ເສັ້ນທາງຫລາຍສາຍເຂດຊານເມືອງນະຄອນຫລວງວຽງຈັນເປ່ເພຫນັກ ແຕ່ຍັງບໍ່ໄດ້ຮັບການປົວແປງ

         ເນື່ອງ​ຈາກ​ເປັນ​ເສັ້ນທາງ​ເກົ່າ​ແກ່ ​ແລະ ການ​ກໍ່ສ້າງ​ຍັງ​ບໍ່​ໄດ້​ມາດຖານ ບວກ​ກັບ​ສະພາບ​ຝົນຕົກ ​ແລະ ມີ​ລົດ​ບັນທຸກ​ນ້ຳ ໜັກ​ເກີນ​ທຽວໄປມາຫລາຍສິ່ງເຮັດໃຫ້ເສັ້ນທາງດັ່ງກ່າວຍິ່ງຊຸດໂຊມ ແລະ ເປ່ເພຫລາຍໂດຍສະເພາະບັນດາເສັ້ນທາງອອກສູ່ ຊານເມືອງ ຄືເສັ້ນທາງໄປຫາເພຍລາດ ເມືອງສັງທອງ ຕັດອອກໄປຫາແຂວງວຽງຈັນແມ່ນເປ່ເພໜັກເກືອບຈະບໍ່ສາມາດສັນ ຈອນໄປມາເປັນປົກກະຕິໄດ້, ເສັ້ນທາງເບື້ອງຕາເວັນອອກຈາກທາດຫລວງ-ບ້ານຫົວ ຂົວອອກໄປນາຄວາຍຕໍ່ໃສ່ບ້ານນ້ອຍ ຊຽງດາ-ວິທະຍາໄລດົງຄຳຊ້າງເຖິງມີບໍລິສັດຮັບເໝົາກໍ່ສ້າງ, ແຕ່ກໍຍັງດຳເນີນໄປຊັກຊ້າແກ່ຍາວບວກກັບໄລຍະລະດູຝົນ ເຮັດ ໃຫ້ການໄປມາຂອງປະຊາຊົນຍິ່ງພົບຄວາມຫຍຸ້ງຍາກ, ສ່ວນເບື້ອງທິດໃຕ້ຂອງນະຄອນຫລວງກໍແມ່ນເສັ້ນທາງແຕ່ບ້ານບໍ່ໂອ- ຫາດດອກແກ້ວອອກໄປຫາບ້ານຫ້ອມ ແລະເຂດແຄມຂອງອອກໃສ່ເສັ້ນທາງທ່າເດື່ອກໍເປ່ເພຫລາຍ, ສ່ວນເສັ້ນທາງແຕ່ທ່າ ເດື່ອ-ໜອງພົງ-ບ້ານໂດນອອກສູ່ບ້ານພ້າວເມືອງປາກງື່ມຫາເສັ້ນທາງ 13 ໃຕ້ ຍິ່ງເປ່ເພໜັກ ເພາະເປັນເສັ້ນທາງທີ່ມີລົດບັນ ທຸກຫີນ- ຊາຍທຽວໄປມາຢ່າງບໍ່ຂາດໄລຍະ, ແຕ່ຂາດການສ້ອມແປງມາຫລາຍປີແລ້ວ ຈຶ່ງເຮັດໃຫ້ເສັ້ນທາງດັ່ງກ່າວເປ່ເພໜັກ

ຈົນຈະໃຊ້ການບໍ່ໄດ້ ແລະ ຖ້າຕົກຮອດຍາມແລ້ງນີ້ຫາກບໍ່ໄດ້ຮັບການຍົກລະດັບກໍຈະເຮັດໃຫ້ການສັນຈອນເສັ້ນທາງດັ່ງກ່າວ ເປັນອຳມະພາດກໍເປັນໄດ້ໂດຍສະເພາະບັນດາຂະບວນລົດນັກທ່ອງທ່ຽວເຂົ້າໄປທ່ຽວວັດຊຽງຄວນກໍຈະໄດ້ຮັບຜົນກະທົບ ໜັກເຊັ່ນດຽວກັນ. ດັ່ງນັ້ນ, ຂະແໜງຮັບຜິດຊອບຄວນມີມາດຕະການແກ້ໄຂໃຫ້ດີຂຶ້ນເພື່ອພັດທະນານະຄອນຫລວງວຽງ ຈັນເປັນນະຄອນຫລວງທີ່ ງົດງາມ ແລະ ເປັນຕາໜ້າຢູ່.