ອີກບໍ່ດົນ ວັນກຳມະກອນສາກົນ (1 ພຶດສະພາ) ກໍຈະມາຮອດຈອດເຖິງ ຈຶ່ງເຫັນສົມຄວນໄປເບິ່ງບົດຮຽນຂອງບາງປະເທດກ່ຽວກັບມາດຕະການ ຄືນະໂຍບາຍປົກປ້ອງສິດ ແລະ ຜົນປະໂຫຍດຂອງຜູ້ອອກແຮງງານ ເຊັ່ນຢູ່ປະເທດບຣູໄນ
ດາຣູຊາລາມ, ຢູ່ເກາະໄຕ້ຫວັນ ແລະ ຢູ່ອິນໂດເນເຊຍ ເປັນຕົ້ນ. ສຳລັບຢູ່ບຣູໄນ ດາຣູຊາລາມ ນັ້ນ,
ໃນທ້າຍປີ 2015 ຜ່ານມາ ທາງການຂອງປະເທດນີ້ໄດ້ອອກຂໍ້ກຳນົດກ່ຽວກັບຈຳນວນເງິນທີ່ຜູ້ຈ້າງງານສາມາດຕັດຈາກເງິນເດືອນຂອງແຮງງານຕ່າງປະເທດ ເພື່ອເປັນຄ່າໃຊ້ຈ່າຍໃນການແລ່ນເອກະສານນຳແຮງງານດັ່ງກ່າວເຂົ້າໄປເຮັດວຽກຢູ່ປະເທດ. ທ່ານ ອາຊາຮາຣີ ຜູ້ຊ່ວຍລັດຖະມົນຕີແຮງງານຂອງບຣູໄນ ດາຣູຊາລາມ ໄດ້ໃຫ້ລາຍລະອຽດຕໍ່ໜັງສືພິມ The Brunei Times ວ່າ:
ຈຳນວນເງິນທີ່ນາຍຈ້າງສາມາດຕັດຈາກເງິນເດືອນຂອງແຮງງານ ເພື່ອເປັນຄ່າໃຊ້ຈ່າຍດັ່ງກ່າວມາຂ້າງເທິງນັ້ນຈະຕ້ອງບໍ່ເກີນກວ່າ 50% ຫລື ເຄິ່ງໜຶ່ງຂອງເງິນເດືອນຂອງແຮງງານທີ່ກ່ຽວຂ້ອງ. ຍົກຕົວຢ່າງຖ້າແຮງງານໄດ້ຮັບຄ່າ
ຈ້າງເດືອນລະ 300 ໂດລາສະຫະລັດ ຈຳນວນເງິນທີ່ສາມາດຕັດກໍຄືບໍ່ໃຫ້ເກີນ 150 ໂດລາ.
ການອອກຂໍ້ກຳນົດນີ້ຈະຊ່ວຍປ້ອງກັນບໍ່ໃຫ້ນາຍຈ້າງສວຍໂອກາດຂູດຮີດແຮງງານຕ່າງປະເທດດ້ວຍການຕັດເງິນຄ່າແຮງງານຕາມລຳພັງໃຈ.
