laophatthananewspaper: ຄຳນັບຊົມເຊີຍກອງປະຊຸມໃຫຍ່ຜູ້ແທນທົ່ວປະເທດຄັ້ງທີ X ຂອງພັກປະຊາຊົນປະຕິວັດລາວຢ່າງສຸດໃຈ

ມື້ນີ້ (18 ມັງກອນ 2016), ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ X ຂອງພັກປະຊາຊົນປະຕິວັດລາວທີ່ມີກຽດສະຫງ່າໄດ້ໄຂຂຶ້ນຢ່າງເປັນທາງການຢູ່ຫໍປະຊຸມແຫ່ງຊາດ ທີ່ນະຄອນຫລວງວຽງຈັນ, ເຂົ້າຮ່ວມກອງປະຊຸມມີສະຫາຍ ຈູມມາລີ ໄຊຍະສອນ ເລຂາທິການໃຫຍ່, ປະທານປະເທດ, ບັນດາສະຫາຍກຳມະການກົມການເມືອງ, ຄະນະເລຂາທິການ ແລະ ກຳມະການສູນກາງພັກສະໄໝທີ IX ຮ່ວມກັບຜູ້ແທນສົມບູນຈາກຂະແໜງການ, ອົງການອ້ອມຂ້າງສູນກາງ ແລະ ທ້ອງຖິ່ນທົ່ວປະເທດຈຳນວນ 684 ສະຫາຍ, ຍິງ 82 ສະຫາຍ ທີ່ຕາງໜ້າໃຫ້ສະມາຊິກພັກທັງໝົດສອງແສນກວ່າສະຫາຍໃນທົ່ວປະເທດ. ພ້ອມນັ້ນຍັງມີສະຫາຍ ພົນເອກ ຄຳໄຕ ສີພັນດອນ ອະດີດປະທານພັກ, ປະທານປະເທດ; ສະຫາຍ ພົນໂທ ສະໝານ ວິຍະເກດ ອະດີດກົມການເມືອງ, ປະທານສະພາແຫ່ງຊາດ ແລະ ພົນເອກ ສີສະຫວາດ ແກ້ວບຸນພັນ ອະດີດກົມການເມືອງ, ປະທານສູນກາງແນວລາວສ້າງຊາດ ພ້ອມແຂກຜູ້ມີກຽດຈາກຂະແໜງການ, ອົງການ ແລະ ທ້ອງຖິ່ນທົ່ວປະເທດຈຳນວນ 400 ກວ່າທ່ານ, ຍິງ 60 ກວ່າທ່ານ.

ກອງປະຊຸມຜູ້ແທນທົ່ວປະເທດຄັ້ງທີ X ຂອງພັກເຮົາແມ່ນເຫດການປະຫວັດສາດທີ່ມີຄວາມໝາຍສຳຄັນເປັນພິເສດໃນຊີວິດການເມືອງຂອງພັກ, ຂອງຊາດ ແລະ ປະຊາຊົນລາວບັນດາເຜົ່າ; ແມ່ນຂີດໝາຍແຫ່ງການເຕີບໃຫຍ່ຂະຫຍາຍຕົວສູ່ປະລິມານ ແລະ ຄຸນນະພາບໃໝ່ຂອງພັກເຮົາ. ກອງປະຊຸມໄດ້ໄຂຂຶ້ນໃນທ່າມກາງບັນຍາກາດແຫ່ງຄວາມເບີກບານມ່ວນຊື່ນທີ່ທົ່ວພັກ, ທົ່ວລັດ, ກຳລັງປະກອບອາ ວຸດ ແລະ ປະຊາຊົນລາວບັນດາເຜົ່າຫາກໍສຳເລັດການສະເຫລີມສະຫລອງວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 60 ປີ, ວັນຊາດທີ 2 ທັນວາ ຄົບຮອບ 40 ປີ ແລະ ວັນເກີດຂອງປະທານ ໄກສອນ ພົມວິຫານ ຜູ້ນຳທີ່ເຄົາລົບຮັກຂອງປະຊາຊົນເຮົາ ຄົບຮອບ 95 ປີ ເຊິ່ງແມ່ນໄລຍະເວລາທີ່ປະເທດຊາດຂອງພວກເຮົາໄດ້ຮັບການພັດທະນາທີ່ບໍ່ເຄີຍມີມາກ່ອນໃນປະຫວັດສາດຂອງຊາດເຮົາດັ່ງສະຫາຍ ຈູມມາລີ ໄຊຍະສອນ ເລຂາທິການໃຫຍ່, ປະທານປະເທດ ໄດ້ກ່າວໃນໂອກາດສະຫລອງວັນຊາດທີ 2 ທັນວາ ຄົບຮອບ 40 ປີວ່າ: “ບໍ່ມີຍຸກໃດສະໄໝໃດທີ່ປະເທດຊາດອັນແສນຮັກຂອງພວກເຮົາໄດ້ມີຄວາມຮົ່ມເຢັນເປັນສຸກ, ໄດ້ຮັບການພັດທະນາຈະເລີນກ້າວໜ້າ ແລະ ຖານະບົດບາດຂອງປະເທດເຮົາໄດ້ນັບມື້ນັບສູງເດັ່ນຂຶ້ນໃນເວທີພາກພື້ນ ແລະ ສາກົນຄືສູ່ມື້ນີ້”.

