ຄະນະຜູ້ແທນລາວສຳເລັດການເຂົ້າຮ່ວມກອງປະຊຸມສຸດຍອດຟຣັງໂກໂຟນີຄັ້ງທີ 15

       ຄະນະຜູ້ແທນແຫ່ງລາວ ນຳ ໂດຍທ່ານ ພົງສະຫວັດ ບຸບຜາ ລັດຖະມົນຕີ, ຫົວໜ້າຫ້ອງວ່າການປະທານປະເທດ, ຜູ້ຮັບຜິດ ຊອບວຽກງານຟຣັງໂກໂຟນີ, ໃນຖານະຜູ້ຕາງໜ້າພິເສດຂອງປະທານປະເທດໄດ້ເດີນທາງໄປຮ່ວມກອງປະ ຊຸມສຸດຍອດຄັ້ງທີ 15 ຂອງອົງການຟຣັງໂກໂຟນີສາກົນທີ່ໄດ້ຈັດຂຶ້ນຢູ່ນະຄອນ ຫລວງດາກາ, ປະເທດເຊເນ ການ, ແຕ່ວັນທີ 26-30 ພະຈິກ ຜ່ານມານີ້.

    ໃນກອງປະຊຸມສຸດຍອດດັ່ງກ່າວ, ໄດ້ມີຄະນະຜູ້ແທນປະ ເທດສະມາຊິກນຳໂດຍລະດັບ ປະມຸກລັດ ແລະ ຫົວໜ້າລັດຖະ ບານເຂົ້າຮ່ວມ 31 ປະເທດ, ຂັ້ນລັດຖະມົນຕີ 22 ປະເທດ ແລະ ຂັ້ນເອກອັກຄະລັດຖະທູດ 4 ປະເທດ ແລະ ຍັງມີຄະນະຜູ້ ແທນສັງເກດການເຂົ້າຮ່ວມຕາມປົກກະຕິ.

ກອງປະຊຸມສຸດຍອດອົງການຟຣັງໂກໂຟນີໄດ້ຈັດຂຶ້ນໃນທຸກໆສອງປີໂດຍໄດ້ມີການພິຈາລະນາກ່ຽວກັບການແກ້ໄຂບັນຫາທີ່ສ ຳຄັນຕ່າງໆພາຍໃນອົງການຟຣັງໂກໂຟນີ ແລະ ບັນຫາຂອງໂລກທີ່ພົ້ນເດັ່ນເຊັ່ນ: ວິກິດການທາງການເມືອງຢູ່ໃນບາງປະເທດສະ ມາຊິກ, ບັນຫາການແຜ່ລະບາດຂອງພະຍາດອີໂບລາ ແລະ ບັນຫາການຕໍ່ສູ້ຕ້ານການກໍ່ການຮ້າຍ, ລວມທັງໄດ້ສະຫລຸບຕີລາ

ຄາກ່ຽວກັບການເຄື່ອນໄຫວຂອງອົງການແຕ່ກອງປະຊຸມສຸດຍອດຄັ້ງກ່ອນ ແລະ ຄົ້ນຄວ້າວາງທິດທາງສຳລັບໄລຍະຕໍ່ໄປ, ເຊິ່ງ ກອງປະຊຸມຄັ້ງນີ້ໄດ້ມີການກຳນົດເອົາຫົວຂໍ້ຄື “ແມ່ຍິງ ແລະ ຊາວໜຸ່ມຟຣັງໂກໂຟນີໃນນາມເປັນຜູ້ນຳໜ້າໃຫ້ແກ່ຂະບວນການ ສັນຕິພາບ ແລະ ຜູ້ປະຕິບັດການໃຫ້ແກ່ການພັດທະນາ ” ເປັນທິດທາງໃນການເຄື່ອນໄຫວຂອງອົງການ.