ບັນຫານີ້ ແຮງງານລາວໃນຕ່າງປະເທດເຄີຍພົບມາແລ້ວຈົນໄດ້ເອົານ້ຳຕາເຊັດຫົວເຂົ່າ ຍ້ອນຖືກນາຍຈ້າງຕັດເງິນຄ່າແຮງງານ ໂດຍອ້າງວ່າເພື່ອເປັນຄ່າໃຊ້ຈ່າຍແລ່ນເອກະສານ ແລະ ຄ່າເດີນທາງ. ສ່ວນຢູ່ເກາະໄຕ້ຫວັນ, ໃນກາງປີ 2015 ແນວໂຮມແຮງງານຂອງໄຕ້ຫວັນ (The Taiwan Labour Frint) ແລະ
ກຸ່ມແຮງງານອື່ນໆ ໄດ້ຮ່ວມກັນຮຽກຮ້ອງໃຫ້ກະຊວງແຮງງານຂຶ້ນເງິນເດືອນພື້ນຖານຈາກເດີມເປັນ 26.000 ໂດລາໄຕ້ຫວັນ (ເທົ່າກັບ 833 ໂດລາສະຫະລັດ) ຕໍ່ເດືອນ. ນອກຈາກນັ້ນ ກຸ່ມແຮງງານທີ່ກ່ຽວຂ້ອງຍັງໄດ້ຮຽກຮ້ອງໃຫ້ກະຊວງແຮງງານຊີ້ແຈງກ່ຽວກັບມາດຕະຖານຄິດໄລ່ເງິນເດືອນຂັ້ນພື້ນຖານໃຫ້ທົ່ວສັງຄົມຊາບ. ທ່ານ ຊຸນຢູລຽນ (Sun Yu-Lian) ເລຂາທິການໃຫຍ່ແນວໂຮມແຮງງານໄຕ້ຫວັນ ມີຄຳເຫັນວ່າ: ສູດໃນການຄິດໄລ່ເງິນເດືອນຂັ້ນພື້ນຖານນັ້ນຕ້ອງໃຫ້ສອດຄ່ອງກັບສູດຂອງອົງການແຮງງານສາກົນ ຄືຕ້ອງເປັນຈຳນວນທີ່ສາມາດສະໜອງຄ່າໃຊ້ຈ່າຍທີ່ຈຳເປັນຂັ້ນພື້ນຖານຂອງແຕ່ລະຄອບຄົວ. ຢູ່ອິນໂດເນເຊຍ, ທາງການອິນໂດເນເຊຍໄດ້ລິເລີ່ມແຜນສ້າງຕັ້ງຫ້ອງການຕົວແທນແຮງງານຢູ່ຕ່າງປະເທດ ເພື່ອເປັນໜ່ວຍງານຮັບຜິດຊອບປົກປ້ອງສິດ ແລະ ຜົນປະໂຫຍດຂອງແຮງງານອິນໂດເນເຊຍ. ໃນເບື້ອງຕົ້ນ ຫ້ອງການຕົວແທນດັ່ງກ່າວຈະສ້າງຂຶ້ນຢູ່ບັນດາປະເທດທີ່ມີແຮງງານອິນໂດເນເຊຍເປັນຈຳນວນຫລວງຫລາຍ. ອິນໂດເນເຊຍເປັນໜຶ່ງໃນບັນດາປະເທດອາຊຽນທີ່ສົ່ງອອກແຮງງານເປັນຈຳນວນຫລວງຫລາຍໄປບັນດາປະເທດໃນຕາເວັນອອກກາງ, ສ່ວນຢູ່ໃນອາຊີກໍມີ ສ.ເກົາຫລີ, ຍີ່ປຸ່ນ, ໄຕ້ຫວັນ, ເຂດປົກຄອງພິເສດຮົງກົງ ແລະ ມາເລເຊຍ. ຜ່ານມາແຮງງານເພດຍິງອິນໂດເນເຊຍທີ່ອອກໄປເຮັດວຽກເປັນຄົນໃຊ້ປະຈຳຄົວເຮືອນນັ້ນມີຄວາມສ່ຽງສູງຕໍ່ການຖືກຂູດຮີດແຮງງານ ແລະ ລວນລາມທາງເພດ. ດັ່ງນັ້ນ ທາງການອິນໂດເນເຊຍຈຶ່ງໄດ້ຈຳກັດແຮງງານເພດຍິງທີ່ເຮັດວຽກເປັນຄົນໃຊ້. ຫ້ອງການຕົວແທນແຮງງານທີ່ຈະສ້າງຂຶ້ນຢູ່ຕ່າງປະເທດນັ້ນ ຈະບໍລິຫານ ແລະ ຄຸ້ມຄອງໂດຍເຈົ້າໜ້າທີ່ຈາກກະຊວງແຮງງານ. ໜ້າທີ່ຕົ້ນຕໍຂອງຫ້ອງການກໍຄືການຄຸ້ມຄອງລະບຽບການອອກແຮງງານ ແລະ ການປົກປ້ອງສິດທິ ກໍຄືຜົນປະໂຫຍດຂອງແຮງງານ.
No comments:
Post a Comment