ກະຊວງແຮງງານຍອມຮັບການພັດທະນາສີມືແຮງງານລາວຊັກຊ້າຈະມີບັນຫາເຊື່ອມໂຍງພາກພື້ນ

      ເຫລືອເວລາບໍ່ເຖິງ 2 ປີ,ການກ້າວ ສູ່ການເປັນປະຊາຄົມອາຊຽນ (AEC) ກໍຈະເລີ່ມຂຶ້ນ,ເວລານັ້ນ ການຍາດ ແຍ່ງແຂ່ງ ຂັນໃນຂະແໜງການຕ່າງໆ ກໍຈະມີຫລາຍຂຶ້ນ ເຊິ່ງເຮັດໃຫ້ທຸກ ພາກສ່ວນທັງພາກລັດ ແລະ ເອກະ ຊົນຕ້ອງໄດ້ສຸມໃສ່ການພັດ ທະນາເພື່ອໃຫ້ສາມາດຮັບມືໃນການເຊື່ອມໂຍງດັ່ງກ່າວ. ແຕ່ຄຽງຄູ່ກັນນັ້ນ ກໍເຫັນວ່າຍັງມີຫລາຍອັນທີ່ຈະເປັນບັນຫາໂດຍສະ ເພາະແມ່ນບັນຫາສີມືແຮງງານ.

       ທ່ານ ຄອນສີ ມະຫາວົງ ຫົວ ໜ້າພະແນກພັດທະນາສີມືແຮງງານກົມພັດທະນາສີມືແຮງງານກະຊວງແຮງງານ ແລະ ສະ ຫວັດດີການສັງຄົມ ໃຫ້ຮູ້ວ່າ: ການພັດ ທະນາສີມືແຮງງານແມ່ນວຽກ ງານໜຶ່ງທີ່ສຳຄັນຂອງແຜນພັດ ທະນາເສດຖະກິດ-ສັງ ຄົມ 5 ປີ ຄັ້ງທີ VII ຂອງລັດຖະບານ ເພື່ອ ເປັນການຮອງຮັບການກ້າວສູ່ການເປັນປະຊາຄົມອາຊຽນໃນປີ 2015 ແລະ ເຫັນ ວ່າໃນໄລຍະ ຜ່ານມາ,ການພັດທະນາສີມືແຮງ ງານນີ້ໄດ້ຈັດຕັ້ງປະຕິບັດຢ່າງ ເປັນປົກກະຕິຕາມແຜນການ ວາງໄວ້ເພື່ອເຮັດໃຫ້ ແຮງງານພາຍໃນປະເທດມີສີມືທີ່ດີ ແລະ ພຽງພໍກັບຄວາມຕ້ອງການຂອງຂະແໜງການຕ່າງໆທີ່ເປັນເປົ້າ ໝາຍນຳໃຊ້ແຮງງານ ເຊັ່ນ:ກະສິກຳ, ອຸດສາຫະກຳ ແລະ ການບໍລິການ. ແຕ່ທຽບໃສ່ຄວາມ ເປັນຈິງແລ້ວເຫັນວ່າການພັດທະນາ ສີມືແຮງງານຢູ່ປະ ເທດເຮົາ ຍັງມີລັກສະນະຊັກຊ້າຫລາຍ ເມື່ອທຽບໃສ່ຫລາຍປະເທດໃກ້ ຄຽງທັງຈຳນວນ ແລະ ມາດຕະ ຖານຄຸນນະພາບເຊິ່ງ ມັນສະແດງອອກຄື ໃນແຜນພັດທະນາສີ ມືແຮງງານ ໄລຍະປີ 2011- 2015 ໃຫ້ໄດ້ 2,2 ໝື່ນກວ່າຄົນ, ແຕ່ໃນ ສອງປີຜ່ານ ມາສາມາດປະຕິບັດ ໄດ້ພຽງ 88 ພັນກວ່າຄົນ,ຍິງ 39 ພັນກວ່າຄົນ,ໃນນັ້ນຂະແໜງ ກະ ສິກຳ 24 ພັນກວ່າຄົນ,ອຸດສາຫະ ກຳ 28 ພັນກວ່າຄົນ ແລະການບໍ ລິການ 36 ພັນກວ່າຄົນໂດຍນຳ ໃຊ້ສູນພັດທະນາວິຊາຊີບ 7 ແຫ່ງ ໃນຂອບເຂດທົ່ວປະເທດ ແລະ ສູນເຝິກວິຊາຊີບຂອງເອກະຊົນ ຈຳນວນ ໜຶ່ງ.

      ທ່ານ ຄອນສີ ກ່າວວ່າ: ເມື່ອ ປະເທດພວກເຮົາກ້າວສູ່ການ ເຊື່ອມໂຍງກັບພາກພື້ນແລ້ວ, ຖ້າແຮງງານພວກເຮົາມີຄວາມ ຈຳ ກັດດ້ານຈຳນວນ ແລະ ສີມືແລ້ວ ກໍຈະເຮັດໃຫ້ພວກເຮົາເກີດບັນຫາ ໃນໂຄງປະກອບຂອງເສດຖະກິດທີ່ມີການຂະຫຍາຍ ຕົວເຊັ່ນ:ຈະ ມີແຮງງານຕ່າງປະເທດເຂົ້າມາ ເປັນຈຳນວນຫລາຍ ໃນບາງຂະ ແໜງການທີ່ແຮງງານລາວບໍ່ສາມາດຕອບສະ ໜອງໄດ້ລວມໄປເຖິງສະພາບອັດຕາການ ຫວ່າງວຽກອາດມີຫລາຍ.ດັ່ງນັ້ນ ເພື່ອຮັບມືກັບບັນຫາດັ່ງກ່າວຈະໄດ້ເລັ່ງປະຕິບັດ ແຜນພັດທະນາແຮງງານໃຫ້ໄດ້ຕາມເປົ້າໝາຍ ວາງໄວ້ ແລະ ຕ້ອງໄດ້ຂໍການຮ່ວມມືກັບທຸກພາກສ່ວນໃນການປຸກລະດົມໃຫ້ ທຸກຄົນເຫັນຄວາມສຳຄັນກ່ຽວກັບບັນຫາການຍົກລະດັບສີມືແຮງງານ ແລະ ປຸກລະດົມໃຫ້ຊາວໜຸ່ມຍິງ-ຊາຍຫັນມາສົນ ໃຈໃນການຮຽນວິຊາຊີບໃຫ້ຫລາຍຂຶ້ນ.