ປກສ ອອກແຈ້ງການໃຫ້ເພີ່ມທະວີການສະກັດກັ້ນ ແລະ ຕ້ານອັກຄີໄພໃນລະດູແລ້ງ

            ເມື່ອບໍ່ດົນມານີ້, ກະຊວງປ້ອງກັນຄວາມສະຫງົບໄດ້ອອກແຈ້ງການເຖິງກອງບັນຊາການ ປກສ ແຂວງ, ນະຄອນຫລວງ, ສຳນັກງານ-ອົງການ, ຫົວໜ່ວຍທຸລະກິດທັງພາກລັດ ແລະ ເອກະຊົນຕະຫລອດຮອດພື້ນຖານປະຊາຊົນບັນດາເຜົ່າໃນທົ່ວປະເທດໃຫ້ເພີ່ມທະວີການສະກັດກັ້ນ ແລະ ຕ້ານອັກຄີໄພໃນລະດູແລ້ງປີນີ້, ພາຍຫລັງເຫັນວ່າຊ່ວງໄລຍະລະດູດັ່ງກ່າວມັກມີອັກຄີໄພເກີດຂຶ້ນຫລາຍ.

     ແຈ້ງການດັ່ງກ່າວລະບຸວ່າ: ໃນລະດູແລ້ງຜ່ານມາຢູ່ປະເທດເຮົາ, ເວົ້າສະເພາະຢູ່ບັນດາຕົວເມືອງໃຫຍ່, ບ່ອນຊຸມຊົນແໜ້ນໜາ ແລະ ເຂດຊົນນະບົດໄດ້ມີເຫດການໄຟໄໝ້ເຮືອນ, ເລົ້າເຂົ້າ, ຕະຫລາດ, ຮ້ານຄ້າ, ສາງ, ໂຮງງານ, ສຳນັກງານ, ຫ້ອງການ,ໄຟໄໝ້ລາມປ່າ ແລະ ບ່ອນຊຸມຊົນອື່ນໆ, ສ້າງຜົນເສຍຫາຍໃຫ້ແກ່ພື້ນຖານເສດຖະກິດ, ວັດທະນະທຳ-ສັງຄົມ, ຊີວິດ, ຊັບສິນຂອງລັດ, ລວມໝູ່ເປັນຈຳນວນ

ຫລວງຫລາຍ. ໂດຍສາເຫດສ່ວນຫລາຍແມ່ນເກີດຈາກໄຟຟ້າລັດວົງຈອນ ແລະ ເກີດຈາກຕົວບຸກຄົນທີ່ຂາດສະຕິລະວັງຕົວ, ຂາດຄວາມຮັບຜິດຊອບ, ຄວາມຮູ້ເທົ່າບໍ່ເຖິງການ ແລະ ການກວດກາບໍ່ຮອບຄອບ ເປັນຕົ້ນແມ່ນການນຳໃຊ້ໄຟຟ້າເຂົ້າໃນການຜະລິດ, ການດຳເນີນທຸລະກິດ, ການດຳລົງຊີວິດປະຈຳວັນ, ຈູດຂີ້ເຫຍື້ອ, ຈູດປ່າ, ຈູດໄຮ່, ໄຕ້ທູບທຽນບູຊາ, ຖິ້ມກິດກອກຢາແບບຊະຊາຍ, ສະນັ້ນ ເພື່ອສະກັດກັ້ນບໍ່ໃຫ້ມີເຫດການໄຟໄໝ້ເກີດຂຶ້ນຮ້າຍແຮງ ແລະ ມີຜົນເສຍຫາຍອັນໃຫຍ່ຫລວງຕໍ່ສັງຄົມ, ໂດຍສະເພາະໃນລະດູແລ້ງປີນີ້ຈະມີຫລາຍເຫດການໃຫຍ່ເກີດຂຶ້ນຄື: ກອງປະຊຸມສຸດຍອດອາຊຽນ, ການສະເຫລີມສະຫລອງວັນສ້າງຕັ້ງກຳລັງ ປກສ ຄົບຮອບ 55 ປີ, ວັນບຸນປີໃໝ່ລາວ ແລະ ອື່ນໆ. ດັ່ງນັ້ນ ຈຶ່ງຮຽກຮ້ອງໃຫ້ທຸກພາກສ່ວນສັງຄົມປະຕິບັດດັ່ງນີ້:(1) ຈັດມ້ຽນວັດຖຸສິ່ງຂອງ ແລະ ເຄື່ອງໃຊ້ຕ່າງໆຢູ່ໃນສະຖານທີ່ທຳການຜະລິດ, ໃນບ້ານເຮືອນ, ບ່ອນເຮັດວຽກ ແລະ ທີ່ພັກອາໄສໃຫ້ເປັນລະບຽບຮຽບຮ້ອຍ, ບໍ່ປ່ອຍປະໃຫ້ຮົກເຮື້ອ, ຊະຊາຍ, ຕ້ອງຈັດໄວ້ສະຖານທີ່ມີຄວາມປອດໄພ, ຫ່າງຈາກແຫລ່ງໄຟທີ່ອາດເກີດໄໝ້ໄດ້ເຊັ່ນ: ເຕົາດັງໄຟແຕ່ງກິນ, ເຕົາໄຟຟ້າ, ເຕົາລີດ ຫລື ອຸປະກອນທີ່ມີຄວາມຮ້ອນອື່ນໆ.

