ຊາວບ້ານໂນ້ນຂີ້ເຫລັກຫລາຍຄອບຄົວພວມພະເຊີນກັບມົນລະພິດທີ່ບໍ່ດີຕໍ່ສຸຂະພາບຢ່າງແຮງ, ຫລັງຈາກມີກິ່ນຂິວຂອງສານເຄມີອອກມາຈາກໂຮງງານແຫ່ງໜຶ່ງໃນເຂດດັ່ງກ່າວ, ຂະນະທີ່ປະຊາຊົນບອກເປັນສຽງດຽວວ່າຜ່ານມາເຄີຍສະເໜີອໍານາດການປົກຄອງບ້ານເພື່ອຊ່ວຍແກ້ໄຂກິ່ນຂິວດັ່ງກ່າວຫລາຍຄັ້ງແຕ່ບໍ່ໄດ້ຮັບຜົນ, ຈຶ່ງຕ້ອງຫັນມາເພິ່ງສື່ມວນຊົນເພື່ອສະເໜີຫາພາກສ່ວນກ່ຽວຂ້ອງໄດ້ລົງມາກວດສອບ
ແລະ ມີວິທີແກ້ໄຂຄວາມເດືອດ ຮ້ອນດັ່ງກ່າວໂດຍໄວ.
ເມື່ອມໍ່ໆມານີ້, ນັກຂ່າວພວກເຮົາໄດ້ລົງໄປສັງເກດເບິ່ງບໍລິເວນພາຍນອກຂອງໂຮງງານ
ແຫ່ງນີ້, ຊຶ່ງຕັ້ງຢູ່ບໍ່ຫ່າງຈາກຊຸມຊົນປານໃດ, ເຫັນວ່າມີເນື້ອທີກວ້າງຂວາງສົມຄວນ, ມີຮົ້ວເຫລັກ ແລະ ຊີມັງອ້ອມຢ່າງແໜ້ນໜາ, ມີອາຄານໃຫຍ່ໜຶ່ງຫລັງ ແລະ ມີ 4 ທໍ່ລະບາຍຄວັນອອກຈາກອາຄານ, ເມື່ອສອບຖາມປະຊາຊົນທີ່ອາໄສຢູ່ບໍລິເວນໃກ້ຄຽງຮູ້ວ່າ:
ໂຮງງານແຫ່ງນີ້ຕັ້ງມາຫລາຍປີແລ້ວແຕ່ບໍ່ຮູ້ວ່າ
ໂຮງງານຊື່ຫຍັງ, ແຕ່ມີກໍາມະກອນຈໍານວນໜຶ່ງທີ່ເຄີຍເຮັດວຽກຢູ່ໂຮງງານແຫ່ງນີ້ບອກວ່າເປັນໂຮງງານຫລອມເອົາໂລຫະຈາກສິ່ງເສດເຫລືອຂີ້ເຫຍື້ອເອເລັກໂຕຣນິກ ແລະ ມີກິ່ນຂິວອອກມາຈາກໂຮງງານເປັນໄລຍະ, ໂດຍສະເພາະໃນຍາມອາກາດຄື້ມຍິ່ງມີກິ່ນຂິວຮຸນແຮງຫລາຍ, ເຊິ່ງເຮັດໃຫ້ເກີດອາການວິນຫົວ ແລະ ປວດຮາກ ແລະ
ຈາກບັນຫາທີ່ເກີດຂຶ້ນ ປະຊາຊົນຕ່າງສະແດງຄວາມເປັນຫວ່ງວ່າຖ້າຫາກປະປ່ອຍໄປດົນກໍຍິ່ງຈະສົ່ງຜົນກະທົບອັນຕະລາຍຕໍ່ສຸຂະພາບຂອງພວກເຂົາຫລາຍຂຶ້ນ, ຈຶ່ງສະເໜີໃຫ້ພາກສ່ວນກ່ຽວຂ້ອງໄດ້ລົງໄປກວດກາ ແລະ
ແກ້ໄຂສິ່ງທີ່ບໍ່ດີຕໍ່ສິ່ງແວດ ລ້ອມ ແລະ ສັງຄົມດັ່ງກ່າວນີ້ໂດຍໄວ.
ໃນໄລຍະຜ່ານມາ, ສປປ ລາວ ໄດ້ໃຫ້ຄວາມສໍາຄັນຕໍ່ວຽກງານສົ່ງເສີມການລົງທຶນໃນຂະ ແໜງອຸດສະຫະກໍາປຸງແຕ່ງ, ໄປຄຽງຄູ່ກັບການຄຸ້ມຄອງບັນດາຫົວໜ່ວຍທຸລະກິດ, ໂຮງຈັກໂຮງງານອຸດສະຫະກໍາຕ່າງໆ ຕ້ອງດໍາເນີນຕາມລະບຽບກົດໝາຍ, ທັງຮັບປະກັນດ້ານຄວາມປອດໄພຕໍ່ສິ່ງແວດ ລ້ອມ ແລະ ສັງຄົມ.
ພ້ອມທັງໄດ້ດໍາເນີນມາດຕະການຕ່າງໆຢ່າງເຂັ້ມງວດຕໍ່ຫົວໜ່ວຍທຸລະກິດທີ່ເຄື່ອນໄຫວບໍ່ຖືກຕ້ອງຕາມລະບຽບກົດໝາຍ
ແລະ ບໍ່ປະຕິບັດຕາມລະບຽບຫລັກການທີ່ພາກສ່ວນກ່ຽວຂ້ອງກໍານົດໄວ້, ດັ່ງກໍລະນີລັດຖະບານໄດ້ສັ່ງໂຈະການເຄື່ອນໄຫວຂອງໂຮງງານຂີ້ເຫຍື້ອເອເລັກໂຕຣນິກຂອງຕ່າງປະເທດແຫ່ງໜຶ່ງໃນເຂດນິຄົມອຸດສະຫະກໍາໂນນທອງ, ເມືອງໄຊທານີ, ນະຄອນ ຫລວງວຽງຈັນເມື່ອກາງປີ 2016 ນີ້, ຍ້ອນໂຮງງານດັ່ງກ່າວສົ່ງຜົນກະທົບອັນບໍ່ດີຕໍ່ສິ່ງແວດລ້ອມ ແລະ ສັງຄົມມາແລ້ວ.
No comments:
Post a Comment