ລາວສະຫລອງວັນສາກົນຕ້ານການຄ້າມະນຸດຂຶ້ນຢ່າງຟົດຟື້ນ

          ເຊົ້າຂອງວັນທີ 30 ກໍລະກົດຜ່ານມານີ້, ໄດ້ມີພິທີໂຮມຊຸມນຸມ ແລະ ຍ່າງເພື່ອ ສຸຂະພາບ ເພື່ອສະເຫລີມສະຫລອງວັນສາກົນຕ້ານການຄ້າມະນຸດຄົບຮອບ 16 ປີ, ຂຶ້ນທີ່ນະຄອນຫລວງວຽງຈັນ, ໂດຍການເຂົ້າຮ່ວມຂອງທ່ານ ບຸນທອງ ຈິດມະນີ ຮອງນາຍົກລັດຖະມົນຕີ, ມີບັນດາລັດຖະມົນຕີ, ຮອງລັດຖະມົນຕີ, ທູຕານຸທູດ ແລະ ຜູ້ຕາງໜ້າອົງການຈັດຕັ້ງສາກົນ ປະຈຳລາວ ພ້ອມດ້ວຍຊາວນະຄອນຫລວງວຽງຈັນເຂົ້າຮ່ວມເປັນຈຳນວນຫລາຍ.

          ທ່ານຮອງນາຍົກລັດຖະມົນຕີ ກ່າວໃນພິທີວ່າ: ການຄ້າມະນຸດ ແມ່ນອາຊະຍາກຳ ໜຶ່ງ ທີ່ເກີດຂຶ້ນຢູ່ໃນສັງຄົມ ແລະ ມີລັກສະນະຂ້າມຊາດ, ຊຶ່ງລະເມີດສິດທິພື້ນຖານຂອງພົນລະເມືອງຕາມທີ່ໄດ້ກຳນົດໄວ້ໃນລັດຖະທຳມະນູນ ແລະ ກົດໝາຍ ກໍຄືສົນທິສັນຍາສາກົນ ທີ່ ສປປ ລາວ ໄດ້ເຂົ້າເປັນພາຄີ, ຊຶ່ງໄດ້ສົ່ງຜົນກະທົບໜັກໜ່ວງຕໍ່ການພັດທະນາເສດຖະກິດ-ສັງຄົມ, ສະຖຽນລະພາບ

ແລະ ຄວາມໝັ້ນຄົງຂອງປະເທດອີກດ້ວຍ, ສຳລັບ ສປປ ລາວແລ້ວ, ຍາມໃດພັກ ແລະ ລັດຖະບານ ກໍໃຫ້ຄວາມສຳຄັນຕໍ່ການສະກັດກັ້ນ ແລະ ຕ້ານການຄ້າມະນຸດ, ໂດຍໄດ້ວາງແນວທາງນະໂຍບາຍ, ກົດໝາຍ ແລະ ລະບຽບການຕ່າງໆເປັນອັນສະເພາະ, ລວມທັງສະໜອງງົບປະມນ ເພື່ອຈັດຕັ້ງປະຕິບັດວຽກງານດັ່ງກ່າວໃຫ້ມີຜົນ, ພ້ອມນີ້ ສປປ ລາວ ຍັງໄດ້ເຂົ້າເປັນພາຄີ ແລະ ໃຫ້ສັດຕະຍາບັນຕໍ່ສົນທິສັນຍາສາກົນຫລາຍສະບັບທີ່ກ່ຽວຂ້ອງກັບການຕ້ານການຄ້າມະນຸດ, ເປັນຕົ້ນ ແມ່ນສົນທິສັນຍາວ່າດ້ວຍສິທິມະນຸດ, ສົນທິສັນຍາວ່າດ້ວຍການຕ້ານອາຊະຍາກຳຂ້າມຊາດແບບມີການຈັດຕັ້ງ, ສົນທິສັນວ່າດ້ວຍແຮງງານ, ສົນທິສັນຍາວ່າດ້ວຍການລົບລ້າງການເປັນຂ້າທາດ, ການຄ້າຂາຍຜູ້ເປັນທາດ ແລະ ສະຖາບັນ ແລະ ການກະທຳທີ່ມີລັກສະນະຄ້າຍຄືທາດ, ສົນທິສັນຍາວ່າດ້ວຍການລົບລ້າງທຸກຮູບແບບການຈຳແນກຕໍ່ແມ່ຍິງ, ສົນທິສັນຍາວ່າດ້ວຍສິດທິເດັກ, ອານຸສັນຍາວ່າດ້ວຍການສະກັດກັ້ນ, ປາບປາມ ແລະ ລົງໂທດການຄ້າມະນຸດ, ໂດຍສະເພາະແມ່ຍິງ ແລະ ເດັກນ້ອຍ.

