ອຸຕຸເຕືອນໃຫ້ລະວັງພະຍຸນິດາກຳລັງເຄື່ອນເຂົ້າມາລາວ

ກົມອຸຕຸນິຍົມ ແລະ ອຸທົກກະສາດ ໃຫ້ຮູ້ວ່າ: ໃນຕອນບ່າຍຂອງວັນທີ 1 ສິງຫານີ້, ພະຍຸເຂດຮ້ອນ ນິດາ (Nida) ຫົວທີ 4 ປະຈຳປີ 2016, ໄດ້ມີສູນກາງຢູ່ເສັ້ນຂະໜານທີ່ 21,3 ອົງສາເໜືອ ແລະ ເສັ້ນແວງ 117,4 ອົງສາຕາເວັນອອກ, ພວມເຄື່ອນທີ່ໄປທາງ ທິດຕາເວັນຕົກ-ຕາເວັນຕົກສ່ຽງເໜືອດ້ວຍຄວາມໄວ 30 ກິໂລແມັດຕໍ່ຊົ່ວໂມງ, ພະຍຸຫົວນີ້ ຈະເຄື່ອນເຂົ້າຝັ່ງທາງຕອນໃຕ້ຂອງປະເທດຈີນໃນວັນທີ 2-3 ສິງຫານີ້, ຊຶ່ງຈະເຮັດໃຫ້ມີ ຝົນຕົກຟ້າຄະນອງ ພ້ອມມີລົມພັດແຮງຢູ່ບາງທ້ອງຖິ່ນບັນດາແຂວງພາກເໜືອຫາພາກກາງ ແລະ ພາກໃຕ້ຂອງລາວໃນໄລຍະ 2 ວັນຂ້າງໜ້າ, ໂດຍສະເພາະແຂວງຜົ້ງສາລີ, ຫົວພັນ, ຊຽງຂວາງ, ອຸດົມໄຊ,

ຫລວງນ້ຳທາ, ໄຊຍະບູລີ, ແຂວງວຽງຈັນ, ນະຄອນຫລວງວຽງຈັນ, ໄຊສົມບູນ, ບໍລິຄຳໄຊ, ຄຳມ່ວນ, ສະຫວັນນະເຂດ, ສາລະວັນ, ຈຳປາສັກ ແລະ ເຊກອງ, ດັ່ງນັ້ນ ຈຶ່ງເຕືອນ ປະຊາຊົນຜູ້ທີ່ອາໃສຢູ່ເຂດທ້ອງຖິ່ນດັ່ງກ່າວ ຈົ່ງມີສະຕິຕໍ່ສະພາບດິນຟ້າອາກາດ, ຝົນຕົກ ໜັກ, ລົມພັດແຮງ, ຊຶ່ງອາດເຮັດໃຫ້ມີນ້ຳປ່າໄຫລຊຸແຮງ, ນ້ຳຖ້ວມຂັງ ແລະ ສະພາບດິນເຈື່ອນອີກດ້ວຍ.