ສູນປະກັນຄຸນນະພາບການສຶກສາໃຫ້ຮູ້ວ່າ: ພາຍຫລັງກະຊວງສຶກສາທິການ ແລະ ກິລາ, ໄດ້ກຳນົດຍຸດທະສາດການພັດທະນາການສຶກສາ ແລະກິລາຮອດປີ
2025 ຄື:
ພັດທະນາລະບົບການສຶກສາເພື່ອສ້າງຊັບພະຍາກອນມະນຸດໃຫ້ມີຄວາມຮູ້, ມີຄວາມສາມາດ, ມີຄຸນສົມບັດສິນທຳປະຕິວັດ ແລະ ມີຄ່ານິຍົມທີ່ຖືກຕ້ອງ, ມີນ້ຳໃຈຮັກປະເທດຊາດ, ຊື່ສັດບໍລິສຸດ, ມີລະບຽບວິໄນ, ມີສຸຂະພາບທາງດ້ານຮ່າງກາຍ ແລະຈິດໃຈດີ, ມີຄວາມສາມັກຄີພາຍໃນຊາດ, ມີຄວາມຮັກຕໍ່ການຮຽນຮູ້ຕະຫລອດຊີວິດ, ມີຄ່ານິຍົມຕໍ່ປະເພນີອັນດີງາມຂອງຊາດ, ຮັກຄວາມກ້າວໜ້າ ແລະ ມີວິທະຍາສາດ ເພື່ອໃຫ້ກາຍເປັນກຳລັງແຮງງານທີ່ມີຄຸນນະພາບ, ສອດຄ່ອງ ແລະທັງສາມາດຕອບສະໜອງຄວາມຕ້ອງການຂອງການຂະຫຍາຍຕົວທາງດ້ານເສດຖະກິດຂອງຊາດທີ່ຍືນຍົງ, ມີຄວາມພ້ອມທີ່ຈະຮ່ວມມື ແລະ ແຂ່ງຂັນກັບບັນດາປະເທດໃນພາກພື້ນ ແລະການນຳໃຊ້ຊັບພະຍາກອນໃຫ້ມີປະສິດທິພາບ. ສະນັ້ນ ການປັບປຸງລະບົບການສຶກສາຈຶ່ງເລີ່ມຈາກການບຸກທະລຸຫັນປ່ຽນດ້ານຄຸນນະພາບການສຶກສາແບບຮອບດ້ານຄື: ຫັນປ່ຽນຈາກການສຶກສາແບບໃຫ້ຄວາມຮູ້ເປັນຕົ້ນຕໍມາເປັນການສຶກສາທີ່ເນັ້ນເຖິງສ້າງຄົນແບບຮອບດ້ານຕາມ 5 ຫລັກມູນການສຶກສາຂອງພັກວາງອອກ, ສົ່ງເສີມການສຶກສາຕະຫລອດຊີວິດ, ນຳໃຊ້ເຕັກ
ໂນໂລຊີເຂົ້າໃນການສຶກສາໃນທຸກຊັ້ນທຸກສາຍ, ຊຶ່ງການສ້າງຄົນໄປຕາມ 5 ຫລັກມູນນີ້ມັນເຮັດໃຫ້ທຸກຂະແໜງການໃນທົ່ວສັງຄົມມີຄວາມຕື່ນຕົວປະກອບສ່ວນຢ່າງແໜ້ນແຟ້ນເຂົ້າໃນການພັດທະນາການສຶກສາ, ນອກຈາກນີ້, ການສຶກສາຈາກການຮຽນແບບຈົດຈຳຄຳສອນຂອງຄູ, ປາກເວົ້າ ແລະຂຽນຕາມແນວຄວາມຄິດຂອງຄູຫັນປ່ຽນມາເປັນການສົ່ງເສີມໃຫ້ນັກຮຽນມີການຄົ້ນຄິດຈິນຕະນາການເປັນເອກະລາດ ແລະການປະດິດສ້າງຂອງຜູ້ຮຽນ ແລະ ເປົ້າໝາຍສຸດທ້າຍແມ່ນສ້າງບຸກຄະລາກອນຂອງຊາດໃຫ້ມີຄຸນນະພາບ.