ຜູ້ໃຊ້ລົດຍັງຫນັກໃຈກັບບັນຫານ້ຳມັນບໍ່ເຕັມລິດ

      ໃນປັດຈຸບັນການນຳໃຊ້ພາຫະນະຢູ່ປະເທດເຮົາໃນແຕ່ລະປີມີຈຳນວນເພີ່ມຂື້ນ, ເນື່ອງຈາກສະພາບການພັດທະນາທາງດ້ານເສດຖະກິດສັງຄົມມີການເຕີບໃຫຍ່ຂະ ຫຍາຍຕົວຂື້ນພໍສົມຄວນ ບວກໃສ່ກັບລາຍຮັບຂອງພະນັກງານລັດຖະກອນ, ປະຊາ ຊົນ ແລະ ຊາວຄ້າຂາຍກໍ່ເຫັນວ່າມີໝາກຜົນເຫັນໄດ້ຢ່າງເດັ່ນຊັດ, ການພັດທະນາຊີວິດ ຂອງບັນດາຊັ້ນຄົນຕ່າງໆໃນສັງຄົມນັບມື້ມີຄວາມຈະເລີນສີວິໄລເທື່ອລະກ້າວ, ຂະນະ ດຽວກັນ, ບັນຫາຫຍໍ້ທໍ້ຂອງຄົນໃນສັງຄົມໂດຍສະເພາະແມ່ນຜູ້ນຳໃຊ້ພາຫະນະ ແລະ ກົນຈັກຕ່າງໆຍັງມີຄວາມໜັກໃຈ ແລະ ເປັນຫ່ວງກັບບັນຫາສະພາບນ້ຳມັນ ບໍ່ເຕັມລິດ ເໝາະສົມຕາມທີ່ລາຄາ ນ້ຳມັນທີ່ບໍລິສັດນ້ຳມັນເຊື້ອໄຟຫຼາຍແຫ່ງກຳນົດໃຫ້ແຕ່ລະປ້ຳ, ເຊິ່ງຕໍ່ບັນຫານີ້, ບັນດາສື່ຫຼາຍສຳນັກກໍໄດ້ ທັກທ້ວງ ແລະ ສະເໜີຕໍ່ພາກສ່ວນກ່ຽວຂ້ອງຫາວິທີແກ້ໄຂຊອກທາງອອກແຕ່ກໍຍັງບໍ່ໄດ້ຮັບການແກ້ໄຂເທົ່າທີ່ຄວນ.

     ບັນຫາທີ່ກ່າວມາຂ້າງເທິງ ນັ້ນມີຫຼາຍຫາງສຽງໄດ້ທັກທ້ວງ  ແລະ ໃຫ້ຄວາມສົນໃຈຕໍ່ກັບຫົວໜ່ວຍທຸລະກິດຜູ້ປະກອບ ການທີ່ຍັງສືບຕໍ່ປ່ອຍປະລະເລີຍກັບພວກສວຍໂອກາດໃນການໃຫ້ການບໍລິການນ້ຳມັນໃນແຕ່ລະປ້ຳຕໍ່ຜູ້ເຂົ້າຮັບການຊົມໃຊ້ ບໍລິການຍ້ອນບັນຫາການບໍລິການນ້ຳມັນບໍ່ເຕັມລິດຂອງກຳມະກອນປະຈຳປ້ຳຂອງຕົນ, ເຊິ່ງເປັນບັນຫາທີ່ແກ່ຍາວຊຳເຮື້ອແກ່ ບໍ່ຕົກມາດົນແລ້ວ, ໂດຍຜ່ານມາຜູ້ນຳໃຊ້ພາຫະນະທີ່ເຂົ້າຊື້ນຳ້ມັນຢູ່ຕາມປ້ຳຕ່າງໆບໍ່ສະເພາະແຕ່ມີການ ລະແວງສົງໄສຕໍ່ຄວາມ ບໍ່ຊື່ສັດໂປ່ງໄສຂອງກຳມະກອນຜູ້ໃຫ້ບໍລິການຢູ່ໃນແຕ່ລະປ້ຳແລ້ວຍັງເກີດມີການຜິດຖຽງໃຊ້ວາຈາຫຍາບຄາຍຕໍ່ວ່າຕໍ່ຂານກັນ ຢ່າງໄຮ້ເຫດຜົນ. ດັ່ງນັ້ນ, ຜູ້ຊົມໃຊ້ພາຫະ ນະທຸກປະເພດເຫັນວ່າ: ຄວນສະເໜີໃຫ້ຂະແໜງກ່ຽວຂ້ອງໂດຍສະເພາະຂະ ແໜງວິທະຍາສາດ ແລະ ເຕັກໂນໂລຊີ ນັບແຕ່ສູນກາງລົງຮອດທ້ອງຖິ່ນຕ່າງໆ. ຕ້ອງເອົາໃຈໃສ່ ແລະ ຖືສຳຄັນໃນການແກ້ໄຂ ບັນຫານ້ຳມັນບໍ່ເຕັມລິດ ແລະ ໃຫ້ກວດກາຄືນຕໍ່ການປະພຶດສວຍໂອກາດຂອງພະນັກງານກຳມະກອນຜູ້ໃຫ້ບໍລິການນ້ຳມັນ ໃນແຕ່ລະປ້ຳຢ່າງເຂັ້ມງວດເພື່ອຮັກສາຜົນປະໂຫຍດອັນຊອບທຳ ແລະ ຄວາມເປັນ ລະບຽບຮຽບຮ້ອຍ ແລະ ຄວາມສະຫງົບ ຂອງສັງຄົມຕະຫຼອດໄປ.