ຮອດປີ 2020 ນະຄອນຫລວງຈະສະໜອງນ້ຳປະປາກວມ 95% ຂອງພົນລະເມືອງ

ເນື່ອງໃນໂອກາດສະເຫລີມສະຫລອງວັນສ້າງຕັ້ງພັກປະຊາຊົນ ປະຕິວັດ ລາວ ຄົບຮອບ 60 ປີ(22 ມີນາ 1955-22 ມີນາ 2015), ອຳນວຍການລັດວິສ າຫະກິດນ້ຳປະປານະຄອນຫລວງ ຄຳເຜີຍ ວົງສາຄຳຜຸຍ ໄດ້ໃຫ້ສຳ ພາດຕໍ່ນັກ ຂ່າວພວກເຮົາວ່າ: ນັບແຕ່ປະເທດຊາດຂອງພວກເຮົາໄດ້ຮັບການປົດປ່ອຍ ຢ່າງສົມບູນໃນປີ 1975, ພັກ-ລັດໄດ້ສຸມໃສ່ປັບປຸງປົວແປງພື້ນຖານໂຄງລ່າງໃຫ້ສະ ດວກດີຂຶ້ນເທື່ອລະກ້າວ, ເວົ້າສະເພາະໃນຂະແໜງນ້ຳປະປາ ແມ່ນຖືເປັນ ບູລິມະສິດສຳຄັນ ແລະ ເປັນນະໂຍບາຍພິເສດທີ່ພັກ ແລະ ລັດ ຕ້ອງໄດ້ຄຸ້ມຄອງດັດສົມເພື່ອໃຫ້ສາມາດ ຕອບສະ ໜອງຄວາມຕ້ອງການຂອງສັງຄົມ ແລະ ສະພາບການຂະຫຍາຍເສດຖະກິດຂອງຊາດໃນແຕ່ລະໄລຍະ.

     ທ່ານອຳນວຍການກ່າວວ່າ: ເມື່ອຫລາຍປີກ່ອນນີ້, ອັດຕາການຊົມໃຊ້ນ້ຳປະປາທົ່ວປະເທດມີບໍ່ເຖິງ10% ແລະ ມີສະຖານີຜະລິດນ້ຳພຽງຢູ່ນະຄອນຫລວງວຽງຈັນ, ຫລວງພະບາງ ແລະ ຈຳປາສັກເທົ່ານັ້ນ, ແຕ່ມາຮອດ ປັດຈຸບັນ ຢູ່ນະຄອນຫລວງວຽງຈັນມີໂຮງງານຜະລິດນ້ຳ 4 ແຫ່ງຄື: ສະຖານີຈີນາຍໂມ້ມີກຳລັງການຜະລິດ 80 ພັນແມັດ ກ້ອນ, ເກົ້າລ້ຽວ 60 ພັນແມັດກ້ອນ, ດົງໝາກຄາຍ ແລະ ດົງບັງແຫ່ງລະ 20 ພັນແມັດກ້ອນຕໍ່ມື້, ຕາມການຄິດໄລ່

