ລັດຖະມົນຕີ ປກສ ເນັ້ນເອົາໃຈໃສ່ປ້ອງກັນບັ້ນເລືອກຕັ້ງ ສສຊ ຊູດທີ VIII ​ໃຫ້​ຮັບປະກັນ 100%

    ເມື່ອບໍ່ດົນມານີ້, ທ່ານລັດຖະມົນຕີວ່າການກະຊວງປ້ອງກັນຄວາມສະຫງົບ (ປກສ) ພົນຕີ ສົມແກ້ວ ສີລາວົງ, ໄດ້ລົງຊຸກຍູ້ວຽກງານຢູ່ກອງບັນຊາການ ປກສ ແຂວງສະຫວັນນະເຂດ, ຄໍາມ່ວນ ແລະ ນະຄອນຫລວງວຽງຈັນ, ໂດຍເນັ້ນໃຫ້ເພີ່ມທະວີເອົາໃຈໃສ່ແຜນປ້ອງກັນໃຫ້ແກ່ບັ້ນເລືອກຕັ້ງສະມາຊິກສະພາແຫ່ງຊາດຊູດທີ VIII ແລະ ສະມາຊິກສະພາຂັ້ນທ້ອງຖິ່ນທີ່ຍັບຈໍ້ເຂົ້າມາທຸກຂະນະໃຫ້ມີຄວາມສະຫງົບປອດໄພຕາມຄາດໝາຍວາງໄວ້.

            ໃນການລົງໄປເຄື່ອນໄຫວວຽກງານຢູ່ກອງບັນຊາການແຕ່ລະແຂວງນັ້ນ, ທ່ານລັດຖະມົນຕີກະຊວງ ປກສ ໄດ້​ແນະ​ນໍາ​ໃຫ້ຕໍ່ຄະນະນໍາ-ຄະນະບັນຊາ ແລະ ພະນັກງານນັກຮົບ​ເພີ່ມ​ທະວີ​ເຮັດ​ວຽກ​ງານ​ຂອງ​ຕົນ​ເພື່ອ​ຮັບປະກັນໃຫ້ການເລືອກຕັ້ງທີ່ສໍາຄັນດັ່ງກ່າວບັນລຸຜົນສໍາເລັດຈົບງາມຕາມຄາດໝາຍວາງໄວ້, ທັງຮັບປະກັນບໍ່​ໃຫ້ປະກົດການຫຍໍ້ທໍ້ຕ່າງໆເກີດຂຶ້ນໃນຊ່ວງໄລຍະດັ່ງກ່າວ ​ແລະ ຮຽກ ຮ້ອງໃຫ້ຄະນະນໍາ-ຄະນະບັນຊາ ແລະ ພະນັກງານນັກຮົບມີສະຕິສູງຕໍ່ໜ້າທີ່ວຽກງານ, ໂດຍສະເພາະເອົາໃຈໃສ່ການວາງແຜນປ້ອງກັນເວນຍາມຕະຫລອດ 24 ຊົ່ວໂມງ, ເພີ່ມທະວີການປະສານສົມທົບກັບກໍາລັງ ປກຊ-ປກສ ຂັ້ນຮາກຖານໃຫ້ແໜ້ນແຟ້ນຕິດພັນກັບການຈັດຕັ້ງປະຕິບັດ 4 ເນື້ອໃນ 4 ຄາດໝາຍ, ຄຽງຄູ່ໄປກັບການປຸກລະດົມບັນດາອົງການຈັດຕັ້ງຕ່າງໆ ຕະຫລອດຮອດປະຊາຊົນທຸກຊັ້ນຄົນໃນສັງຄົມໃຫ້ມີສະຕິຕື່ນຕົວເປັນເຈົ້າການປະກອບສ່ວນເຂົ້າໃນວຽກງານປ້ອງກັນຄວາມສະຫງົບໃຫ້

ໜັກແໜ້ນເຂັ້ມແຂງກວ່າເກົ່າ ເພື່ອອໍານວຍຄວາມສະດວກໃຫ້ປະຊາຊົນຜູ້ມີສິດປ່ອນບັດເລືອກຕັ້ງໄດ້ໃຊ້ສິດຂອງຕົນເລືອກ​ເອົາສະມາຊິກສະພາແຫ່ງຊາດຊຸດທີ VIII ແລະ ສະມາຊິກສະພາປະຊາຊົນຂັ້ນທ້ອງຖິ່ນໃຫ້ບັນລຸຜົນສໍາເລັດຈົບງາມ.