ພາຍໃຕ້ການນຳພາຂອງພັກ ປະເທດຊາດຂອງພວກເຮົາໄດ້ມີເອກະລາດ, ອຳນາດອະທິປະໄຕ, ປະຊາຊົນເຮົາໄດ້ມີອິດສະລະພາບ ແລະ ເປັນເຈົ້າຂອງປະເທດຊາດຢ່າງແທ້ຈິງ, ພາຍໃນຊາດມີຄວາມສາມັກຄີເປັນປຶກແຜ່ນແໜ້ນແກ່ນ, ສັງຄົມມີຄວາມສະຫງົບ ແລະ ຄວາມເປັນລະບຽບຮຽບຮ້ອຍໂດຍພື້ນຖານ, ພື້ນຖານເສດຖະກິດແຫ່ງຊາດມີການຂະຫຍາຍຕົວຢ່າງເປັນລະບົບຄົບຊຸດ, ຍອດມູນຄ່າຜະລິດຕະພັນພາຍໃນເພີ່ມຂຶ້ນຢ່າງຕໍ່ເນື່ອງ, ລາຍຮັບສະເລ່ຍໃສ່ຫົວຄົນໃນປີ 2015 ບັນລຸໄດ້ 1.970 ໂດລາສະຫະລັດ, ລື່ນປີ 1985 ເຖິງ 16 ເທົ່າກວ່າ, ຄອບຄົວທຸກຍາກຫລຸດລົງຍັງເຫລືອພຽງ 6,59%, ອັດຕາຊົມໃຊ້ໄຟຟ້າໃນຄົວເຮືອນຂອງປະຊາຊົນໃນທົ່ວປະເທດກວມເ 89%, ບັນດາເມືອງໃນທົ່ວປະເທດນຳໃຊ້ໂທລະສັບ 100%, ມີເສັ້ນທາງລົດທັງໝົດ 51.597 ກມ ແລະ ທຸກເມືອງມີເສັ້ນທາງລົດໄປໄດ້ສອງລະດູ. ພິເສດຜົນສຳເລັດທີ່ບໍ່ເຄີຍມີໃນປະຫວັດສາດຂອງຊາດລາວແມ່ນພວກເຮົາໄດ້ສຳເລັດການສົ່ງດາວທຽມສື່ສານດວງທຳອິດຂຶ້ນສູ່ວົງໂຄຈອນ ແລະ ໄດ້ສຳເລັດການວາງສີລາລືກໂຄງການກໍ່ສ້າງທາງລົດໄຟ ລາວ-ຈີນ ໃນໂອກາດສະເຫລີມສະຫລອງວັນຊາດທີ 2 ທັນວາ ຄົບຮອບ 40 ປີຜ່ານມາ.