ຄວາມຕ້ອງການນ້ຳໃນປັດຈຸບັນມີປະມານ 320-340 ພັນແມັດກ້ອນຕໍ່ມື້ຈຶ່ງພຽງພໍ ແລະ ຄາດວ່າ ແຕ່ປີ 2015-2020 ຈະມີຄວາມຕ້ອງການນ້ຳເພີ່ມຂຶ້ນປະມານ 360-400 ພັນແມັດກ້ອນ, ແຕ່ປີ 2021-2025 ປະມານ 400-450 ພັນແມັດກ້ອນ ແລະ ຮອດປີ 2030 ຈະມີຄວາມຕ້ອງການຫລາຍກວ່າ 5 ແສນແມັດກ້ອນຕໍ່ມື້ ແລະ ເປັນສິ່ງ ທ້າທາຍຫລາຍຕໍ່ຂະແໜງນ້ຳປະປາ. ກໍດັ່ງປັດຈຸບັນການສະໜອງນ້ຳປະປາຂອງນະຄອນຫລວງວຽງຈັນບໍ່ທັນຕອບ ສະໜອງຕາມຄວາມຕ້ອງການຂອງສັງຄົມໄດ້ຢ່າງທົ່ວເຖິງ, ສາເຫດຕົ້ນຕໍແມ່ນມາຈາກມີຜູ້ຊົມໃຊ້ເພີ່ມຂຶ້ນຢ່າງວ່ອງ ໄວເຊັ່ນ: ການພັດທະນາເຂດອຸດສະຫະກຳ, ເຂດເສດຖະກິດ, ທ່ີຢູ່ອາໄສ ແລະ ອື່ນໆ, ນອກຈາກນີ້, ການຂະຫຍາຍ ທໍ່ສົ່ງກໍຍັງເຮັດບໍ່ທັນໄດ້ກວ້າງຂວາງ, ປັດຈຸບັນລະບົບທໍ່ສົ່ງນ້ຳນັບທັງຂະໜາດນ້ອຍ ແລະ ໃຫຍ່ມີຄວາມຍາວປະ ມານ 1.340 ກິໂລແມັດ ແລະ ສ່ວນຫລາຍຍັງບໍ່ໄດ້ມາດຕະຖານຍ້ອນມີອາຍຸການນຳໃຊ້ດົນນານອັນເປັນສາເຫດ ໜຶ່ງເຮັດໃຫ້ອັດຕານ້ຳຕົກເຮ່ຍມີປະລິມານຫລາຍໃນແຕ່ລະປີ ແລະ ນັບແຕ່ປີ 2009 ເປັນຕົ້ນມາແມ່ນປະຕິບັດ ຫົວໜ່ວຍລາຄາ 1.350 ກີບຕໍ່ແມັດກ້ອນ, ຊຶ່ງຕ່ຳຫລາຍທຽບກັບຕົ້ນທຶນການຜະລິດຕົກມາຮອດເດືອນກັນຍາ 2014 ລັດຖະບານຈຶ່ງອະນຸມັດໃຫ້ມີການປັບປຸງລາຄານ້ຳໃໝ່ມາເປັນ 1.900 ກີບຕໍ່ແມັດກ້ອນ ແລະ ແຍກອອກ ເປັນ 3 ປະເພດການຊົມໃຊ້ຄື: 1.ນຳໃຊ້ເພື່ອຄົວເຮືອນ, 2.ນຳໃຊ້ໃນສຳນັກງານຫ້ອງການ, ສະຖານທູດ, ອົງການຈັດ ຕັ້ງສາກົນ ແລະ 3. ນຳໃຊ້ເພື່ອທຸລະກິດ, ໂຮງແຮມ, ຮ້ານອາຫານ. ເຊິ່ງໄລຍະຜ່ານມາ, ສະພາບທາງດ້ານການເງິນ ແມ່ນເຫັນວ່າພົບຄວາມຫຍຸ້ງຍາກ ແລະ ຂາດສະພາບຄ່ອງ, ເນື່ອງຈາກການປະຕິບັດລາຄາເກົ່າແມ່ນຕ່ຳກວ່າ ລາຄາຕົ້ນທຶນການຜະລິດ. ນອກຈາກນີ້, ຄ່ານ້ຳໃນບ້ວງພາກລັດແມ່ນປະຕິບັດບໍ່ໄດ້ຕາມແຜນການ, ແກ່ຍາວການຊຳ ລະເກີດມີໜີ້ສີນຄຸມເຄືອຫລາຍ.

     ອຳນວຍການລັດວິສາຫະກິດນ້ຳປະປາ ກ່າວວ່າ: ສຳລັບແຜນການຕໍ່ໜ້ານີ້ ແມ່ນຈະສຸມໃສ່ໂຄງການຂະຫຍາຍ ໂຮງງານດົງໝາກຄາຍໄລຍະ II ມີກຳລັງການຜະລິດ 1 ແສນແມັດກ້ອນ, ຂະຫຍາຍໂຮງງານນ້ຳປະປາທ່າເດື່ອມີກຳລັງ ການຜະລິດ 20 ພັນແມັດກ້ອນ, ສ້າງໂຮງງານນ້ຳປະປາບ້ານແສນດິນ 20 ພັນແມັດກ້ອນ, ຂະຫຍາຍໂຮງງານຜະ ລິດດົງບັງຈາກ 20 ພັນມາເປັນ 40 ພັນແມັດກ້ອນ ແລະ ຂະຫຍາຍໂຮງງານຜະລິດນ້ຳປະປາຈີນາຍໂມ້ຈາກ 80 ພັນມາເປັນ 120 ພັນແມັດກ້ອນຕໍ່ມື້ ແລະ ໃນໂອກາດນີ້, ກໍຮຽກຮ້ອງໃຫ້ທົ່ວສັງຄົມຈົ່ງພ້ອມກັນໃຊ້ນ້ຳຢ່າງປະຢັດ ແລະ ເກີດປະໂຫຍດສູງສຸດ, ຊ່ຳລະຄ່ານ້ຳໃຫ້ທ່ວງທັນເວລາເປັນປົກກະຕິ, ຂະນະດຽວກັນຫາກພົບເຫັນທໍ່ນ້ຳຮົ່ວ, ແຕກ ຫລື ການລັກໃຊ້ນ້ຳໂດຍບໍ່ຖືກຕ້ອງອື່ນໆກະລຸນາແຈ້ງສາຍດ່ວນໝາຍເລກ 1169 ຕະຫລອດ 24 ຊົ່ວໂມງ ແລະ ພິເສດຊ່ວງໄລຍະສະຫລອງປີໃໝ່ລາວ ພສ 2015 ທີ່ຈະມາເຖິງນີ້ກໍຂໍໃຫ້ທຸກຄົນຈົ່ງຊ່ວຍກັນໃຊ້ນ້ຳຢ່າງປະ ຢັດ.