ດັ່ງນັ້ນເພື່ອຄວບຄຸມຄຸນນະພາບການສຶກສາໃຫ້ໄປຕາມ 5 ຫລັກມູນທີ່ພັກວາງອອກນັ້ນ, ກະຊວງສືກສາທິການແລະກິລາ,ໄດ້ອະນຸມັດໃຫ້ມີລະບົບປະກັນຄຸນນະພາບການສຶກສາເພື່ອເປັນບ່ອນອີງ ແລະ ເປັນທິດທາງໃຫ້ພາກສ່ວນທີ່ກ່ຽວຂ້ອງໄດ້ພັດທະນາມາດຕະຖານຂອງຄຸນນະພາບການສຶກສາ, ພັດທະນາລະບົບກົນໄກການປະເມີນ ແລະຮັບຮອງຄຸນນະພາບການສຶກສາໃຫ້ທຸກຊັ້ນທຸກສາຍທັງພາກລັດ ແລະພາກເອກະຊົນໃຫ້ມີປະສິດທິພາບ ແລະສອດຄ່ອງກັບແຜນປະຕິຮູບລະບົບການສຶກສາແຫ່ງຊາດ, ລວມໄປເຖິງເປັນບ່ອນອີງໃນການປັບປຸງບັນດານິຕິກຳ
ເພື່ອຮັບປະກັນການສະໜອງຄູສອນ ແລະສະໜອງງົບປະມານໃຫ້ກັບໂຮງຮຽນເພື່ອການພັດທະນາຄຸນນະພາບທີ່ຍືນຍົງ. ຊຶ່ງໄດ້ສະແດງອອກໃນກົດໝາຍການສຶກສາສະບັບປັບປຸງ ແລະດຳລັດນາຍົກລັດຖະມົນຕີວ່າດ້ວຍການສຶກສາຊັ້ນສູງ, ມີການປັບປຸງສະຖານການສຶກສາໃຫ້ໄດ້ຕາມມາດຕະຖານອີງຕາມເງື່ອນໄຂຄື: ຄູສອນ, ຜູ້ບໍລິຫານ, ຂະບວນການຮຽນ-ການສອນ, “ຜົນການຮຽນຮູ້ຂອງຜູ້ຮຽນ, ຫລັກສູດ, ອາຄານສະຖານທີ່, ສິ່ງອຳນວຍຄວາມສະດວກ ແລະອື່ນໆ. ນອກຈາກນີ້, ຍັງໄດ້ມີການຮັບຮອງຄຸນນະພາບສຳລັບສະຖານການສຶກສາທີ່ໄດ້ມາດຕະຖານການສຶກສາແຫ່ງຊາດ, ຂອງພາກພື້ນ ແລະສາກົນ,ເພື່ອສ້າງຄວາມເຊື່ອໝັ້ນດ້ານຄຸນນະພາບຂອງສະຖານສຶກສາຕໍ່ສັງຄົມ ແລະທັງເປັນເງື່ອນໄຂໃຫ້ການສຶກສາລາວມີການພັດທະນາ, ແນໃສ່ປັບປຸງລະບົບການສຶກສາແຫ່ງຊາດໃຫ້ໜັກແໜ້ນ ແລະມີການຂະຫຍາຍຕົວຮອບດ້ານ, ມີຄຸນນະພາບດີຂຶ້ນ ແລະ ຫຍັບມໍ່ກັບມາດຕະຖານພາກພື້ນ ແລະ ສາກົນເທື່ອລະກ້າວ, ປະກອບສ່ວນຢ່າງຕັ້ງໜ້າເຂົ້າໃນແຜນພັດທະນາເສດຖະກິດ-ສັງຄົມແຕ່ນີ້ຮອດປີ
2020, ສ້າງຄວາມໝັ້ນໃຈໃຫ້ກັບປະເທດຊາດກໍຄືລູກຫລານພວກເຮົາໃນອະນາຄົດວ່າ: ລະບົບການສຶກສາຂອງລາວສາມາດຮັບປະກັນການສ້າງຊັບພະຍາກອນມະນຸດຢ່າງມີຄຸນນະພາບ
ເພື່ອປະກອບສ່ວນເຂົ້າໃນການພັດທະນາປະເທດຊາດຢ່າງບໍ່ຢຸດຢັ້ງ.
No comments:
Post a Comment