ສະພາບການສັນຈອນເຂດຕະຫລາດດົງໝາກຄາຍແອອັດຫລາຍຂຶ້ນ

ຜູ້ຂັບຂີ່ທີ່ໃຊ້ເສັ້ນທາງດອນໜູນຫາທ່າງ່ອນໃຜໆກໍຕ້ອງການໃຫ້ຜູ້ຮັບຜິດຊອບຕະຫລາດດົງໝາກຄາຍ, ເມືອງໄຊທານີ, ນະຄອນຫລວງວຽງຈັນ ມີວິທີຈັດສັນລົດເຂົ້າ-ອອກຕະຫລາດໃຫ້ດີກວ່າ ເກົ່າ, ພາຍຫລັງເຫັນວ່າຄວາມແອ ອັດສັບສົນຂອງພາຫະນະບໍລິເວນ ຕະຫລາດດັ່ງກ່າວມີລັກສະນະຮ້າຍແຮງ ແລະ ມັກມີອຸປະຕິເຫດເກີດຂຶ້ນເປັນປະຈໍາ.

ນັກຂ່າວພວກເຮົາໄດ້ລົງໄປຕິດຕາມເບິ່ງສະພາບຕົວຈິງໃນບໍລິເວນເສັ້ນທາງດັ່ງກ່າວເມື່ອບໍ່ດົນມານີ້, ຫລັງຈາກມີປະຊາຊົນສະເໜີມາວ່າເສັ້ນທາງແຕ່ດອນໜູນຫາ ທ່າງ່ອນ, ໂດຍສະເພາະເຂດຕະຫລາດດົງໝາກຄາຍມີສະພາບລົດແອອັດສັບສົນຫລາຍ, ໂດຍສະເພາະໃນຊ່ວງໄລຍະຄ້າຍແລງປະມານ 15:00-18:00 ໂມງ, ຊຶ່ງເປັນຊ່ວງທີ່ຜູ້ຄົນກັບມາແຕ່ວຽກງານ ແລະ ມາຕະຫລາດເພື່ອຊື້ອາຫານການກິນ ແລະ

ປະກົດວ່າມີລົດໃຫຍ່ຈໍານວນຫລາຍຈອດຢັງຢາຍຕາມສອງຝາກທາງແບບບໍ່ເປັນລະບຽບ, ອັນໄດ້ເຮັດໃຫ້ພື້ນທີ່ໜ້າທາງລົດແລ່ນແຄບເຂົ້າ, ຂະນະທີ່ພະນັກງານບໍລິການຝາກລົດຢູ່ຕະຫລາດກໍບໍ່ໄດ້ສົນໃຈແກ້ໄຂຄວາມບໍ່ເປັນລະບຽບຮຽບຮ້ອຍດັ່ງກ່າວ, ມີພຽງແຕ່ຖ້າອໍານວຍຄວາມສະດວກໃນການເຂົ້າ-ອອກສະເພາະລົດທີ່ມາຝາກນໍາພວກເຂົາເທົ່ານັ້ນ, ຊຶ່ງມີບາງຄັ້ງເຖິງຂັ້ນເຮັດໃຫ້ການສັນຈອນເປັນອໍາມະພາດ ແລະ ຕ້ອງໃຊ້ເວລາຫລາຍຊົ່ວໂມງຈຶ່ງ ສາມາດແກ້ໄຂໄດ້.

ຜູ້ຂັບຂີ່ທ່ານໜຶ່ງບອກກັບນັກຂ່າວພວກເຮົາວ່າ: ນັບແຕ່ເສັ້ນ ທາງສາຍນີ້ໄດ້ຮັບການກໍ່ສ້າງໃຫ້ດີຂຶ້ນ ແລະ ກໍເຫັນວ່າລົດທີ່ສັນຈອນໄປມາມີປະລິມານເພີ່ມຂຶ້ນນັບມື້ ແລະ ຄວາມແອອັດສັບສົນຂອງ ລົດໃນບໍລິເວນໜ້າຕະຫລາດດົງໝາກຄາຍກໍໜາແໜ້ນຂຶ້ນເຊັ່ນກັນ, ຖ້າຫາກການຈັດສັນສະຖານທີ່ ຈອດລົດເຂົ້າ-ອອກຕະຫລາດບໍ່ດີກໍຍິ່ງຈະເຮັດໃຫ້ຄວາມແອອັດສັບສົນເພີ່ມທະວີໜັກໜ່ວງຫລາຍຂຶ້ນ ແລະ ຜູ້ຂັບຂີ່ອີກທ່ານໜຶ່ງກໍໃຫ້ທັດສະນະວ່າ:ຜູ້ຮັບຜິດຊອບຕະຫລາດຄວນຈັດສັນສະຖານທີ່ຈອດລົດຄືນໃໝ່ໃຫ້ເໝາະສົມເພື່ອສາມາດຮອງຮັບປະລິມານລົດຜູ້ມາໃຊ້ບໍລິການມີຄວາມປອດໄພບໍ່ສົ່ງຜົນກະທົບຕໍ່ຄວາມເປັນລະບຽບຂອງສັງຄົມອີກດ້ວຍ.