(2) ບ່ອນໄຕ້ທູບທຽນບູຊາຕ້ອງຮັບປະກັນຄວາມປອດໄພ, ຮ້ານບູຊາຕ້ອງເຮັດດ້ວຍວັດຖຸທີ່ໄໝ້ຍາກ, ຫ່າງໄກຈາກບ່ອນທີ່ມີເຊື້ອໄຟ, ທຸກຄັ້ງທີ່ມີການໄຕ້ທູບທຽນບູຊາຕ້ອງເອົາໃຈໃສ່ຕິດຕາມຈົນໄຟມອດລະອຽດຈຶ່ງອອກໄປທາງອື່ນ. (3)ຫ້າມຈູດຂີ້ເຫຍື້ອຊະຊາຍໃກ້ເຮືອນ, ສາງ, ຕະຫລາດ, ບ່ອນຊຸມຊົນໜາແໜ້ນ, ສະຖານທີ່ທຳການຜະລິດ ແລະ ບ່ອນທີ່ມີວັດຖຸໄວໄຟຕ່າງໆທີ່ອາດເກີດໄຟໄໝ້ລາມໄດ້.(4) ການນຳໃຊ້ໄຟຟ້າເຂົ້າໃນການຜະລິດ, ການດຳລົງຊີວິດປະຈຳວັນ ຫລື ວຽກງານອື່ນໆ ຕ້ອງປະຕິບັດຕາມຂໍ້ກຳນົດຫລັກການຂອງບໍລິສັດໄຟຟ້າວາງອອກຢ່າງເຂັ້ມງວດ, ເອົາໃຈໃສ່ກວດກາສາຍໄຟຟ້າ, ອຸປະກອນ-ເຄື່ອງໃຊ້ໄຟຟ້າຕ່າງໆໃຫ້ຢູ່ໃນສະພາບສົມບູນ, ຖ້າເຫັນວ່າເກົ່າແກ່ເປ່ເພບໍ່ຮັບປະ ກັນຕ້ອງປ່ຽນໃໝ່, ທຸກຄັ້ງທີ່ໃຊ້ຟືນໄຟ ແລະ ອຸປະກອນ-ເຄື່ອງໃຊ້ໄຟຟ້າສຳເລັດແລ້ວ ຫລື ກ່ອນອອກຈາກບ້ານເຮືອນ, ບ່ອນເຮັດວຽກ, ຄ້າຂາຍ,ເຂົ້ານອນ ຫລື ທຳພາລະກິດອື່ນໆ ຕ້ອງກວດກາເຕົາແກັສ, ເຄື່ອງໃຊ້ໄຟຟ້າ, ຖອດປັກສຽບ ແລະ ມອດຟືນໄຟໃຫ້ລະອຽດ.(5) ການຄຸ້ມຄອງ, ນຳໃຊ້, ຂົນສົ່ງ ແລະ ຈຳໜ່າຍວັດຖຸໄວໄຟ-ອາຍແກັສ-ທາດເຄມີຕ້ອງປະຕິບັດຕາມມາດຕະຖານຄວາມປອດໄພທາງດ້ານອັກຄີໄພຢ່າງເຂັ້ມງວດ.(6) ຫ້າມນໍາເອົານ້ຳມັນເຊື້ອໄຟ, ທາດເຄມີ, ວັດຖຸໄໝ້ລະເບີດມາເກັບໄວ້ໃນເຮືອນ, ບ່ອນເຮັດວຽກ, ທີ່ພັກອາໄສ ຫລື ບ່ອນທີ່ມີແຫລ່ງຄວາມຮ້ອນສູງ, ເດັດຂາດບໍ່ໃຫ້ນຳເອົານ້ຳມັນໃສ່ແກ້ວ, ຝຸ່ຍວາງຂາຍຕາມໜ້າບ້ານເຮືອນ, ຮ້ານຂາຍເຄື່ອງ, ຮ້ານສ້ອມແປງ. ສໍາລັບຢູ່ສາງ ຫລື ປ້ຳນ້ຳມັນຕ້ອງມີການກວດກາການຮົ່ວໄຫລຂອງນ້ຳມັນ, ມີຂໍ້ກຳນົດກົດລະບຽບ ແລະ ວິທີສະກັດກັ້ນອັກຄີໄພຢ່າງເຂັ້ມງວດ.(7) ການປຸກສ້າງອາຄານຕ່າງໆ,ປ້ຳບໍລິການນ້ຳມັນ, ສາງນ້ຳ

