ກະຊວງການຕ່າງປະເທດຕີລາຄາສູງຕໍ່ຜົນສຳເລັດກອງປະຊຸມລັດຖະມົນຕີຕ່າງປະເທດອາຊຽນຄັ້ງທີ 49 ເພື່ອກ້າວສູ່ກອງປະຊຸມສຸດຍອດ

        ບ່າຍວັນທີ 1 ສິງຫານີ້, ທ່ານ ສະເຫລີມໄຊ ກົມມະສິດ ລັດຖະມົນຕີກະຊວງການຕ່າງປະເທດ, ພ້ອມດ້ວຍຫົວໜ້າອະນຸກຳມະການທີ່ຮັບຜິດຊອບວຽກງານສະເພາະ, ຫົວໜ້າກົມ ແລະ ພາກສ່ວນກ່ຽວຂ້ອງ, ຈັດກອງປະຊຸມສະຫລຸບຕີລາຄາຄືນຜົນສຳເລັດໃນການຈັດກອງປະຊຸມລັດຖະມົນຕີຕ່າງ ປະເທດອາຊຽນຄັ້ງທີ 49 ແລະ ກອງປະຊຸມທີ່ກ່ຽວ ຂ້ອງອື່ນໆໃນລະຫວ່າງວັນທີ 21-26 ກໍລະກົດຜ່ານມາ, ເພື່ອກະກຽມໃຫ້ແກ່ການຈັດກອງປະຊຸມສຸດຍອດອາຊຽນ ຄັ້ງທີ 28 ແລະ 29 ແລະ ກອງປະຊຸມສຸດຍອດອື່ນໆໃນວັນທີ 6-8 ກັນຍາທີ່ຈະມາເຖິງນີ້ ໃຫ້ດຳເນີນໄປດ້ວຍຜົນສຳເລັດຢ່າງຈົບ ງາມ.

          ທ່ານລັດຖະມົນຕີກະຊວງການຕ່າງປະເທດ ໄດ້ຕີລາຄາວ່າ: ກອງປະຊຸມດັ່ງກ່າວ ໄດ້ດຳເນີນໄປດ້ວຍບັນຍາກາດທີ່ດີ, ມີການປຶກສາຫາລືກັນແບບກົງໄປກົງມາຢ່າງສ້າງສັນ, ແຕ່ລະອະນຸກຳມະ ການມີຄວາມເອົາໃຈໃສ່ໃນການປະຕິບັດໜ້າທີ່ຮັບຜິດຊອບຂອງຕົນຢ່າງສູງ, ທຸກພາກສ່ວນມີຄວາມກຽມພ້ອມຮັບໃຊ້ ແລະ ປະກອບສ່ວນການເປັນເຈົ້າພາບ ແລະ ປະທານຂອງກອງປະຊຸມສຸດຍອດອາ ຊຽນຄັ້ງທີ 28 ແລະ 29, ໂດຍສະເພາະວຽກງານປ້ອງກັນຊາດ-ປ້ອງກັນຄວາມສະຫງົບ, ວຽກງານການບິນພົນລະເຮືອນ, ພະລາທິການ, ພິທີການ ແລະ ອື່ນໆ, ນອກນີ້ ອະນຸກຳມະການຕ່າງໆ ຈົ່ງພ້ອມກັນເອົາໃຈໃສ່ສືບຕໍ່ແກ້ໄຂຂໍ້ຄົງຄ້າງ, ຊຸກຍູ້ກະກຽມໜ້າວຽກຂອງຕົນໃຫ້ເປັນແຜນວຽກແບບລະອຽດ ເພື່ອສະດວກໃນການຕິດຕາມຄວາມຄືບໜ້າຂອງແຕ່ລະໜ້າວຽກ ພ້ອມທັງລາຍງານຄວາມຄືບໜ້າໃຫ້ຄະນະກຳມະການຊີ້ນຳລະດັບຊາດຢ່າງເປັນປົກກະຕິ ເພື່ອໃຫ້ທຸກວຽກງານດຳເນີນໄປດ້ວຍຜົນສຳ ເລັດດີຂຶ້ນກວ່າເກົ່າ.