ໄປຄຽງຄູ່ກັບການຂະຫຍາຍເສດຖະກິດນັ້ນ, ພັກ ແລະ ລັດ ຍາມໃດກໍຖືສຳຄັນຕໍ່ການພັດທະນາວັດທະນະທຳ-ສັງຄົມ ໂດຍໄດ້ເອົາໃຈໃສ່ຢ່າງຈົດຈໍ່ຕໍ່ການພັດທະນາຊັບພະຍາກອນມະນຸດ, ຊຸກຍູ້ສົ່ງເສີມການສຶກສາແຫ່ງຊາດໃຫ້ຂະຫຍາຍຕົວ, ຕາມທິດທີ່ມີລັກສະນະຊາດ, ວິທະຍາສາດ ແລະ ມະຫາຊົນ. ການປະຕິຮູບການສຶກສາທີ່ຖືເອົາຄຸນນະພາບເປັນຕົ້ນຕໍໄດ້ມີຄວາມຄືບໜ້າໄວສົມຄວນ. ມາຮອດປີ 2015 ສປປ ລາວ ໄດ້ປະກາດຈົບຊັ້ນປະຖົມບຳລຸງທົ່ວປະເທດ ແລະ ຫລາຍແຂວງກໍໄດ້ປະກາດ ແລະ ກຽມປະກາດເປັນແຂວງຈົບມັດທະຍົມຕົ້ນຢ່າງເປັນຂະບວນ. ຕາໜ່າງບໍລິການດ້ານສາທາລະນະສຸກທັງຂອງລັດ ແລະ ສັງຄົມໄດ້ຂະຫຍາຍກວ້າງອອກໄປສູ່ຮາກຖານ, ບ້ານແບບຢ່າງດ້ານສາທາລະນະສຸກກໍເພີ່ມຂຶ້ນ, ອັດຕາການຕາຍຂອງແມ່ ແລະ ເດັກຫລຸດລົງຫລາຍ, ອາຍຸຍືນສະເລ່ຍຂອງຄົນລາວກໍໄດ້ເພີ່ມຂຶ້ນ, ວຽກງານຖະແຫລງຂ່າວສື່ມວນຊົນທັງພາກລັດ ແລະ ສັງຄົມໄດ້ຮັບການຂະຫຍາຍຕົວທັງປະລິມານ ແລະ ຄຸນນະພາບກ້າວສູ່ຄວາມທັນສະໄໝເພື່ອການເຊື່ອມໂຍງ, ຄຽງຄູ່ກັນນັ້ນມູນມໍລະດົກວັດທະນະທຳອັນດີງາມຂອງຊາດໄດ້ຮັບການອະນຸລັກຮັກສາ ແລະ ສືບທອດເສີມຂະຫຍາຍໃຫ້ອຸດົມຮັ່ງມີໄປພ້ອມກັບການສ້າງແບບແຜນດຳລົງຊີວິດທີ່ສົດໃສກ້າວໜ້າ, ການກິລາ ແລະ ທ່ອງທ່ຽວໄດ້ຮັບການພັດທະນາ, ວຽກງານສະຫວັດດີການສັງຄົມໄດ້ຮັບຄວາມເອົາໃຈໃສ່ຫລາຍຂຶ້ນ, ຄອບຄົວ ແລະ ຜູ້ທີ່ເສຍສະລະຊີວິດ, ເສຍອົງຄະທີ່ມີຜົນງານຕໍ່ປະເທດຊາດໄດ້ຮັບການເບິ່ງແຍງດູແລ, ການປະຕິບັດນະໂຍບາຍຕອບບຸນແທນຄຸນໄດ້ຮັບການປະຕິບັດເປັນຢ່າງດີ, ຄວາມຍຸຕິທຳທາງສັງຄົມນັບມື້ນັບດີຂຶ້ນ.

ໃນດ້ານວຽກງານພັກ ແລະ ປັບປຸງການຈັດຕັ້ງ ນັບແຕ່ມື້ສ້າງຕັ້ງພັກປະຊາຊົນລາວ ກໍຄືພັກປະຊາຊົນປະຕິວັດລາວ ໃນວັນທີ 22 ມີນາ 1955 ມາຮອດປັດຈຸບັນ, ພັກເຮົາໄດ້ເຕີບໃຫຍ່ຂະຫຍາຍ ຕົວທັງດ້ານປະລິມານ, ຄຸນນະພາບ ແລະ ໄດ້ດຳເນີນກອງປະຊຸມໃຫຍ່ຂອງຕົນມາໄດ້ແລ້ວ 9 ຄັ້ງ ນັບທັງສະມາຊິກພັກໄດ້ເພີ່ມຂຶ້ນຢ່າງຕໍ່ເນື່ອງຈາກ 400 ສະຫາຍ ໃນປີ 1955 ມາເປັນສອງແສນກວ່າສະຫາຍໃນປີ 2015.

ທັງໝົດນັ້ນແມ່ນຜົນງານ ແລະ ໄຊຊະນະທີ່ຍາດມາໄດ້ພາຍໃຕ້ການຊີ້ນຳ ແລະ ນຳພາຂອງພັກ ປປ ລາວ ໃນພາລະກິດປົກປັກຮັກສາ ແລະ ສ້າງສາປະເທດຊາດ ໂດຍສະເພາະໃນໄລຍະດຳເນີນພາລະກິດປ່ຽນແປງໃໝ່ເປັນຕົ້ນມາ ເຊິ່ງແມ່ນປະທານ ໄກສອນ ພົມວິຫານ ເປັນຜູ້ນຳພາລິເລີ່ມ.

