laophatthananewspaper: ສະຫາຍ ບຸນຍັງ ວໍລະຈິດ ເລຂາທິການໃຫຍ່ ປະທານປະເທດແຫ່ງ ສປປ ລາວ ຢ້ຽມຢາມ ສສ ຫວຽດນາມ ຢ່າງເປັນທາງການ

ໂດຍຕອບສະໜອງຕາມຄຳເຊື້ອເຊີນຂອງສະຫາຍ ຫງວຽນຟູຈ້ອງ ເລຂາທິການໃຫຍ່ ຄະນະບໍລິຫານງານສູນກາງພັກກອມມູນິດຫວຽດນາມ ແລະ ສະຫາຍ ເຈີນດ້າຍກວາງ ປະທານປະເທດ ແຫ່ງ ສສ ຫວຽດນາມ, ສະຫາຍ ບຸນຍັງ ວໍລະຈິດ ເລຂາທິການໃຫຍ່ ຄະນະບໍລິຫານງານສູນກາງພັກປະຊາຊົນ ປະຕິວັດລາວ, ປະທານປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ພ້ອມຄະນະຜູ້ແທນຂັ້ນສູງພັກ-ລັດ ເດີນທາງໄປຢ້ຽມຢາມສັນທະວະໄມຕີ ສາທາລະນະລັດ ສັງຄົມນິຍົມ ຫວຽດນາມ ຢ່າງເປັນທາງການ ໃນວັນທີ 25-27 ເມສານີ້.

ພິທີຕ້ອນຮັບທາງການໄດ້ຈັດຂຶ້ນຢ່າງສົມກຽດຢູ່ສຳນັກງານປະທານປະເທດ ສສ ຫວຽດນາມ ທີ່ນະຄອນຫລວງຮ່າໂນ້ຍ ໂດຍມີສະຫາຍ ຫງວຽນຟູຈ້ອງ ເລຂາທິການໃຫຍ່ ຄະນະບໍລິຫານງານສູນກາງພັກກອມມູນິດ, ມີບັນດາການນຳ, ຄະນະລັດຖະບານ ແລະ ມວນຊົນຊາວຫວຽດນາມ ເຂົ້າຮ່ວມເປັນຈຳນວນຫລາຍ.

