຫຍ່ຄັ້ງທີ X ຂອງພັກຢ່າງຕັ້ງໜ້າ, ມີຄວາມຮັບຜິດຊອບສູງ, ດ້ວຍບັນຍາກາດທີ່ດີ,
ມີລັກສະນະສ້າງສັນ, ກົງໄປກົງມາ ແລະ ເລິກເຊິ່ງ ທີ່ສ່ອງແສງໃຫ້ເຫັນເຖິງການຂະຫຍາຍຈິດໃຈກ້າເບິ່ງຄວາມຈິງ, ປະດິດສ້າງ, ກ້າສະເໜີຄວາມເຫັນຕໍ່ແຕ່ລະບັນຫາທີ່ຍົກຂຶ້ນໃນກອງປະຊຸມ ເຊິ່ງຜົນໄດ້ຮັບແມ່ນໄດ້ມີຄວາມເປັນເອກະພາບສູງຕໍ່ເນື້ອໃນຕ່າງໆຂອງຮ່າງລາຍງານການເມືອງ, ແຜນພັດທະນາເສດຖະກິດ-ສັງຄົມແຫ່ງຊາດ 5 ປີຄັ້ງທີ VIII, ຍຸດທະສາດຮອດປີ
2025, ວິໄສທັດຮອດປີ
2030, ຕໍ່ຮ່າງກົດລະບຽບຂອງພັກສະບັບປັບປຸງ ແລະ ຕໍ່ກັບບັນດາບົດປະກອບຄວາມເຫັນໃນກອງປະຊຸມໃຫຍ່ຄັ້ງທີ X ຂອງພັກ. ກອງປະຊຸມໄດ້ເປັນເອກະພາບວ່າ: ເອກະສານເຫລົ່ານີ້ພາຍຫລັງໄດ້ຮັບການປັບປຸງຕາມຄຳເຫັນຂອງກອງປະຊຸມຄັ້ງນີ້ແລ້ວ ແມ່ນເຫັນດີເປັນເອກະພາບໃຫ້ນຳສະເໜີລາຍງານຕໍ່ກອງປະຊຸມໃຫຍ່ຄັ້ງທີ X ຂອງພັກພິຈາລະນາຮັບຮອງເອົາ.
ກ່ຽວກັບການດຳເນີນຊີວິດການເມືອງ ສຳຫລວດການນຳພາລວມໝົດສະໄໝຂອງຄະນະບໍລິຫານງານສູນກາງພັກ ແລະ ຂອງບັນດາສະຫາຍກຳມະການສູນກາງພັກສະໄໝທີ
IX ນັ້ນ, ກອງປະຊຸມໄດ້ຢືນຢັນວ່າ: ໃນໄລຍະ 5 ປີຜ່ານມາ, ເຖິງວ່າສະພາບແວດລ້ອມສາກົນ ແລະ ພາກພື້ນໄດ້ມີການຜັນແປໄປຢ່າງສັບສົນ, ຢູ່ພາຍໃນປະເທດໄດ້ພົບກັບສິ່ງທ້າທາຍທົດສອບຫລາຍປະການ, ແຕ່ຄະນະບໍລິຫານງານສູນກາງພັກຂອງສະໄໝທີ
IX ໄດ້ເຊີດຊູຄວາມສາມາດການນຳພາ ແລະ ຄວາມຮັບຜິດຊອບການເມືອງ, ຄວາມເປັນແບບຢ່າງນຳໜ້າ ແລະ ປະດິດສ້າງໃນການຊີ້ນຳ-ນຳພາທົ່ວພັກ, ທົ່ວລັດ, ທົ່ວກຳລັງປະກອບອາວຸດ ແລະ ທົ່ວປວງຊົນ ສ້າງສາພັດທະນາປະເທດຊາດ ອັນໄດ້ເຮັດໃຫ້ປະເທດຊາດມີການຫັນປ່ຽນໃໝ່ໄປຕາມທິດທາງ ແລະ ຈຸດໝາຍທີ່ໄດ້ວາງໄວ້. ອັນສຳຄັນພື້ນຖານແມ່ນຄວາມເປັນເອກະລາດ, ອຳນາດອະທິປະໄຕ
ແລະ ຜືນແຜ່ນດິນອັນຄົບຖ້ວນຂອງປະເທດຊາດໄດ້ຮັບການປົກປັກຮັກສາໄວ້ຢ່າງໝັ້ນຄົງ, ລະບອບປະຊາທິປະໄຕປະຊາຊົນມີສະຖຽນລະພາບອັນໜັກແໜ້ນ, ສັງຄົມມີຄວາມສະຫງົບປອດໄພ ແລະ ເປັນລະບຽບຮຽບຮ້ອຍໂດຍພື້ນຖານ, ເສດຖະກິດຂະຫຍາຍຕົວດ້ວຍຈັງຫວະໄວ,
ຕໍ່ເນື່ອງ, ໝັ້ນທ່ຽງ ແລະ ຖືກທິດ.
