ໃນວັນທີ 24 ຕຸລານີ້, ທ່ານ ຈູມມາລີ
ໄຊຍະສອນ ປະທານປະເທດແຫ່ງ ສປປ ລາວ ພ້ອມຄະນະ ໄດ້ເດີນທາງໄປແຂວງລີອົງ ໂດຍລົດໄຟຄວາມໄວສູງ
TGV ໂດຍມີທ່ານນາງ ຍານາ ເບັນກີກີ ລັດຖະມົນຕີຝຣັ່ງໂກໂຟນີ ຂອງຝຣັ່ງຮ່ວມເດີນ
ທາງນຳ ເຊິ່ງຈຸດທຳອິດແມ່ນຢ້ຽມຢາມເຂື່ອນໄຟຟ້າ ແລະ ບໍລິສັດຄຸ້ມຄອງນ້ຳແຫ່ງຊາດແມ່ນ້ຳໂຣນ,
ບໍລິສັດດັ່ງກ່າວມີບົດບາດສຳຄັນໃນການສຶກສາຄວາມອາດສາມາດດ້ານພະລັງງານໄຟຟ້າຂອງແມ່ນ້ຳຂອງ,
ໄດ້ໃຫ້ການຊ່ວຍເຫລືອດ້ານເຕັກນິກ ໃຫ້ແກ່ກະຊວງພະລັງງານ ແລະ ບໍ່ແຮ່ຂອງລາວ,
ສຶກສາໂຄງການໄຟຟ້າໄຊຍະບູລີກ່ຽວກັບການແລ່ນເຮືອ, ໃຫ້ການຊ່ວຍເຫລືອການພັດທະນາແບບຍືນຍົງຂອງຊັບພະຍາກອນນ້ຳເພື່ອການຜະລິດໄຟຟ້າຢູ່ຊົນນະບົດ.
ຈາກນັ້ນ ປະທານປະເທດແຫ່ງ ສປປ ລາວ ກໍໄດ້ໄປຢ້ຽມຢາມໂຮງງານຜະລິດໄໝເຮັກແມດເຊິ່ງເປັນໂຮງງານເກົ່າແກ່
ແລະ ມີຊື່ສຽງລະດັບສາກົນຂອງແຂວງລີອົງໂດຍໂຮງງານສ້າງຕັ້ງມາແຕ່ປີ 1633.
ໃນຕອນທ່ຽງຂອງມື້ດຽວກັນ, ປະທານປະເທດໄດ້ຮ່ວມງານລ້ຽງອາຫານທ່ຽງກັບເຈົ້າແຂວງເຂດໂຣນ-ອານ
ແລະ
ໂອ້ລົມກ່ຽວກັບການຮ່ວມມືລະຫວ່າງເຂດໂຣນ-ອານ ແລະ ເມືອງທ່າແຂກ ແຂວງຄຳມ່ວນທາງກະສິກຳ,
ສາທາລະນະສຸກ ແລະ ທ່ອງທ່ຽວ, ຕີລາຄາການຮ່ວມມືທ້ອງຖິ່ນກັບທ້ອງຖິ່ນລະຫວ່າງລາວ
ແລະ ຝຣັ່ງ ໂດຍສະເພາະລະຫວ່າງເຂດໂຣນ-ອານ ແລະ ເມືອງທ່າແຂກ, ສາມາດຕອບສະໜອງຄວາມຮຽກຮ້ອງຕ້ອງການຂອງປະຊາຊົນທ້ອງຖິ່ນ
ແລະ ຄວນຊຸກຍູ້ສົ່ງເສີມການຮ່ວມມືລັກສະນະດັ່ງກ່າວໃຫ້ກວ້າງຂວາງຂຶ້ນໃນອະນາຄົດ.
ຈາກນັ້ນ, ປະທານປະເທດແຫ່ງ ສປປ ລາວ ກໍໄດ້ຢ້ຽມຢາມຫ້ອງ ການວາງແຜນຜັງເມືອງລີອົງ
ທີ່ເນັ້ນການວາງຜັງເມືອງໃຫ້ເປັນເມືອງສະອາດ, ປະຢັດພະລັງງານ, ການຈະລາຈອນສະດວກ
ແລະ ເປັນສະຖານທີ່ພັກຜ່ອນຂອງຊາວເມືອງ.
No comments:
Post a Comment