          ທ່ານຮອງນາຍົກ ເນັ້ນຕື່ມວ່າ: ໃຫ້ຖືເອົາການປ້ອງກັນ ແລະ ສະກັດກັ້ນການຄ້າມະນຸດ ເປັນອັນຕົ້ນຕໍ ເພື່ອໂຄສະນາປູກຈິດສຳນຶກໃຫ້ທົ່ວສັງຄົມ ເຫັນໄດ້ເຖິງຜົນຮ້າຍ ແລະ ຄວາມອັນຕະລາຍຂອງການຄ້າມະນຸດ ເພື່ອໃຫ້ມີສະຕິລະວັງຕົວ ບໍ່ໃຫ້ຕົກເປັນເຫຍື່ອ ຫລື ຜູ້ຖືກເຄາະຮ້າຍຂອງການຄ້າມະນຸດ; ສ້າງ ແລະ ປັບປຸງນິຕິກຳລະບອບ, ລະບຽບການ, ກົນໄກການຈັດຕັ້ງທີ່ຮັບຜິດຊອບວຽກງານສະກັດກັ້ນ ແລະ ຕ້ານການຄ້າມະນຸດໃຫ້ລະອຽດຈະແຈ້ງ ແລະ ຮັດກຸມ; ຍົກສູງຄວາມຮັບຜິດຊອບຂອງການຈັດຕັ້ງ, ຊຸມຊົນ, ຄອບຄົວ, ບຸກຄົນຕໍ່ວຽກງານສະກັດກັ້ນ ແລະ ຕ້ານການຄ້າມະນຸດໃນຂອບເຂດທົ່ວປະເທດ; ເອົາໃຈໃສ່ຕໍ່ການປົກປ້ອງຜູ້ຖືກເຄາະຮ້າຍຈາກການຄ້າມະນຸດໃຫ້ທັນເວລາ, ໂດຍຖືເອົາຜູ້ຖືກເຄາະຮ້າຍເປັນໃຈກາງ ເພື່ອຮັບປະກັນໃຫ້ເຂົາເຈົ້າໄດ້ຮັບການຊ່ວຍເຫລືອ ເປັນຕົ້ນ ທີ່ພັກເຊົາ, ທີ່ປຶກສາດ້ານກົດໝາຍ, ການແພດ, ການສຶກສາ ແລະ ການຝືກອົບຮົມວິຊາຊີບ, ດ້ານເສດຖະກິດ ແລະ ການກັບຄືນສູ່ຄອບຄົວ ແລະ ສັງຄົມຕາມທີ່ໄດ້ກຳນົດໄວ້ໃນກົດໝາຍ; ຖືເອົາການດຳເນີນຄະດີ ເປັນອັນສຳຄັນເພື່ອນຳເອົາຜູ້ກະທຳຜິດສະຖານການຄ້າມະນຸດມາລົງໂທດຕາມກົດໝາຍຢ່າງເຂັ້ມງວດ ລວມທັງຄ່າທົດແທນທາງແພ່ງໃຫ້ກັບຜູ້ຖືກເຄາະຮ້າຍ; ສືບຕໍ່ການພົວພັນຮ່ວມມືກັບປະເທດຕ່າງໆໃນໂລກ, ອົງການຈັດຕັ້ງອື່ນໆ ກ່ຽວກັບການສ້າງຄວາມເຂັ້ມແຂງໃຫ້ແກ່ເຈົ້າໜ້າທີ່, ການແລກປ່ຽນບົດຮຽນ, ຂໍ້ມູນຂ່າວສານ ແລະ ເຕັກໂນໂລຊີ ກ່ຽວກັບການຕ້ານການຄ້າມະນຸດ, ການປົກປ້ອງຊ່ວຍເຫລືອຜູ້ຖືກເຄາະຮ້າຍ ລວມທັງການຊ່ວຍເຫລືອເຊິ່ງກັນ ແລະ ກັນທາງດ້ານກົດໝາຍ ເພື່ອຕອບໂຕອາຊະຍາກຳຄ້າມະນຸດໃຫ້ມີປະສິດທິຜົນຫລາຍກວ່າເກົ່າ.