ລັດໂຈະຫລາຍໂຄງການກໍ່ສ້າງໃນສົກປີ 2013-2014

         ກະຊວງແຜນການ ແລະ ການລົງທຶນໃຫ້ຮູ້ວ່າ: ໃນສົກ ປີ 2013-2014 ລັດຖະບານໄດ້ ໂຈະການກໍ່ສ້າງຫລາຍໂຄງ ການໂດຍສະເພາະໂຄງການກໍ່ສ້າງອາຄານສຳນັກງານໃໝ່ຂອງລັດທີ່ເຫັນວ່າບໍ່ຍັງບໍ່ຄວາມຈຳເປັນຮີບດ່ວນ, ເນື່ອງຈາກງົບປະ ມານມີຈຳກັດ ແລະ ລັດກໍຕ້ອງການນຳໃຊ້ງົບປະມານທີ່ມີລົງທຶນເຂົ້າໃສ່ໂຄງການທີ່ເປັນການຜະລິດຂອງປະຊາຊົນທີ່ເຫັນວ່າ ມີຄວາມຈຳເປັນກວ່າ.

         ສຳລັບໂຄງການທີ່ລັດໂຈະ ນັ້ນມີ: ການກໍ່ສ້າງສຳນັກງານ, ອົງການໃໝ່ຢູ່ສູນກາງ 4 ໂຄງການ, ມີມູນຄ່າ 15 ຕື້ກີບ, ໂຄງການສະເໜີໃໝ່ຂອງບັນດາກະຊວງ, ອົງການຂັ້ນສູນກາງ 68 ໂຄງການ, ມີມູນຄ່າ 1 ພັນກວ່າຕື້ກີບ, ແຕ່ມູນຄ່າໃນແຜນ ສົກປີແມ່ນ 31 ຕື້ກີບ, ໂຄງການສະເໜີໃໝ່ຂອງນະຄອນຫລວງວຽງຈັນ ແລະ ບັນດາແຂວງທົ່ວປະເທດ 170 ມູນຄ່າລວມ    1 ,3 ຕື້ກີບ, ແຕ່ມູນຄ່າໃນແຜນສົກປີແມ່ນ 37 ຕື້ກີບ ແລະ ໂຄງການກໍ່ສ້າງພື້ນຖານໂຄງລ່າງທີ່ມີມູນຄ່າສູງ 100 ຕື້ກີບຂຶ້ນ ໄປ ຈຳນວນ 12 ໂຄງການ. ໂດຍລັດຖະບານໄດ້ມອບໃຫ້ກະຊວງແຜນການ ແລະ ການລົງທຶນ ສົມທົບກັບຂະແໜງການ ແລະ

ທ້ອງຖິ່ນທີ່ຖືກໂຈະໂຄງການນັ້ນເພື່ອຄົ້ນຄວ້າເອົາແຜນໄປເຂົ້າໃສ່ໂຄງການສືບຕໍ່ຂອງຕົນໃນຕໍ່ໜ້າຢ່າງມີຈຸດສຸມເພື່ອຫລີກລ້ຽງ ການສ້າງໜີ້ສີນໃໝ່ເຊິ່ງໄລຍະຜ່ານມາ, ລັດຖະບານໄດ້ມີຄວາມພະຍາຍາມສຸມທຶນຮອນຢ່າງຫລວງຫລາຍເພື່ອແກ້ໄຂໜີ້ສີນ, ແຕ່ສະພາບດັ່ງກ່າວກໍຍັງສືບຕໍ່ມີຢ່າງຄຸມເຄືອ ແລະ ບໍ່ມີທ່າທີວ່າຈະຫລຸດຜ່ອນລົງເຊິ່ງບັນຫາມັນເກີດຈາກຄວາມບໍ່ດຸ່ນດຽງລະ ຫວ່າງຄວາມຕ້ອງການພັດທະນາທີ່ມີຫລວງຫລາຍກັບການຕອບສະໜອງດ້ານທຶນຮອນທີ່ມີຈຳກັດ, ຂະນະທີ່ສາເຫດຕົ້ນຕໍ ຂອງການສ້າງໜີ້ແມ່ນຍ້ອນຄວາມບໍ່ເຂັ້ມງວດໃນການປະຕິບັດລະບຽບວິໄນແຜນການ-ການເງິນອັນພາໃຫ້ເກີດມີໂຄງການ ນອກແຜນທີ່ສະພາຮັບຮອງ.