ກອງປະຊຸມລັດຖະມົນຕີເສດຖະກິດອາຊຽນ ຈະມີຂຶ້ນແຕ່ວັນທີ 1-6 ສິງຫານີ້ ທີ່ນະຄອນຫລວງວຽງຈັນ

          ໃນລະຫວ່າງວັນທີ 1-6 ສິງຫານີ້, ທ່ານນາງ ເຂັມມະນີ ພົນເສນາ ລັດຖະມົນຕີກະຊວງອຸດ ສາຫະກຳ ແລະ ການຄ້າ, ທັງເປັນລັດຖະມົນຕີເສດຖະກິດອາຊຽນຂອງ ສປປ ລາວ, ໃນນາມປະທານກອງປະຊຸມລັດຖະມົນຕີເສດຖະກິດອາຊຽນ ຈະເປັນເຈົ້າພາບຈັດກອງປະຊຸມລັດຖະມົນຕີເສດຖະກິດອາຊຽນຄັ້ງທີ 48 (AEM), ກອງປະຊຸມສະພາເຂດການຄ້າເສລີອາຊຽນ (ASEAN Free Trade Area Council Meeting) ຄັ້ງທີ 30, ກອງປະຊຸມສະພາການລົງທຶນອາຊຽນ (ASEAN Investment Agreement) ຄັ້ງທີ 19 ແລະ ກອງປະຊຸມທີ່ກ່ຽວຂ້ອງອື່ນໆ, ໂດຍສະເພາະໃນວັນທີ 5 ສິງຫາຈະເຖິງນີ້, ຈະມີກອງປະຊຸມລັດຖະມົນຕີການຄ້າຮອບດ້ານລະດັບພາກ

ພື້ນ (RCEP) ຄັ້ງທີ 4 ແລະ ໃນວັນທີ 6 ສິງຫາ ແມ່ນກອງປະຊຸມລັດຖະມົນຕີເສດຖະກິດອາຊຽນໃໝ່ ກຳປູເຈຍ, ລາວ, ມຽນມາ ແລະ ຫວຽດນາມ ຄັ້ງທີ 8 (8TH CLMV Economic Ministers Meeting) ລວມທັງໝົດ 22 ກອງປະຊຸມ, ຊຶ່ງຈະຈັດຂຶ້ນທີ່ນະຄອນຫລວງວຽງຈັນ, ສປປ ລາວ ຫລັງຈາກນັ້ນ ຈະມີການຖະແຫລງຂ່າວຜົນສຳເລັດຂອງກອງປະຊຸມໃນວາລະສຸດທ້າຍຂອງກອງປະຊຸມຄືໃນວັນທີ 6 ສິງຫາ 2016. ນອກນັ້ນ ໃນໄລຍະດັ່ງກ່າວ ຍັງຈະມີງານວາງສະແດງສິນຄ້າຈາກພາກທຸລະກິດ ແລະ ມີ 3 ກິດຈະກຳ ຊຶ່ງເປັນເວທີພົບປະລະຫວ່າງພາກລັດ ແລະ ພາກທຸລະກິດ ໂດຍສະເພາະແມ່ນກອງປະຊຸມເວທີການປຶກສາຫາລືຂອງການເປັນຜູ້ນຳ (ASEAN Leadership Forum) ຄັ້ງທີ 13 ໂດຍເປັນກຽດເຂົ້າຮ່ວມ ແລະ ກ່າວເປີດກອງປະຊຸມດັ່ງກ່າວ ໂດຍທ່ານນາຍົກລັດຖະມົນຕີ ແຫ່ງ ສປປ ລາວ.

          ກອງປະຊຸມລັດຖະມົນຕີເສດຖະກິດອາຊຽນຄັ້ງທີ 48 ຈະໄດ້ສືບຕໍ່ປຶກສາຫາລື ແລະ ຕິດຕາມ ກ່ຽວກັບບັນຫາຕ່າງໆທີ່ໄດ້ມີການປຶກສາຫາລືໃນກອງປະຊຸມລັດຖະມົນຕີເສດຖະກິດອາຊຽນແບບວົງແຄບ ຄັ້ງທີ 22 ຊຶ່ງໄດ້ຈັດຂຶ້ນໃນເດືອນມີນາ 2016, ທີ່ຊຽງໃໝ່ ປະເທດໄທ ບັນດາລັດຖະມົນຕີເສດຖະກິດອາຊຽນ ຍັງຈະໄດ້ສຸມໃສ່ປຶກສາຫາລື 8 ແຜນງານບູລິມະສິດ ສຳລັບເສົາຄ້ຳເສດຖະກິດ ຊຶ່ງຄາດວ່າໃນກອງປະຊຸມ AEM ຄັ້ງທີ 48 ນີ້ຈະໄດ້ຮັບຮອງເອົາ 8 ແຜນວຽກບູລິມະສິດດັ່ງກ່າວ, ພ້ອມນີ້ ບັນດາລັດຖະມົນຕີຍັງຈະໄດ້ປຶກສາຫາລືກ່ຽວກັບບັນດາມາດຕະການ ສ້າງປະຊາຄົມເສດຖະ ກິດອາຊຽນ 2015, ວາງແຜນ ແລະ ກຳນົດທິດທາງການຈັດຕັ້ງປະຕິບັດແຜນງານປະຊາຄົມເສດຖະ ກິດອາຊຽນ 2025. ໃນກອງປະຊຸມລັດຖະມົນຕີເສດຖະກິດອາຊຽນ ຄາດວ່າຈະຮັບຮອງເອົາເອກກະສານສຳຄັນຂອງອາຊຽນ ແລະ ອາຊຽນກັບຄູ່ຮ່ວມເຈລະນາ ແລະ ທິດທາງການຮ່ວມມືໃນຕໍ່ໜ້າ.

          ກ່ອນກອງປະຊຸມລັດຖະມົນຕີເສດຖະກິດອາຊຽນ ຄັ້ງທີ 48 ແລະ ກອງປະຊຸມອື່ນໆທີ່ກ່ຽວ ຂ້ອງ ຈະມີກອງປະຊຸມກະກຽມໃຫ້ແກ່ກອງປະຊຸມລັດຖະມົນຕີເສດຖະກິດອາຊຽນ (Preparetory SEOM Meeting) ແລະ ກອງປະຊຸມກະກຽມໃຫ້ແກ່ກອງປະຊຸມລະດັບລັດຖະມົນຕີປະເທດສະມາ ຊິກອາຊຽນໃໝ່ (Prepareatory CLMV SEOM Meeting) ໃນລະຫວ່າງວັນທີ 1-2 ສິງຫານີ້. ທີ່ນະຄອນຫລວງວຽງຈັນ.

          ພິທີຖະແຫລງຂ່າວກ່ຽວກັບການກະກຽມຄວາມພ້ອມ ຈັດກອງປະຊຸມດັ່ງກ່າວມີຂຶ້ນໃນຕອນແລງຂອງວັນທີ 31 ກໍລະກົດນີ້, ທີ່ໂຮງແຮມ ດອນຈັນ ພາເລດ ນະຄອນຫລວງວຽງຈັນ, ໂດຍທ່ານ ລາວຮົວ ເຈີຈິງ ຫົວໜ້າກົມນະໂຍບາຍການຄ້າຕ່າງປະເທດ ກະຊວງອຸດສາຫະກຳ ແລະ ການຄ້າ.