ກະຊວງການເງິນດໍາເນີນກອງປະຊຸມເປີດກວ້າງຄະນະພັກສະໄໝທີ 2

    ກອງປະຊຸມດັ່ງກ່າວໄດ້ຈັດຂຶ້ນແຕ່ວັນທີ 16-17 ມີນານີ້ ທີ່ກະຊວງດັ່ງກ່າວ, ໂດຍການເປັນປະທານຂອງສະຫາຍເລຂາຄະນະພັກ, ລັດຖະມົນຕີວ່າການກະຊວງການເງິນ ດຣ ລຽນ ທີແກ້ວ ເພື່ອສະຫລຸບຕີລາຄາການຈັດຕັ້ງປະຕິບັດແຜນງົບປະມານ ໃນໄລຍະຜ່ານມາ ແລະ ສຸມໃສ່ຄົ້ນຄວ້າບັນດາທິດທາງ, ແຜນການເພື່ອກໍານົດມາດຕະການຈັດຕັ້ງປະຕິບັດວຽກງານໃນຕໍ່ໜ້າໃຫ້ມີປະສິດທິຜົນກວ່າເກົ່າ, ເຊິ່ງໃນບາງຕອນການກ່າວຄໍາເຫັນເປີດກອງປະຊຸມຂອງສະຫາຍ ລຽນ ທິແກ້ວ ໄດ້ຍົກໃຫ້ເຫັນວ່າ: ການຈັດຕັ້ງປະຕິບັດແຜນງົບປະມານສົກປີນີ້ແມ່ນຍັງສືບຕໍ່ພົບຄວາມຫຍຸ້ງຍາກສົມຄວນ, ເຊິ່ງສະແດງອອກໃນຕົວເລກການເກັບລາຍຮັບຈາກແຫລ່ງ

ສໍາຄັນໃນໄລຍະ 5 ເດືອນຜ່ານມາແມ່ນຫລຸດຄາດໝາຍຫລາຍ, ອັນເປັນສັນຍານເຕືອນໃຫ້ພວກເຮົາອາດຈະພົບກັບບັນຫາການຂາດດຸນງົບປະມານຫລວງຫລາຍ ແລະ ເປັນສິ່ງທ້າທາຍຕໍ່ລະບົບການເງິນ,ງົບປະມານຂອງປະເທດເຮົາມີຄວາມຫຍຸ້ງຍາກຕື່ມອີກ.

   ສະຫາຍ ລຽນ ທິແກ້ວ ກ່າວວ່າ: ໃນສົກປີ 2015-2016 ຂະແໜງການເງິນໄດ້ວາງຄາດໝາຍສຸມໃສ່ 3 ບັນຫາສໍາຄັນຄື: ການແກ້ໄຂເງິນເດືອນພະນັກງານ-ລັດຖະກອນ ແລະ ງົບປະມານບໍລິຫານໃຫ້ເປັນປົກກະຕິ, ກໍານົດມາດຕະການຫລຸດຄວາມກົດດັນໜີ້ສີນການລົງທຶນຂອງລັດໃຫ້ຜ່ອນຄາຍ ແລະ ປັບປຸງບັນດານະໂຍບາຍຕ່າງໆ ເປັນຕົ້ນ:ນະໂຍບາຍດ້ານລາຍຮັບ, ນິຕິກໍາ, ເຄື່ອງມື ແລະ ກົນໄກ ທີ່ເປັນພື້ນຖານໃນການເກັບລາຍຮັບໃຫ້ມີຄວາມຮັດກຸມກວ່າເກົ່າ, ເພື່ອເພີ່ມທະວີຄວາມເຂັ້ມແຂງໃຫ້ແກ່ຂະແໜງການເງິນສາມາດຮັບປະກັນການສະໜອງງົບປະມານໃຫ້ບັນດາລາຍຈ່າຍທີ່ສໍາຄັນຂອງຊາດເປັນຕົ້ນ: ວັນບຸນ ແລະ ງານສໍາຄັນຂອງພັກ-ລັດ ແລະ ຂອງຊາດ, ເສີມຂະຫຍາຍປະສິດທິຜົນຂອງການເກັບລາຍຮັບໃຫ້ເພີ່ມຂຶ້ນ, ແກ້ໄຂສະພາບໜີສີນຄຸມເຄືອໃຫ້ຫລຸດລົງ ແລະ ເພີ່ມຄັງສະສົມການເງິນຫລາຍຂຶ້ນ.