ໄປພ້ອມໆກັນນັ້ນ, ກອງປະຊຸມຍັງໄດ້ຊີ້ໃຫ້ເຫັນວ່າ: ເຖິງວ່າການນຳພາໃນຜ່ານມາມີຜົນສຳເລັດອັນໃຫຍ່ຫລວງກໍຕາມ, ແຕ່ກໍຍັງມີດ້ານອ່ອນ, ບັນຫາຄົງຄ້າງຈຳນວນໜຶ່ງ ເປັນຕົ້ນການນຳພາຜັນຂະຫຍາຍແນວທາງໃຫ້ເປັນອັນລະອຽດບາງດ້ານຍັງມີຄວາມຊັກຊ້າເຊັ່ນ: ວຽກງານສາມສ້າງ, ການສົ່ງເສີມການຜະລິດເປັນສິນຄ້າ ແລະ ການພັດທະນາໃນເຂດຈຸດສຸມຕິດພັນກັບການຈັດສັນພູມລຳເນົາ, ຈັດສັນອາຊີບ ແລະ ການແກ້ໄຂຄວາມທຸກຍາກຂອງປະຊາຊົນຢູ່ຊົນນະບົດເຂດຫ່າງໄກສອກຫລີກ, ການແກ້ໄຂກົນໄກ ແລະ ລະບຽບການຕ່າງໆທີ່ກົດໜ່ວງຖ່ວງດຶງ ກໍຄືການແກ້ໄຂປາກົດການຫຍໍ້ທໍ້ຕ່າງໆໃນຖັນແຖວພະນັກງານ, ການແກ້ໄຂ ແລະ ຄຸ້ມຄອງບັນຫາໜີ້ສິນ, ປາກົດການຟຸມເຟືອຍ ແລະ ຮົ່ວໄຫລຂອງງົບປະມານ, ການລະເມີດວິໄນແຜນການ, ການເງິນ, ປາກົດການສວຍໂອກາດ, ລະເມີດລະບຽບການຕ່າງໆ ແລະ ຂາດຄວາມເປັນແບບຢ່າງນຳໜ້າຂອງສະຫາຍສູນກາງພັກຈຳນວນໜຶ່ງຍັງຖືກສັງຄົມ, ປະຊາຊົນ ແລະ ຂັ້ນລຸ່ມຈົ່ມວ່າ, ວິພາກວິຈານ ແລະ ມີຄວາມເປັນຫ່ວງເປັນໄຍຫລາຍສົມຄວນ.
ຕໍ່ກັບຜົນການສຳຫລວດກວດກາບຸກຄົນຂອງບັນດາສະຫາຍກຳມະການສູນກາງພັກໝົດສະໄໝທີ
IX ກອງປະຊຸມໄດ້ເປັນເອກະພາບສູງຕໍ່ການຕີລາຄາ, ສຳຫລວດກວດກາ, ຕຳນິຕິຊົມຕົນເອງ ແລະ ຕິຊົມເຊິ່ງກັນ ແລະ ກັນຂອງບັນດາສະຫາຍກຳມະການສູນກາງພັກຢ່າງພາວະວິໄສ,
ແທດກັບຕົວຈິງຕໍ່ຜົນສຳເລັດ ກໍຄືຈຸດອ່ອນ, ຂໍ້ຄົງຄ້າງບົກຜ່ອງຕ່າງໆທີ່ມີໃນໄລຍະຜ່ານມາ
ເຊິ່ງໄດ້ຊີ້ໃຫ້ເຫັນບັນຫາໃນແຕ່ລະດ້ານຢ່າງຈະແຈ້ງ ແລະ ເລິກເຊິ່ງສົມຄວນ ເປັນຕົ້ນບັນຫາດ້ານຄຸນທາດການເມືອງ ແລະ ຄວາມຮັບຜິດຊອບລວມຂອງໝູ່ຄະນະ ກໍຄືຂອງແຕ່ລະສະຫາຍ ເພື່ອມີທິດແກ້ໄຂໃຫ້ທັນການນັ້ນແມ່ນຍັງເຮັດບໍ່ທັນໄດ້ດີ.
ເຖິງຢ່າງໃດກໍດີ,
ກອງປະຊຸມໄດ້ຮັບຮອງເອົາບົດສຳຫລວດການນຳພາລວມຂອງຄະນະບໍລິຫານງານສູນກາງພັກສະໄໝທີ
IX ໂດຍມອບໃຫ້ສະຫາຍຜູ້ປະຈຳການຄະນະເລຂາທິການສູນກາງພັກຊີ້ນຳການປັບປຸງເອກະສານດັ່ງກ່າວໃຫ້ສາມາດນຳສະເໜີຕໍ່ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ X ຂອງພັກ.
ກອງປະຊຸມຄົບຄະນະບໍລິຫານສູນກາງພັກ ຄັ້ງທີ 12 ສະໄໝທີ
IX ຮຽກຮ້ອງມາຍັງທົ່ວພັກ, ທົ່ວລັດ, ທົ່ວກຳລັງປະກອບອາວຸດ ແລະ ທົ່ວປວງຊົນເຮົາຈົ່ງຕັ້ງໜ້າອອກແຮງແຂ່ງຂັນກັນສ້າງຜົນງານຄຳນັບກອງປະຊຸມໃຫຍ່ຜູ້ແທນທົ່ວປະເທດຄັ້ງທີ X ຂອງພັກ, ພ້ອມກັນເຊີດຊູມານະຈິດປະຕິວັດ ແລະ ມີຄວາມບຸກບືນສູ້ຊົນ ເຮັດໃຫ້ກອງປະຊຸມໃຫຍ່ຄັ້ງທີ X ຂອງພັກທີ່ໄດ້ໄຂຂຶ້ນໃນມື້ນີ້ ໄດ້ຮັບຜົນສຳເລັດອັນຈົບງາມ.
No comments:
Post a Comment