     ນອກຈາກນັ້ນ, ກອງປະຊຸມສຸດຍອດຍັງໄດ້ຮັບຮອງເອົາບັນດາມະຕິທີ່ສຳຄັນຕ່າງໆ 9 ສະບັບທີ່ພົວພັນເຖິງການເຄື່ອນ ໄຫວໃນດ້ານການເມືອງ, ການສຶກສາ, ວັດທະນະທໍາ, ສາທາລະນະສຸກ ແລະ ວິທະຍາສາດ-ເຕັກນິກ, ພ້ອມທັງໄດ້ຮັບຮອງ ເອົາແຜນຍຸດທະສາດການເຄື່ອນໄຫວສຳລັບໄລຍະ 2015-2022 ແລະ ແຜນດໍາເນີນງານ 4 ປີ ສຳ ລັບໄລຍະ 2015-2018 ຂອງອົງການ ແລະ ໄດ້ມີການຕົກລົງຮັບຮອງເອົາ 3 ປະເທດເຂົ້າເປັນຜູ້ສັງເກດການຂອງອົງການຕື່ມອີກຄືກົດສະຕາຣີກາ, ສະຫະພັນແມັກຊິກ ໂກ ແລະ ໂກໂຊໂວ.

  ໃນຕອນທ້າຍຂອງກອງປະຊຸມ, ບັນດາຜູ້ນຳຂອງປະເທດສະມາຊິກໄດ້ມີການຕົກລົງເປັນເອກະສັນກັນເລືອກຕັ້ງເອົານາງ ມີແຊນ ຊັງ, ອະດີດຜູ້ສຳເລັດລາຊະການຂອງປະເທດການາດາ, ໃຫ້ດຳລົງຕຳແໜ່ງເປັນເລຂາທິການໃຫຍ່ຄົນໃໝ່ຂອງ ອົງການແທນທ່ານ ອາບູດີອຸບ, ເລຂາທິ ການໃຫຍ່ຜູ້ເກົ່າທີ່ໄດ້ໝົດວາລະການປະຕິບັດໜ້າທີ່ພາຍຫລັງ 3 ສະໄໝ ແລະ ໄດ້ຕົກລົງອະນຸ ມັດໃຫ້ປະເທດ ອາກເມນີເປັນເຈົ້າພາບຈັດກອງປະຊຸມລະດັບລັດຖະມົນຕີຟຣັງໂກໂຟນີ ຄັ້ງທີ 31 ໃນປີ 2015, ແລະ ໃຫ້ປະເທດມາດາກັສກາ ເປັນເຈົ້າພາບຈັດກອງ ປະຊຸມສຸດຍອດຂອງອົງການຄັ້ງ ທີ 16 ໃນປີ 2016.

       ອົງການຟຣັງໂກໂຟນີສາກົນ (OIF) ແມ່ນອົງການຈັດຕັ້ງ ລະຫວ່າງລັດຖະບານຂອງບັນດາປະເທດທີ່ໃຊ້ພາສາຝຣັ່ງ, ໂດຍ ມີຈຸດປະສົງໃນການເສີມສ້າງ ຄວາມສາມັກຄີ, ການຮ່ວມມື ແລະ ການປົກປ້ອງຄວາມຫຼາກ ຫລາຍທາງດ້ານວັດທະ ນະທຳ ພາຍໃນບັນດາປະເທດສະມາຊິກດ້ວຍກັນ ທີ່ມີຈຳນວນທັງໝົດ 80 ປະເທດ (57 ປະເທດເປັນສະມາ ຊິກສົມບູນ ແລະ 23 ປະເທດສັງເກດການ). ສປປ ລາວ ແມ່ນໄດ້ເຂົ້າເປັນປະເທດສະມາຊິກສົມ ບູນຂອງອົງການຟຣັງໂກໂຟນີ ມາແຕ່ປີ 1991, ໂດຍ ໄດ້ມີການຮ່ວມມືຢ່າງມີໝາກຜົນຮ່ວມກັບອົງການສຳລັບຫລາຍໂຄງການໃນດ້ານການສຶກສາ, ວັດທະນະທໍາ, ສາທາລະນະສຸກ ແລະ ວິທະຍາສາດ-ເຕັກນິກທີ່ໄດ້ຮັບໃຊ້ໃຫ້ແກ່ການພັດທະນາຊັບພະຍາກອນມະນຸດກໍຄືການພັດທະນາ ເສດຖະກິດ ແລະ ສັງ ຄົມຂອງ ສປປ ລາວ.