ທ່ານ ສາສະດາຈານ ດຣ. ເອກສະຫວ່າງ ວົງວິຈິດ
ລັດຖະມົນຕີວ່າການກະຊວງສາທາລະນະສຸກ ໃຫ້ຮູ້ເມື່ອບໍ່ດົນມານີ້ວ່າ: ໃນສົກປີ
2013 ນີ້, ກະຊວງສາທາ ລະນະສຸກຈະເລັ່ງປະຕິບັດແຜນປະຕິຮູບຍຸດທະສາດສຳຄັນດ້ານພັດທະນາຊັບພະຍາກອນມະນຸດ,
ການເງິນສາທາລະນະສຸກ, ການ ຈັດຕັ້ງ, ຄຸ້ມຄອງບໍລິຫານ ແລະ ແບບແຜນວິທີການເຮັດວຽກ,
ການບໍລິການ ແລະ ຂໍ້ມູນຂ່າວ ສານ, ຕິດຕາມ ແລະ ປະເມີນຜົນ.
ທ່ານລັດຖະມົນຕີວ່າການກະ ຊວງສາທາລະນະສຸກ
ກ່າວວ່າ: ການພັດທະນາຊັບພະຍາກອນມະນຸດຖືວ່າປັດຈຸບັນໃນທົ່ວຂະແໜງການມີພະນັກງານລັດຖະ
ກອນ 14 ພັນກວ່າຄົນ, ໃນນັ້ນ ມີປະມານ 11 ພັນກວ່າຄົນ ເຮັດວຽກວິຊາສະເພາະໃນສະຖານບໍລິການ.
ສະນັ້ນ ຍັງເຫັນວ່າມີຄວາມຂາດເຂີນຫລາຍ ໂດຍສະເພາະຢູ່ຮາກ
ຖານ. ດັ່ງນັ້ນ ຈຶ່ງເຮັດໃຫ້ການບໍລິການສຸຂະພາບແກ່ປະຊາຊົນຍັງບໍ່ທັນຮັບປະກັນດ້ານຄຸນນະພາບ
ແລະ ທົ່ວເຖິງ ໂດຍໃນປີ 2013 ຈຶ່ງຂໍໂກຕາລັດ ຖະກອນໃນຈຳນວນ 5.982 ຄົນ ເພື່ອປະກອບໃຫ້ໂຮງໝໍເມືອງ,
ສຸກສາລາ ແລະ ບ້ານ.
ດ້ານການເງິນໃນປັດຈຸບັນ ຄວາມຕ້ອງການຕອບສະໜອງງົບປະມານຍັງຈຳກັດ,
ຍັງອາໄສການຊ່ວຍເຫລືອສາກົນ. ໂຮງໝໍບໍ່ມີງົບປະມານບໍລິຫານພຽງພໍ ເຊິ່ງ ຜ່ານມານຳໃຊ້ເງິນຈາກທຶນໝູນ
ວຽນຢາ. ການລົງທຶນເອກະຊົນຫາກໍຢູ່ໃນຂັ້ນເລີ່ມຕົ້ນ ເພື່ອປະຕິ ບັດທິດນຳໃນການຮັບປະກັນໃຫ້ປະຊາຊົນ
ໂດຍສະເພາະຜູ້ທຸກຍາກສາມາດເຂົ້າເຖິງການບໍລິ ການສຸຂະພາບ, ຈຳເປັນຕ້ອງໄດ້ສ້າງການປະກັນສຸຂະພາບທຸກຖ້ວນໜ້າ.
ປັດຈຸບັນ, ລະບົບປະ ກັນສຸຂະພາບຢູ່ ສປປ ລາວ ໄດ້ແບ່ງອອກເປັນ 4 ລະບົບຄື 1. ອົງ ການປະກັນພາກລັດຖະກອນ
(ອປລ). 2. ອົງການປະກັນສັງຄົມ (ອປສ). 3. ລະບົບປະກັນສຸຂະ ພາບຊຸມຊົນ (ກປສຊ) ແລະ
4. ກອງທຶນຊ່ວຍເຫລືອຜູ້ທຸກຍາກດ້ານສຸຂະພາບ (ກສທ). ປັດຈຸບັນ ອປລ ແລະ ອປສ ແມ່ນຢູ່ພາຍໃຕ້ການບໍລິຫານຄຸ້ມຄອງໂດຍກະ
ຊວງແຮງງານ ແລະ ສະຫວັດດີການສັງຄົມ. ສ່ວນ ກປສຊ ແລະ ກທສ ແມ່ນຂຶ້ນກັບກະຊວງສາ
ທາລະນະສຸກ. ລະບົບປະກັນສຸຂະ ພາບທັງໝົດ ປັດຈຸບັນກວມໄດ້ 22% ຂອງພົນລະເມືອງ ເນື່ອງຈາກວ່າລະບົບການປະກັນສຸຂະ
ພາບໃນປັດຈຸບັນຍັງມີລັກສະນະກະແຈກກະຈາຍ, ບໍ່ມີກຳລັງແຮງໃຫ້ການຂະຫຍາຍຕົວ
ແລະ ຍັງບໍ່ທັນສາມາດສ້າງຄວາມເພິ່ງພໍໃຈໃຫ້ແກ່ສະມາຊິກເມື່ອມາຮັບບໍລິ ການ.
