ໂຄງການຮຽນຮູ້ ແລະ ພັດທະນາແອບປິດລົງດ້ວຍຜົນສຳເລັດ

     ວັນທີ 2 ເມສານີ້ ຢູ່ຄະນະວິສະວະກຳສາດ ມະຫາວິທະຍາໄລແຫ່ງຊາດ ໄດ້ມີພິ ທີປິດໂຄງການຮຽນຮູ້ ແລະ ພັດ ທະນາແອບ ໂດຍຄົນລາວສູ່ສາກົນ (Tech Institute Application Android Academy) ປີທີ 2, ໂດຍການເຂົ້າຮ່ວມ ຂອງທ່ານ ສຈ. ດຣ. ບົວລິນ ສ້ອຍສຸວັນ ຄະນະບໍດີຄະນະວິສະວະກຳສາດ, ມະ ຫາວິທະຍາໄລແຫ່ງຊາດ ແລະ ມີພາກສ່ວນກ່ຽວຂ້ອງເຂົ້າຮ່ວມເປັນຈຳນວນຫລາຍ.

     ຄະນະບໍດີຄະນະວິສະວະກຳສາດ, ມະຫາວິທະຍາໄລແຫ່ງຊາດ ກ່າວວ່າ: ການດຳເນີນໂຄງການໃນໄລຍະ 2 ປີຜ່ານ ມາ, ສາມາດສ້າງນັກຮຽນ, ນັກສຶກສາ ມີໂອກາດສຶກສາຄວາມຮູ້, ເຮັດກິດຈະກຳນອກຫ້ອງຮຽນເພື່ອເປັນການເພີ່ມສັກ ກະຍະພາບໃນການພັດທະນາທາງດ້ານໄອທີຂອງຄົນລາວໄດ້ມີປະສິດທິພາບທຽບເທົ່າລະດັບສາກົນ, ໂດຍການລິເລີ່ມແນວ ຄວາມຄິດຂັ້ນພື້ນຖານ, ການອອກແບບ, ຈິນຕະນາການ ບວກກັບທິດສະດີທີ່ໄດ້ຮຽນມາແລ້ວນຳມາສ້າງເປັນ ແອັບພລີເຄຊັນ ທີ່ສາມາດນຳໃຊ້ໄດ້ແທ້ຈິງ ທັງນີ້ ກໍເພື່ອນຳເອົາຄວາມຮູ້ເຫລົ່ານັ້ນມາພັດທະນາພື້ນຖານໂຄງລ່າງ, ລະບົບການດຳລົງຊີວິດ ແລະ ອື່ນໆ ເພື່ອເປັນແນວທາງສູ່ອະນາຄົດທີ່ດີຂອງຄົນ, ຄອບຄົວ, ສະຖາບັນ ແລະ ປະເທດຊາດ.

     ທ່ານ ຄຳສຸກ ໂກມຸດຕະພົງ ຕາງໜ້າບໍລິສັດ ໄທຊຳຊຸງ ເອເລັກໂທນິກ ຈຳກັດ ປະຈຳລາວ ກ່າວວ່າ: ໂຄງການດັ່ງກ່າວເປັນ ການຮຽນຮູ້ການສຶກສາໂດຍຄົນລາວສູ່ສາກົນ, ໂດຍບໍລິສັດຂອງຕົນໄດ້ໃຫ້ທຶນສະໜັບສະໜູນໂຄງການທີ່ຈະຊ່ວຍໃຫ້ປະເທດ ລາວມີນັກພັດທະນາດ້ານໄອທີເກີດຂຶ້ນ, ໂດຍສະເພາະແມ່ນພັດທະນາທາງດ້ານຄອມພິວເຕີ ແລະ ໄອທີ ທີ່ສັງຄົມລາວກຳລັງ ຕ້ອງການບຸກຄະລາກອນທີ່ມີຄວາມສາມາດ ແລະ ມີສັກກະຍະພາບທີ່ພຽບພ້ອມຮັບໃຊ້ວຽກງານການພັດທະນາດ້ານ ຕ່າງໆໃນສະພາວະທີ່ມີການແຂ່ງຂັນນັບມື້ສູງນັ້ນໄດ້ຢ່າງມີປະສິດທິພາບສູງ, ໃນການປະຕິບັດຕົວຈິງແລ້ວໃນໄລຍະຜ່ານມາ, ສາມາດຕີ​ລາຄາໄດ້ວ່າ: ການດຳເນີນງານແມ່ນກົງຕາມແຜນການທີ່ໄດ້ກຳນົດໄວ້, ນັກຮຽນ, ນັກສຶກສາ-ຜູ້ເຂົ້າຮ່ວມໂຄງການດັ່ງ ກ່າວມີສັກກະຍະພາບທີ່ດີຂຶ້ນໄດ້ໃຫ້ຄວາມສົນໃຈຫລາຍຂຶ້ນ, ການເຂົ້າເຖິງໂຄງການຂອງບຸກຄົນທົ່ວໄປແມ່ນໄດ້ຮັບ ຜົນຕອບຮັບທີ່ດີ ແລະ ແອບພລີເຄຊັນທີ່ຖືກສ້າງຂຶ້ນສາມາດນຳໃຊ້ໄດ້ຢ່າງມີປະສິດທິພາບສູງ.