ເພື່ອເຮັດໃຫ້ການສະເຫລີມສະຫລອງບຸນປີໃໝ່ລາວ ພສ
2559 ທີ່ຈະມາໝູນວຽນມາບັນຈົບຄົບຮອບອີກວາລະໜຶ່ງ ດຳເນີນໄປດ້ວຍຄວາມເບີກບານມ່ວນຊື່ນ, ຮັກສາມູນເຊື້ອວັດທະນະທຳ, ປະເພນີອັນດີງາມຂອງຊາດ, ເສີມສ້າງຄວາມສາມັກຄີ, ໄມຕີຈິດມິດຕະພາບຂອງຊາວນະຄອນຫລວງກັບແຂກເມືອງ, ຮັບປະກັນຄວາມສະຫງົບສຸກ, ຄວາມປອດໄພ, ຄວາມເປັນລະບຽບຮຽບຮ້ອຍໃນສັງຄົມ ແລະ ຄວາມສວຍງາມຂອງເມືອງຫລວງໃຫ້ດີ ເຈົ້າຄອງນະຄອນຫລວງວຽງຈັນ ອອກຄຳສັ່ງແນະນຳດັ່ງນີ້: 1.) ໃຫ້ທົ່ວນະຄອນຫລວງວຽງຈັນ ຈັດງານສົ່ງທ້າຍປີເກົ່າ ພສ
2558 ແລະ ຕ້ອນຮັບປີໃໝ່ ພສ
2559 ຢ່າງເປັນເອກກະພາບໃນຂອບເຂດທົ່ວນະຄອນຫລວງວຽງຈັນ ຕາມປະເພນີ ແລະ ນະໂຍບາຍລັດຖະບານ
ກຳນົດ 4 ວັນຄື:
ວັນທີ 13, 14, 15,
16 ເມສາ 2016 ແລະ ໃຫ້ເອົາວັນທີ 12 ເມສາ 2016 ເປັນມື້ພັກຊົດເຊີຍ; 2.) ການສະເຫລີມສະຫລອງປີໃໝ່ລາວ ແມ່ນໃຫ້ສົ່ງເສີມກິດຈະກຳ ທີ່ເປັນປະເພນີອັນດີງາມຄື: ການພົບປະສ້າງສັນ ແລະ ບາສີສູ່ຂວັນພາຍໃນຄອບຄົວ ຫລື
ການຈັດຕັ້ງ, ການຫົດນ້ຳອວຍໄຊໃຫ້ພອນຜູ້ອາວຸໂສ
ແລະ ຊື່ງກັນ ແລະ ກັນ, ການເຂົ້າວັດຫົດສົງພະພຸດທະຮູບ, ຕົບພະທາດຊາຍ ແລະ ກິດຈະກຳປິ່ນອ້ອມອື່ນໆ ທີ່ເຫັນວ່າມີຄວາມຈຳເປັນ, ມີຜົນປະໂຫຍດ ແລະ ມີຄວາມສາມາດຄວບຄຸມຂອງທຸກພາກສ່ວນຕົນ; 3.) ໃຫ້ທຸກພາກສ່ວນ ແລະ ທຸກເພດໄວ ສົ່ງເສີມ, ເຜີຍແຜ່ວັດທະນະທຳ ແລະ ມາລະຍາດທີ່ດີງາມຂອງຊາດລາວ ໃນການຈັດກິດຈະກຳ ແລະ ການປະພຶດຕ່າງທ ໂດຍສ່ອງແສງໃຫ້ເຫັນເຖິງຄວາມຮັກ, ຄວາມກະຕັນຍູຮູ້ບຸນຄຸນຜູ້ອາວຸໂສ,
ຄວາມສຸພາບອ່ອນໂຍນ, ຄວາມມີສະເໜ່, ສະອາດບໍລິສຸດຜຸດຜ່ອງ ແລະ ສີວິໄລ, ຢັບຢັ້ງສິ່ງອັບປະມຸງຄຸນບໍ່ໃຫ້ເກີດຂຶ້ນເຊັ່ນ: ອັກຄີໄພ, ສຽງແຕກ, ຕົວະຍົວະ, ອາລະວາດຕີກັນ, ມືນເມົາ ແລະ ອຸປະຕິເຫດໃນຕະຫລອດງານ, ສຳລັບເວລາຫົດສົງນ້ຳແບບມວນຊົນໃຊ້ເວລາ 4 ວັນຄື:
ວັນທີ 13, 14, 15,
16 ເມສາ 2016 ເລີ່ມແຕ່ເວລາ 9:00 ໂມງເຖິງ 18:00 ໂມງ; 4.) ສະຖານທີ່ຈັດງານສົ່ງທ້າຍປີເກົ່າ-ຕ້ອນຮັບປີໃໝ່ ໃຫ້ຈັດຢູ່ຕາມເຮືອນ, ສະໂມສອນຂອງບ້ານ, ສຳນັກງານ, ໂຮງງານ, ວັດວາອາຣາມ, ແຫລ່ງທ່ອງທ່ຽວ, ສວນວັດທະນະທຳ, ຫາດຊາຍຕາມແມ່ນ້ຳງື່ມ ແລະ ນ້ຳຂອງທີ່ມີເງື່ອນໄຂຄົບຖ້ວນ, ສຳລັບສະຖານທີ່ ທີ່ອົງການປົກຄອງນະຄອນຫລວງວຽງຈັນຮັບຜິດຊອບ ແມ່ນໃຫ້ຈັດໃສ່ຄຸ້ມຄອງຕົວເມືອງເກົ່າ, ຕາມຖະໜົນເສດຖາທິລາດ ຫາ
ເຈົ້າຟ້າງຸ່ມ ແລະ ບໍລິເວນຫາດດອນຈັນ; ໃຫ້ທຸກຄົນປະຕິບັດຂໍ້ຫ້າມໃນການຫລີ້ນບຸນປີໃໝ່ດັ່ງນີ້: ຫ້າມດື່ມທາດເຫລົ້າ ແລະ ເສບສິ່ງມືນເມົາແລ້ວຂັບລົດ, ຫ້າມນ້ຳໃຊ້ລົດປ້າຍລັດເລາະຫົດນ້ຳ, ຫ້າມຫົດນ້ຳສີ, ນ້ຳເປື້ອນ, ນ້ຳຄັນ, ແກວ່ງຖົງນ້ຳ, ນ້ຳກ້ອນໃສ່ກັນ, ຕໍ່ທໍ່ນ້ຳແລ້ວເອົານ້ຳຂຶ້ນລົດເລາະຫົດເດັດຂາດ, ຫ້າມນຸ່ງເຄື່ອງໂປ້, ເປືອຍເຂົ້າວັດ ແລະ ສະຖານທີ່ຊຸມຊົນ, ຫ້າມຂາຍ ແລະ ຈູດໝາກກາໂພກ
ແລະ ວັດຖຸອຸປະກອນທີ່ກໍໃຫ້ເກີດສຽງແຕກທຸກຊະນິດ, ຫ້າມເສບດົນຕີ, ເປີດເຄື່ອງສຽງຟົດເນືອງນັນບ້ານເມືອງເກີນຂອບເຂດຢູ່ກາງແຈ້ງ ແລະ ຄົບງັນມ່ວນຊື່ນ, ສົ່ງສຽງແຮງກາຍເວລາ 23 ໂມງ 30 ນາທີ.
No comments:
Post a Comment