ລາວເປີດຂະບວນສັກວັກ​ແຊັງກັນພະຍາດໄຂ້ສະໝອງອັກເສບຍີ່ປຸ່ນ

ກະຊວງ​ສາທາລະນະ​ສຸກຮ່ວມ​ກັບນະຄອນຫລວງ​ວຽງ​ຈັນເປີດຂະບວນ ການຊັກວັກ​ແຊັງກັນພະຍາດໄຂ້ສະໝອງ ອັກເສບຍີ່ປຸ່ນຂຶ້ນໃນວັນທີ 1 ເມສານີ້, ຢູ່ຫໍວັດທະນະທຳແຫ່ງຊາດ ນະຄອນຫລວງວຽງຈັນ ໂດຍການໃຫ້ກຽດເຂົ້າຮ່ວມ ຂອງທ່ານ ດຣ ພັນຄຳ ວິພາວັນ ຮອງນາຍົກລັດຖະມົນຕີ, ຜູ້​ຊີ້​ນຳ​ວຽກງານ​ວັດທະ ນະທຳ-ສັງຄົມ, ລັດຖະ ມົນຕີວ່າການກະຊວງສຶກສາທິການແລະ ກິລາ, ທ່ານ ດຣ ສິນລະວົງ ຄຸດໄພທູນ ເຈົ້າຄອງນະຄອນຫລວງວຽງຈັນ, ມີບັນດາລັດຖະມົນຕີ, ຜູ້ຕາງໜ້າອົງການອະນາໄມໂລກ ແລະ ອຸຍນີເຊບປະຈຳລາວເຂົ້າຮ່ວມ.

ການເປີດຂະບວນການດັ່ງກ່າວ ແນໃສ່ປຸກລະດົມຂົນຂວາຍທຸກໆພາກສ່ວນທົ່ວສັງຄົມ ທັງພາກລັດ ແລະ ເອກະຊົນ ໃຫ້ມີສ່ວນຮ່ວມຊຸກຍູ້ຂະບວນການສັກຢາກັນພະຍາດໄຂ້ສະໝອງອັກ ເສບຍີ່ປຸ່ນສຳລັບເດັກນ້ອຍອາຍຸ 1 ປີເຖິງລຸ່ມ 15 ປີໃຫ້ ບັນລຸໄດ້ຫລາຍກວ່າ 95% ຂຶ້ນໄປເຊິ່ງຈະໄດ້ເລີ່ມ ຈັດຕັ້ງປະຕິບັດໃນລະຫວ່າງວັນທີ 20 ຫາ-30 ເມສາ 2015 ເປັນຕົ້ນໄປ ໃນແຂວງພາກກາງ ແລະ ພາກໃຕ້ຄື ນະຄອນຫລວງວຽງຈັນ, ແຂວງວຽງຈັນ, ບໍລິຄຳໄຊ, ໄຊສົມບູນ, ຄຳມ່ວນ, ສະຫວັນນະ ເຂດ, ຈຳປາສັກ, ເຊກອງ ແລະ ແຂວງອັດຕະປື.

ທ່ານ ດຣ ພັນຄຳ ວິພາວັນ ໃຫ້ຮູ້ວ່າ: ປັດຈຸບັນ, ຂະແໜງສາທາລະນະສຸກ, ໄດ້ຖືເອົາການເບິ່ງແຍງສຸຂະ ພາບຂອງ ແມ່ ແລະເດັກເປັນບູລິມະສິດສໍາຄັນ, ໂດຍເອົາວຽກສັກຢາກັນພະຍາດເປັນແກນ ແລະ ເປັນໃຈກາງເຊື່ອມສານວຽກງານສຸ ຂະພາບແມ່ແລະ ເດັກຄື ການດູແລແມ່ຍິງຖືພາ, ການເກີດລູກທີ່ປອດໄພ, ການຕິດຕາມແມ່ ແລະ ລູກຫລັງເກີດ, ການເກີດ ລູກຫ່າງ,ສຸຂະພາບຈະເລີນພັນ, ການລ້ຽງລູກດ້ວຍນົມແມ່, ໂພສະນາການເດັກ ແລະ ອື່ນໆ, ພ້ອມທັງຮຽກຮ້ອງໃຫ້ບັນ ດາຫົວໜ່ວຍທຸລະກິດທັງພາກລັດ ແລະ ເອກະຊົນຈົ່ງປະກອບສ່ວນໃຫ້ການສະໜັບສະໜູນຊ່ວຍເຫລືອ ວຽກງານການ ສັກຢາກັນພະຍາດແຫ່ງຊາດ ແລະ ຮຽກຮ້ອງໃຫ້ປະຊາຊົນນຳເອົາລູກຫລານຂອງຕົນຜູ້ມີອາຍຸ 1 ປີຫາລຸ່ມ 15 ປີໄປສັກວັກ ແຊນກັນພະຍາດໄຂ້ສະໝອງອັກເສບຍີ່ປຸ່ນຢ່າງທົ່ວເຖິງ.