ສັງລວມແລ້ວກອງປະຊຸມໃຫຍ່ຂອງພັກແຕ່ລະຄັ້ງ ລ້ວນແລ້ວແຕ່ເປັນເຫດການອັນສຳຄັນຍິ່ງໃນຊີວິດການເມືອງ-ສັງຄົມຂອງປະເທດເຮົາ ເພາະວ່າກອງປະຊຸມໃຫຍ່ແມ່ນອົງການນຳສູງສຸດຂອງພັກທີ່ຕົກລົງຮັບຮອງເອົາແນວທາງການເມືອງ ແລະ ແນວທາງການຈັດຕັ້ງທີ່ເປັນຍຸດທະສາດຂອງການປະຕິວັດ ເພື່ອນຳພາປະເທດຊາດກ້າວສູ່ຄວາມມັ່ງຄັ່ງເຂັ້ມແຂງ, ນຳເອົາຄວາມຮັ່ງມີຜາສຸກມາສູ່ປະຊາຊົນ.

ຕະຫລອດວາລະດຳເນີນກອງປະຊຸມທັງ 5 ວັນ (18-22/1/2016) ຜູ້ແທນສົມບູນຈະໄດ້ຄົ້ນຄວ້າ ແລະ ຮັບຮອງເອົາລາຍງານການເມືອງຂອງຄະນະບໍລິຫານງານສູນກາງພັກ, ແຜນພັດທະ ນາເສດຖະກິດ-ສັງຄົມແຫ່ງຊາດ 5 ປີຄັ້ງທີ VIII ສຳລັບໄລຍະ 2016-2020 ດ້ວຍການສູ້ຊົນນຳເອົາປະເທດຊາດເຮົາຫລຸດພົ້ນອອກຈາກຄວາມດ້ອຍພັດທະນາໃນປີ 2020, ໃນນັ້ນສູ້ຊົນເຮັດໃຫ້ລວມຍອດມູນຄ່າຜະລິດຕະພັນພາຍໃນ (GDP) ຂະຫຍາຍຕົວສະເລ່ຍບໍ່ໃຫ້ຫລຸດ 7,5% ຕໍ່ປີ, ສ້າງໂຄງປະກອບເສດຖະກິດທີ່ມີຄວາມສົມສ່ວນ, ແທດກັບເງື່ອນໄຂຂອງບໍລິເວນເຂດແຄວ້ນຕ່າງໆ, ແກ້ໄຂຄອບຄົວທຸກຍາກໃນທົ່ວປະເທດໃຫ້ໄດ້ຢ່າງສົມບູນ ແນໃສ່ສ້າງປະເທດເຮົາໃຫ້ມີພື້ນຖານໂຄງການເສດຖະກິດ-ເຕັກນິກ, ວັດທະນະທຳ, ວິທະຍາສາດ ແລະ ບຸກຄະລາກອນ ເພື່ອຮອງຮັບການຫັນເປັນອຸດສາຫະກຳ ແລະ ທັນສະໄໝ.

