ການບິນລາວປັບປຸງລະບົບຄວາມປອດໄພຮອງຮັບການເພີ່ມຂຶ້ນຂອງຕະຫລາດການບິນ

            ລັດວິສາຫະກິດການບິນລາວ, ພວມສຸມໃສ່ພັດທະນາການບໍລິການ ແລະ ປັບປຸງລະບົບຄວາມປອດໄພຂອງຕົນຢ່າງຮອບດ້ານຕາມມາດຕະຖານສາກົນເທື່ອລະກ້າວ, ເພື່ອຕອບສະໜອງດ້ານການບໍລິການຂົນສົ່ງໂດຍສານທາງອາກາດທີ່ເຫັນວ່ານັບມື້ເພີ່ມຂຶ້ນນັ້ນໃຫ້ມີປະສິດພາບສູງຂຶ້ນ.

           ທ່ານຮອງອໍານວຍການລັດວິສາຫະກິດການບິນລາວ ສົມສະໄໝ ວິຊຸນນະລາດ ໃຫ້ຮູ້ວ່າ: ປັດຈຸບັນລັດວິສາຫະກິດການບິນລາວມີພະນັກງານລັດຖະກອນ-ກໍາມະກອນທັງໝົດ 923 ຄົນ, ໃນນັ້ນຍິງ 363 ຄົນ, ມີສາຂາບໍລິການພາຍໃນປະເທດ 7 ແຫ່ງ ແລະ 14 ແຫ່ງຢູ່ຕ່າງປະເທດ ແລະ ເພື່ອຮອງຮັບກັບການເຕີບໃຫຍ່ຂະຫຍາຍຕົວຂອງທຸລະກິດການບິນໃນປັດຈຸບັນກໍຄື

ອານາຄົດ,ພວກເຮົາໄດ້ສຸມໃສ່ພັດທະນາຂອດບໍລິການ ແລະ ລະບົບຄວາມປອດໄພຮອບດ້ານ ເຊັ່ນ: ໂຄງປະກອບການຈັດຕັ້ງ ແລະ ຊັບຊ້ອນພະນັກງານໃຫ້ສອດຄ່ອງກັບເງື່ອນໄຂສະພາບການດໍາເນີນທຸລະກິດ, ສ້າງປື້ມຄູ່ມື, ຝຶກອົບຮົມວຽກງານການບໍລິການ ແລະ ວິຊາສະເພາະໃຫ້ພະນັກງານທັງຢູ່ພາຍໃນ ແລະ ຕ່າງປະເທດ ໃຫ້ໄດ້ຕາມມາດຕະຖານສາກົນ. ໂດຍສະເພາະການກວດກາຄຸນນະພາບ, ຄວາມປອດໄພ ແລະ ການຮັກສາຄວາມປອດໄພ ຊຶ່ງຖືວ່າເປັນຫົວໃຈຫລັກຂອງການບໍລິການຂອງການບິນລາວ. ໃນປີ 2016 ນີ້, ການບິນລາວໄດ້ຮັບຢັ້ງຢືນມາດຕະຖານຄວາມປອດໄພສາກົນຈາກສະມາຄົມຂົນສົ່ງການຂົນສົ່ງທາງອາກາດສາກົນ, ອັນໄດ້ສ້າງຄວາມເຊື່ອໝັ້ນໃຫ້ບໍລິສັດປະກັນໄພທີ່ປະເທດອັງກິດໃນການຕໍ່ສັນ ຍາປະກັນໄພໃນສົກປີ 2016-2017 ພ້ອມທັງມີສ່ວນຫລຸດລົງອີກ 20% ຂອງມູນຄ່າປະກັນໄພ ແລະ ເຫັນໄດ້ຈາກການເຕີບໃຫຍ່ຂະຫຍາຍຕົວຂອງບໍລິສັດຈຶ່ງໄດ້ວ່າຈ້າງນັກບິນຕ່າງປະເທດທີ່ມີຄຸນນະ

ພາບຊຶ່ງກວມປະມານ 50% ຂອງນັກບິນທັງໝົດເພື່ອມາຊ່ວຍໃນການປະຕິບັດຖ້ຽວບິນ, ພ້ອມທັງຕິດຕັ້ງລະບົບຕິດຕາມເຮືອບິນທີ່ປະຕິບັດໜ້າທີ່ໃນຕະຫລອດ 24 ຊົ່ວໂມງ, ເອົາໃຈໃສ່ວຽກງານສ້ອມບໍາລຸງເຮືອບິນໃຫ້ໄດ້ຕາມເຂື່ອນໄຂມາດຕະຖານຂອງກົມການບິນພົນລະເຮືອນ ແລະ ສາກົນ. ນອກຈາກນີ້ ຍັງເພີ່ມທະວີເອົາໃຈໃສ່ຢ່າງເຂັ້ມງວດວຽກງານປ້ອງກັນເຂດພາຍນອກອາຄານ ແລະ ໃນອາຄານ ເປັນຕົ້ນ: ເພີ່ມມາດຕະການກວດກາເວນຍາມຕະຫລອດ 24 ຊົ່ວໂມງໃນຈຸດຈອດລົດ, ສ້າງຂົນສົ່ງສີນຄ້າ, ກວດກາຊໍາພາລະ ແລະ ຜູ້ໂດຍສານ ເພື່ອຮັບປະກັນບໍ່ໃຫ້ມີການນໍາເອົາວັດຖຸອັນຕະລາຍ, ອາວຸດ ແລະ ອຸປະກອນທີ່ເກືອດຫ້າມອື່ນໆເຂົ້າເຂດສະໜາມບິນ ແລະ ເຮືອບິນໄດ້ໂດຍເດັດຂາດ.

            ທ່ານຮອງອໍານວຍການວິສາຫະກິດດັ່ງກ່າວ ໃຫ້ຮູ້ວ່າ: ໃນໂອກາດກະກຽມໃຫ້ແກ່ກອງປະ ຊຸມສຸດຍອດອາຊຽນທີ່ຈະຈັດຂຶ້ນໃນມໍ່ໆນີ້, ສໍາລັບການບິນລາວໄດ້ກະກຽມຄວາມພ້ອມໝົດແລ້ວເພື່ອ ອໍານວຍຄວາມສະດວກໃນດ້ານຕ່າງໆ ເປັນຕົ້ນ: ຈັດສັນແຜນການບິນທັງພາຍໃນ ແລະ ຕ່າງປະເທດ ເພື່ອໃຫ້ຖືກຕ້ອງຕາມວັນເວລາ,ມີຄວາມເປັນລະບຽບ ແລະ ມີຄວາມປອດໄພດີ.