ສ້າງຄວາມເຂັ້ມແຂງໃຫ້ແກ່ ສສຊ ເພດຍິງ

            ລະຫວ່າງວັນທີ 29-30 ກໍລະກົດຜ່ານມານີ້, ແຂວງຄໍາມ່ວນໄດ້ຈັດກອງປະຊຸມຝຶກອົບຮົມຫົວຂໍ້: ສ້າງຄວາມເຂັ້ມແຂງໃຫ້ແກ່ສະມາຊິກສະພາແຫ່ງຊາດ (ສສຊ) ເພດຍິງຊຸດທີ VIII ແລະ ສະມາຊິກສະພາປະຊາຊົນເພດຍິງແຂວງ, ນະຄອນຫລວງ. ໂດຍການເປັນປະທານຂອງທ່ານນາງ ທັດສະດາພອນ ແສງສຸລິຍາ ປະທານຄະນະ ສສຊ ເພດຍິງສະພາແຫ່ງຊາດ, ໂດຍການເຂົ້າຮ່ວມຂອງທ່ານນາງ ສີໃສ ລືເດດມູນສອນ ກໍາມະການສູນກາງພັກ, ຮອງປະທານສະພາແຫ່ງຊາດ, ຜູ້ຊີ້ນໍາຄະ ນະ ສສຊ ເພດຍິງ, ທ່ານ ສົມໃຈ ເພັດສີນວນ ຮອງເລຂາພັກແຂວງ, ປະທານສະພາປະຊາຊົນແຂວງ ຄໍາມ່ວນ ແລະ ມີທ່ານປະທານ-ຮອງປະທານກໍາມາທິການສະພາແຫ່ງຊາດເຂົ້າຮ່ວມນໍາດ້ວຍ. ເພື່ອສ້າງຄວາມເຂັ້ມແຂງໃຫ້ແກ່ ສສຊ ເພດຍິງ ແລະ ສະມາຊິກສະພາປະຊາຊົນເພດຍິງຂັ້ນແຂວງໃນການຮຽນຮູ້ ແລະ ເຂົ້າໃຈບາງ

ບົດຮຽນກ່ຽວກັບພາວະຄວາມເປັນຜູ້ນໍາ ແລະ ວິທີການ, ທັກສະການປະກອບຄໍາເຫັນຕໍ່ເວທີກອງປະຊຸມສະພາແຫ່ງຊາດ ແລະ ກອງປະຊຸມສະພາປະຊາຊົນຂັ້ນແຂວງ, ພາລະບົດບາດ, ສິດໜ້າທີ່ຂອງຄະນະ ສສຊ ເພດຍິງ ໃນການຕິດຕາມກວດກາການຈັດຕັ້ງປະຕິບັດນະໂຍບາຍ, ກົດມາຍ, ນິຕິກໍາຕ່າງໆ ພ້ອມນັ້ນກໍໄດ້ຮຽນຮູ້ຄວາມເປັນມາ ແລະ ບົດຮຽນການເຄື່ອນ ໄຫວວຽກງານຕົວຈິງຂອງຄະນະ ສສຊ ເພດຍິງ  ເພື່ອເປັນບ່ອນອິງໃຫ້ແກ່ການເຄື່ອນໄຫວວຽກງານຂອງ ສສຊ ເພດຍິງ ແລະ ສະພາປະຊາຊົນເພດຍິງຂັ້ນແຂວງກ່ຽວກັບຫລັກການພື້ນຖານຂອງສົນທິ ສັນຍາວ່າດ້ວຍລົບລ້າງທຸກການຈໍາແນກຕໍ່ເພດຍິງ.

           ໃນໂອກາດນີ້, ທ່ານນາງ ສີໃສ ລືເດດມູນສອນ ໄດ້ມີຄໍາເຫັນໂອ້ລົມຕໍ່ກອງປະຊຸມວ່າ: ນີ້ເປັນກອງປະຊຸມທີ່ກວ້າງຂວາງ ເພື່ອຮຽກໂຮມເອົາບັນດາສະມາຊິກສະພາແຫ່ງຊາດເພດຍິງ ແລະ ສະມາ ຊິກສະພາປະຊາຊົນເພດຍິງແຂວງ. ຖືວ່າເປັນກອງປະຊຸມທໍາອິດທີ່ຄະນະ ສສຊ ເພດຍິງ ໄດ້ຈັດຂຶ້ນ. ກອງປະຊຸມດັ່ງກ່າວມີຄວາມໝາຍສໍາຄັນຫລາຍຕໍ່ວຽກງານຄະນະ ສສຊ ເພດຍິງ ແລະ ສະມາຊິກສະພາປະຊາຊົນເພດຍິງແຂວງ ກໍຄືບັນດາທ່ານ ສສຊ ເພດຍິງເອງ.