ພາຍຫລັງສຳເລັດພິທີຕ້ອນຮັບການພົບປະສອງຝ່າຍໄດ້ຈັດຂື້ນຢູ່ຫ້ອງປະຊຸມໃຫຍ່ ຫ້ອງວ່າການສູນກາງພັກກອມມູນິດຫວຽດນາມ, ສະຫາຍ ຫງວຽນຟູຈ້ອງ ໄດ້ສະແດງຄວາມຍິນດີຕ້ອນຮັບຢ່າງອົບອຸ່ນ ພ້ອມທັງຕີລາຄາສູງຕໍ່ສະຫາຍ ບຸນຍັງ ວໍລະຈິດ ທີ່ໄດ້ຮັບການເລືອກຕັ້ງໃຫ້ເປັນເລຂາທິການໃຫຍ່ຄະນະບໍລິການງານສູນກາງພັກ, ປະທານປະເທດແຫ່ງ ສປປ ລາວ ເຊິ່ງສະແດງໃຫ້ເຫັນເຖິງຄວາມເຊື່ອໝັ້ນຂອງການນໍາພັກ-ລັດ ກໍຄືປະຊາຊົນລາວ. ການເດີນທາງຢ້ຽມຢາມສັນທະວະໄມຕີ ສສ ຫວຽດນາມ ຢ່າງເປັນທາງການຂອງສະຫາຍພ້ອມຄະນະຄັ້ງນີ້ ເປັນການຢັ້ງຢືນ ແລະ ເສີມຂະຫຍາຍຄວາມສາມັກຄີພິເສດ, ການຮ່ວມມືຮອບດ້ານ ລະຫ່ວາງ ສອງພັກ, ສອງລັດ ກໍຄືປະຊາຊົນສອງຊາດ ລາວ-ຫວຽດນາມ ທີ່ມີມາແຕ່່ດົນນານແລ້ວນັ້ນໝັ້ນ ຄົງຖະໜົງແກ່ນຕະຫລອດກາລະນານ. ພ້ອມນີ້, ສະຫາຍ ຫງວຽນຟູຈ້ອງ ກໍໄດ້ແຈ້ງໃຫ້ສະຫາຍ ບຸນຍັງ ວໍລະຈິດ ຊາບກ່ຽວກັບຜົນສຳເລັດການດຳເນີນກອງປະຊຸມໃຫຍ່ ຄັ້ງທີ 12 ພັກກອມມູນິດຫວຽດນາມ ແລະ ການດຳເນີນກອງປະຊຸມສະພາແຫ່ງຊາດຫວຽດນາມ ທີ່ໄດ້ມີການເລືອກຕັ້ງການນໍາພັກ- ລັດຊຸດໃໝ່ຂອງຫວຽດນາມດ້ວຍຜົນສໍາເລັດທີ່ຈົບງາມ. ພ້ອມນີ້ກໍຢືນຢັນທີ່ຈະຮ່ວມກັບພັກ-ລັດຖະບານ ກໍຄືປະຊາຊົນລາວອ້າຍນ້ອງເພີ່ມພູນຄູນສ້າງຄວາມສາມັກຄີພິເສດ, ການຮ່ວມມືຮອບດ້ານລະຫວ່າງສອງຊາດ ລາວ-ຫວຽດນາມ ເພື່ອຄວາມສົມບູນພູນສຸກຂອງປະຊາຊົນສອງຊາດ. ຖືໂອກາດນີ້, ສະຫາຍ ບຸນຍັງ ວໍລະຈິດ ເລຂາທິການໃຫຍ່, ປະທານປະເທດ ກໍໄດ້ສະແດງຄວາມຂອບໃຈຕໍ່ການຕ້ອນຮັບຢ່າງອົບອຸ່ນ ແລະ ສົມກຽດຈາກສະຫາຍ ຫງວຽນຟູຈ້ອງ ພ້ອມການນໍາຂັ້ນສູງ ກໍຄືປະຊາຊົນຫວຽດນາມອ້າຍນ້ອງ ການເດີນທາງຢ້ຽມຢາມສັນທະວະໄມຕີ ສສ ຫວຽດນາມ ຢ່າງເປັນທາງການໃນຄັ້ງນີ້ ເປັນການເຄື່ອນໄຫວວຽກງານການຕ່າງປະເທດທຳອິດພາຍຫລັງທີ່ໄດ້ຮັບການແຕ່ງຕັ້ງເປັນເລຂາທິການໃຫຍ່ຄະນະບໍລິຫານງານສູນກາງພັກ, ປະທານປະເທດແຫ່ງ ສປປ ລາວ ພ້ອມທັງແຈ້ງໃຫ້ສະຫາຍ ຫງວຽນຟູຈ້ອງ ຊາບກ່ຽວກັບຜົນສຳເລັດການດໍາເນີນກອງປະຊຸມໃຫຍ່ຄັ້ງທີ X ຂອງພັກປະຊາຊົນ ປະຕິວັດລາວ ແລະ ການເລືອກຕັ້ງສະມາຊິກສະພາແຫ່ງຊາດຊຸດທີ VIII ດ້ວຍຜົນສໍາເລັດທີ່ຈົບງາມ. ຕາງໜ້າພັກ-ລັດຖະບານ ແລະ ປະຊາຊົນລາວ, ສະຫາຍເລຂາທິການໃຫຍ່ ບຸນຍັງ ວໍລະຈິດ ໄດ້ສະແດງຄວາມຂອບອົກຂອບໃຈມາຍັງພັກ-ລັດ ກໍຄືປະຊາຊົນຫວຽດນາມອ້າຍນ້ອງທີ່ໄດ້ໃຫ້ການສະໜັບສະໜູນແລະ ຊ່ວຍເຫລືອລາວຕະຫລອດມາ. ພັກ-ລັດຖະບານ ກໍຄືປະຊາຊົນລາວຢືດໝັ້ນທີ່ຈະຄຽງບ່າຄຽງໄຫລ່ກັບພັກ-ລັດຖະບານ ແລະ ປະຊາຊົນຫວຽດນາມອ້າຍນ້ອງສືບຕໍ່ປົກປັກຮັກສາ ແລະ ເສີມຂະຫຍາຍມູນເຊື້ອແຫ່ງຄວາມສາມັກຄີພິເສດ ການຮ່ວມມືຮອບດ້ານລະຫວ່າງ ລາວ-ຫວຽດນາມ ໃຫ້ນັບມື້ເຂັ້ມແຂງ ເພື່ອຄວາມໝັ້ນຄົງໃນພາກພື້ນ ແລະ ສາກົນ.