ກອງປະຊຸມຍັງຈະໄດ້ຮັບຮອງເອົາລະບຽບຂອງພັກສະບັບປັບປຸງ ແລະ ດຳເນີນການເລືອກຕັ້ງເອົາຄະນະບໍລິຫານງານສູນກາງພັກທີ່ມີມາດຖານຄົບຖ້ວນທີ່ປະກອບໄປດ້ວຍຄຸນທາດການເມືອງ, ຄຸນສົມບັດສິນທຳປະຕິວັດ, ແບບແຜນດຳລົງຊີວິດ ແລະ ປະກອບມີທັງລຸ້ນອາວຸໂສ, ກາງ ແລະ ໜຸ່ມ ເພື່ອສືບຕໍ່ນຳພາພາລະກິດປະຕິວັດປະເທດເຮົາໃຫ້ກ້າວຂຶ້ນຢ່າງຕໍ່ເນື່ອງໜັກແໜ້ນສູ່ຈຸດໝາຍທີ່ວາງໄວ້ດ້ວຍຈິດໃຈບຸກທະລຸຄື “ຍົກສູງຄວາມສາມາດນຳພາ ແລະ ລັກສະນະນຳໜ້າຂອງພັກ, ເພີ່ມທະວີມະຫາສາມັກຄີທົ່ວປວງຊົນທັງຊາດ, ຍຶດໝັ້ນແນວທາງປ່ຽນແປງໃໝ່ຮອບດ້ານທີ່ມີຫລັກການ, ປົກປັກຮັກສາ ແລະ ພັດທະນາປະເທດຊາດຕາມທິດຍືນຍົງ, ສີຂຽວສູ່ຈຸດໝາຍສັງຄົມນິຍົມ”. ທັງໝົດນີ້ແມ່ນໜ້າທີ່ສຳຄັນທີ່ກອງປະຊຸມໃຫຍ່ຂອງພັກເຮົາຄັ້ງນີ້ຕ້ອງປະຕິບັດດ້ວຍຄວາມຮັບຜິດຊອບສູງ ແລະ ຕ້ອງປະຕິບັດໃຫ້ມີຜົນສຳເລັດອັນຈົບງາມ ເພື່ອການເຕີບໃຫຍ່ເຂັ້ມແຂງຂອງພັກ ແລະ ການຂະຫຍາຍ ຕົວຂອງປະເທດຊາດ. ສະນັ້ນ ຜູ້ແທນກອງປະຊຸມໃຫຍ່ທຸກສະຫາຍຕ້ອງໄດ້ເຊີດຊູຄວາມເປັນເຈົ້າການ ແລະ ຄວາມຮັບຜິດຊອບໃນລະດັບສູງ, ສຸມສະຕິປັນຍາ ແລະ ປະສົບການເຂົ້າໃສ່ການຄົ້ນຄວ້າ-ຕົກ ລົງບັນຫາສຳຄັນໃຫ້ເລິກເຊິ່ງຖືກຕ້ອງ, ປະກອບສ່ວນເຮັດໃຫ້ກອງປະຊຸມໃຫຍ່ນີ້ດຳເນີນໄປດ້ວຍຄວາມສາມັກຄີ ເປັນເອກະພາບອັນໜັກແໜ້ນ ແລະ ມີຜົນສຳເລັດຢ່າງຈົບງາມ.

ທົ່ວພັກ, ທົ່ວລັດ, ທົ່ວກຳລັງປະກອບອາວຸດ ແລະ ທົ່ວປວງຊົນລາວທັງຊາດພວມອວ່າຍໜ້າເຂົ້າຫາກອງປະຊຸມໃຫຍ່ຜູ້ແທນທົ່ວປະເທດຄັ້ງທີ X ຂອງພັກ ປປ ລາວ ດ້ວຍຄວາມເປັນເຈົ້າການຕິດຕາມຜົນການເຄື່ອນໄຫວຂອງກອງປະຊຸມໃຫຍ່ຢ່າງຈົດຈໍ່ ແລະ ສຸດກົກສຸດປາຍ, ພ້ອມທັງສະແດງຄວາມຄຳນັບຊົມເຊີຍ ແລະ ອວຍພອນໃຫ້ກອງປະຊຸມໃຫຍ່ຄັ້ງທີ X ຂອງພັກຈົ່ງດຳເນີນໄປດ້ວຍຜົນສຳເລັດຕາມຈຸດປະສົງ ແລະ ລະດັບຄາດໝາຍທີ່ວາງໄວ້ທຸກປະການ ແນໃສ່ເຮັດໃຫ້ປະຊາຊົນຮັ່ງມີຜາສຸກ, ປະເທດຊາດມັ່ງຄັ່ງເຂັ້ມແຂງ, ສັງຄົມສາມັກຄີປອງດອງ, ປະຊາທິປະໄຕ, ຍຸຕິທຳ ແລະ ສີວິໄລ.

ຄຳນັບຊົມເຊີຍກອງປະຊຸມໃຫຍ່ຜູ້ແທນທົ່ວປະເທດຄັ້ງທີ X ຂອງພັກ ປປ ລາວ ຢ່າງສຸດໃຈ !.

3 comments:

Phone Number Generator19/07/2024, 14:12
Count Lao words effortlessly with this specialized tool is designed to accurately tally the number of words in any Lao text, providing instant results to help you manage and analyze your content efficiently.
Eazy Decor10/08/2024, 00:37
Elevate your interior design with a broad selection of blinds in Pakistan, featuring everything from sleek roller and Venetian styles to versatile vertical and sheer options, each providing optimal light control, privacy, and a touch of elegance to any space.
Wedding Photographer in Hudson Valley31/08/2024, 15:07
Celebrate your wedding with a Poughkeepsie wedding photographer, who brings a blend of artistry and personal touch to every moment of your day. Poughkeepsie’s scenic beauty, from its iconic river views to its historic landmarks, provides an exceptional backdrop for capturing your wedding memories.