            ທ່ານຮອງປະທານສະພາແຫ່ງຊາດເນັ້ນວ່າ: ກອງປະຊຸມຄັ້ງນີ້ລ້ວນແຕ່ຈະເປັນບົດຮຽນທີ່ດີໃຫ້ແກ່ ສສໍ ເພດຍິງ ເພື່ອຈະໄດ້ນໍາໄປໝູນໃຊ້ເຂົ້າໃນການປະຕິບັດວຽກງານວິຊາສະເພາະຂອງຕົນ ແລະ ເປັນການປະກອບສ່ວນອັນສໍາຄັນເຂົ້າໃນການຜັນຂະຫຍາຍແນວທາງນະໂຍບາຍຂອງພັກ ແລະ ການຄຸ້ມຄອງຂອງລັດ ໂດຍສະເພາະແມ່ນວຽກຕິດຕາມກວດກາການປະຕິບັດລັດຖະທໍາມະນູນ, ກົດໝາຍ ແລະ ບັນດາສົນທິສັນຍາທີ່ພົວພັນເຖິງສິດຜົນປະໂຫຍດຂອງແມ່ຍິງ ແລະ ເດັກ, ການສົ່ງເສີມສິດສະເໝີພາບຍິງ-ຊາຍ ແລະ ການຕ້ານການໃຊ້ຄວາມຮຸນແຮງຕໍ່ແມ່ຍິງ ແລະ ເດັກ ໃຫ້ເປັນຮູບປະທໍາຂື້ນເທື່ອລະກ້າວ ເພື່ອສາມາດປະກອບສ່ວນເຂົ້າໃນການແກ້ໄຂປາກົດການຫຍໍ້ທໍ້ໃນສັງຄົມ. ເຖິງແມ່ນວ່າໃນໄລຍະຜ່ານມາ, ລັດຖະບານເຮົາໄດ້ເອົາໃຈໃສ່ຕໍ່ການປົກປ້ອງສິດ ແລະ ຜົນປະໂຫຍດອັນ

ຊອບທໍາຂອງແມ່ຍິງ ແລະ ເດັກ, ແຕ່ບັນຫາດັ່ງກ່າວນີ້ຍັງບໍ່ທັນໄດ້ຮັບການແກ້ໄຂໄດ້ທັງໝົດຕາມຈິດໃຈນະໂຍບາຍຂອງພັກວາງອອກ, ຊຶ່ງສະແດງອອກໃຫ້ເຫັນວ່າໃນສັງຄົມຍັງມີບາງຄົນ, ກຸ່ມຄົນຍັງຖືວ່າການໃຊ້ຄວາມຮຸນແຮງຕໍ່ແມ່ຍິງ ແລະ ເດັກ ເປັນເລື່ອງທໍາມະດາ, ເປັນເລື່ອງປົກະຕິ ແລະ ເປັນເລື່ອງສ່ວນຕົວໃນຄອບຄົວຂອງເຂົາເຈົ້າເອງ. ອັນນີ້ມັນເປັນບັນຫາທີ່ຕ້ອງໃຊ້ຄວາມລະອຽດອ່ອນພໍສົມຄວນ ແລະ ເປັນວຽກງານໜຶ່ງທີ່ສໍາຄັນສໍາລັບ ສສຊ ເພດຍິງ ກໍຄືສະມາຊິກສະພາປະຊາຊົນເພດຍິງ, ນະຄອນຫລວງ ທີ່ຕ້ອງໄດ້ສືບຕໍ່ເອົາໃຈໃສ່ຂຶ້ນຕື່ມໃນວຽກງານການຕິດຕາມກວດກາ ແລະ ຊຸກຍູ້ໃຫ້ມີຄວາມເຂັ້ມແຂງ ແລະ ມີຈຸດສຸມ.