ດັ່ງນັ້ນ ເຫັນວ່າມີຄວາມຈຳເປັນທີ່ຕ້ອງໄດ້ໂຮມບັນດາລະບົບປະກັນສຸຂະພາບເຂົ້າກັນ
ພາຍໃຕ້ການຄຸ້ມຄອງຂອງຫ້ອງ ການກອງທຶນປະກັນສຸຂະພາບແຫ່ງຊາດ ເພື່ອສ້າງກຳລັງແຮງ,
ແກ້ໄຂບັນດາຂໍ້ຫຍຸ້ງຍາກ ແລະ ສຸມໃສ່ສ້າງລະບົບປະກັນສຸຂະ ພາບທຸກຖ້ວນໜ້າ.
ການປະຕິຮູບດ້ານການຈັດຕັ້ງ, ການຄຸ້ມຄອງບໍລິຫານ
ເຫັນວ່າຕ້ອງແກ້ໄຂບັນຫາແບບແຜນວິທີເຮັດວຽກ ແລະ ການບໍລິຫານທີ່ມີຫລາຍຂັ້ນຕອນ,
ຊັກຊ້າໃຫ້ສະ ດວກວ່ອງໄວ ໂດຍນຳໃຊ້ເຕັກໂນໂລຊີທີ່ທັນສະໄໝຜ່ານປະຕູດຽວ.
ການປະຕິຮູບດ້ານການບໍລິການ ຕາໜ່າງສາທາລະນະສຸກ ເຖິງວ່າທົ່ວເຖິງ, ແຕ່ຄຸນນະພາບບໍລິການຍັງຈຳກັດ
ແລະ ບໍ່ໄດ້ມາດຕະ ຖານ ເປັນຕົ້ນລະດັບພະນັກງານ ແລະ ອຸປະກອນການແພດໃນເຂດຫ່າງໄກສອກຫລີກຍັງຈຳກັດຫລາຍ.
ສະນັ້ນ ເຫັນວ່າການປະຕິຮູບດ້ານການບໍລິການຕ້ອງໄດ້ເຮັດ 2 ດ້ານໄປຄຽງຄູ່ກັນ
ຄືດ້ານຕາໜ່າງການບໍລິການ ແລະ ດ້ານຄຸນນະພາບການບໍລິການ, ຕັດສິນໃຈລະດົມທຶນຈາກລັດ
ແລະ ເອ ກະຊົນທັງພາຍໃນ ແລະ ຕ່າງປະເທດ ເພື່ອກໍ່ສ້າງ-ສ້ອມແປງຕຶກອາຄານສະຖານທີ່
ແລະ ຈັດຊື້ເຄື່ອງມືອຸປະກອນການວິໄຈ ແລະ ປິ່ນປົວ ເພື່ອຫັນບັນດາໂຮງໝໍລັດໃຫ້ທັນສະໄໝ
ໂດຍເລີ່ມຈາກໂຮງ ໝໍສູນກາງ, ສົ່ງເສີມພາກສ່ວນເອກະຊົນລົງທຶນສ້າງໂຮງໝໍເອ ກະຊົນທັງໝົດເຫລົ່ານັ້ນ
ເພື່ອໃຫ້ປະຊາຊົນມີທາງເລືອກ ແລະ ເພື່ອແກ້ໄຂການອອກໄປປິ່ນປົວຂອງປະຊາຊົນຢູ່ຕ່າງປະເທດ.
ດ້ານຂໍ້ມູນຂ່າວສານ, ການຕິດຕາມ ແລະ ການປະເມີນຜົນ.
ປັດຈຸບັນ ການປະສານວິຊາການ, ການຈັດ ຕັ້ງປະຕິບັດ ແລະ ຄຸ້ມຄອງບາງໂຄງການຍັງຊັກຊ້າ,
ລະບົບຂໍ້ມູນຂ່າວສານຍັງບໍ່ທັນຈະແຈ້ງ ແລະ ເຊື່ອຖືໄດ້. ດັ່ງນັ້ນ ກະຊວງສາທາລະນະສຸກ
ເຫັນວ່າຕ້ອງໄດ້ປະຕິຮູບດ້ານລະບົບຂໍ້ມູນຂ່າວສານ, ການຕິດຕາມ ແລະ ປະເມີນຜົນ
ນັບແຕ່ບ້ານຂຶ້ນມາ ໂດຍສະເພາະການເກັບກຳສະຖິຕິການເກີດ, ການຕາຍ, ນ້ຳໜັກ ແລະ
ລວງສູງທີ່ຕິດພັນເປົ້າໝາຍສະຫັດສະວັດ. ຕ້ອງກຳນົດໃຫ້ມີການຕິດຕາມ ແລະ ການປະເມີນຜົນປະສິດທິພາບບັນດາໂຄງການລົງທຶນລັດ
ແລະ ໂຄງການຊ່ວຍເຫລືອຕ່າງໆ. ໃນປີ 2014 ຕ້ອງມີການປະເມີນຜົນການຈັດຕັ້ງປະ
ຕິບັດເປົ້າໝາຍສະຫັດສະວັດ ເພື່ອລາຍງານຕໍ່ລັດຖະບານ.
No comments:
Post a Comment