ສະຖານທູດຈີນສະຫລອງວັນສ້າງຕັ້ງກອງທັບ ສປ ຈີນ ຄົບຮອບ 89 ປີ

          ວັນທີ 28 ກໍລະກົດນີ້, ສະຖານທູດຈີນ ປະຈຳລາວ ໄດ້ຈັດງານລ້ຽງສະເຫລີມສະຫລອງວັນສ້າງຕັ້ງກອງທັບປົດປ່ອຍປະຊາຊົນຈີນ ຄົບຮອບ 89 ປີ (1/8/1927-1/8/2016) ຂຶ້ນທີ່ສະຖານ ທູດຂອງຕົນໃນນະຄອນຫລວງວຽງຈັນໂດຍການເຂົ້າຮ່ວມຂອງທ່ານ ພົນໂທ  ຈັນສະໝອນ ຈັນຍາລາດ ກຳມະການກົມການເມືອງສູນການພັກ ລັດຖະມົນຕີກະຊວງປ້ອງກັນປະເທດ, ທ່ານ ກວນ ຮວາປິງ ເອກອັກຄະລັດຖະທູດວິສາມັນ ຜູ້ມີອຳນາດເຕັມ ແຫ່ງ ສປ ຈີນ ປະຈຳ ລາວ ແລະ ຊາວຈີນ ທີ່ອາໄສຢູ່ລາວເຂົ້າຮ່ວມເປັນຈໍານວນຫລາຍ.

           ທ່ານ ເຊີນຍົງຈິງ ທູດທະຫານບົກ, ເຮືອ, ອາກາດ ຈີນ ປະຈຳ ສປປ ລາວ ໄດ້ຍົກໃຫ້ເຫັນປະ ຫວັດ ຄວາມເປັນມາ ແລະ ການເຕີບໃຫຍ່ຂະຫຍາຍຕົວ ຂອງກອງທັບປົດປ່ອຍປະຊາຊົນຈີນ ໃນຕະ

ຫລອດໄລຍະ 89 ປີ ຜ່ານມາ, ກໍຄື  ສອງກອງທັບ ຈີນ-ລາວ ໄດ້ຜູກມິດຕະພາບອັນເລິກເຊິ່ງ ເສຍສະ ຫລະເລືອດເນື້ອ ໃນການສູ້ຮົບ ຮ່ວມກັນ ເພື່ອຕໍ່ສູ້ຕ້ານການຮຸກຮານຈາກປະເທດພາຍນອກ ພາຍໃຕ້ການຊີ້ນຳ-ນຳພາ ອັນສະຫລາດສ່ອງໃສ ແລະ ຊຸກຍູ້ຢ່າງຕັ້ງໜ້າ ຂອງການນຳສອງພັກ-ສອງລັດ ແລະ ສອງກອງທັບ ຈີນ-ລາວ ຈົນສາມາດຍາດໄດ້ໄຊຊະນະຮ່ວມກັນ.

          ທ່ານ  ເຊີນຍົງຈິງ ໃຫ້ຮູ້ຕ່ືມວ່າ: ກອງທັບປົດປ່ອຍປະຊາຊົນຈີນ ໄດ້ເຂົ້າຮ່ວມສົງຄາມຕ້ານຟາດສິດຂອງໂລກ, ເຂົ້າຮ່ວມກິດຈະກຳຮັກສາສັນຕິພາບຂອງສະຫະປະຊາຊາດ, ຮ່ວມມືຕ້ານກໍ່ການຮ້າຍສາກົນ, ການປ້ອງກັນການເດີນເຮືອ ແລະ ການກູ້ໄພຂອງສາກົນ ແລະ ອື່ນໆ, ໄດ້ລົງເລິກການແລກປ່ຽນ ແລະ ການຮ່ວມມືກັບກອງທັບຂອງບັນດາປະເທດຕ່າງໆ, ຮ່ວມກັນສ້າງສະພາບແວດລ້ອມຄວາມໝັ້ນຄົງສາກົນ, ປະກອບສ່ວນອັນສຳຄັນ ເຂົ້າໃນການຮັກສາສັນຕິພາບຂອງໂລກ.