ມັນ,ບ່ອນອັດ-ຈຳໜ່າຍອາຍແກັສ ແລະ ວັດຖຸໄຟທຸກຊະນິດຕ້ອງມີລະບົບສະກັດກັ້ນ ແລະ ຕ້ານອັກຄີໄພໃຫ້ພຽງພໍໂດຍຜ່ານການກວດກາມາດຕະຖານຄວາມປອດໄພທາງດ້ານອັກຄີໄພຈາກກຳລັງຕຳ ຫລວດສະກັດກັ້ນ ແລະ ຕ້ານອັກຄີໄພ.(8)ບັນດາສຳນັກງານ-ອົງການ,ພື້ນຖານປະຊາຊົນ ແລະ ອຳນາດການປົກຄອງທ້ອງຖິ່ນ ຕ້ອງເພີ່ມທະວີຄວາມເອົາໃຈໃສ່ໃນການຈັດຕັ້ງປ້ອງກັນເວນຍາມໃນສະຖານທີ່ທີ່ຕົນຮັບຜິດຊອບໃຫ້ເຂັ້ມງວດ ແລະ ກະກຽມອຸປະກອນມອດໄຟມາປະຈຳໄວ້ໃຫ້ພຽງພໍ ພ້ອມທັງຈັດຕັ້ງເຝິກອົບຮົມວິທີການສະກັດກັ້ນ ແລະ ຕ້ານອັກຄີໄພໃຫ້ຄ່ອງແຄ້ວ ແລະ ມີການກຽມ ພ້ອມທຸກເວລາ.(9) ເວລາມີໄຟໄໝ້ເກີດຂຶ້ນຢູ່ສະຖານທີ່ໃດໜຶ່ງຜູ້ຮັບຜິດຊອບສະຖານທີ່ນັ້ນຕ້ອງເຕົ້າໂຮມກຳລັງ, ພາຊະນະ-ອຸປະກອນມອດໄຟເຂົ້າມອດໄຟເບື້ອງຕົ້ນ ແລະ ແຈ້ງໃຫ້ກຳລັງຕຳຫລວດສະກັດກັ້ນ ແລະ ຕ້ານອັກຄີໄພທີ່ຢູ່ໃກ້ທີ່ສຸດ,ພ້ອມກັນນັ້ນທຸກຄົນມີໜ້າເຂົ້າຮ່ວມມອດໄຟ, ປ້ອງກັນສະຖານທີ່ເກີດເຫດ ແລະ ໃຫ້ຄວາມຮ່ວມມືກັບເຈົ້າໜ້າທີ່ໃນການດຳເນີນສືບສວນ-ສອບສວນຄະດີອັກຄີໄພ.(10) ການຈູດປ່າເຮັດໄຮ່, ເຮັດສວນ,ເຜົາຖ່ານ, ຈູດເດີ່ນຫຍ້າຕ້ອງຮັບປະກັນບໍ່ໃຫ້ໄຟໄໝ້ລາມໃສ່ບ້ານເຮືອນ, ສຳນັກງານ-ອົງການ, ສາຍໄຟຟ້າ ແລະ ອື່ນໆ.(11) ກ່ອນຈະຈູດໄຮ່ຕ້ອງຖາງແລວກັນໄຟອ້ອມຮອບເນື້ອທີ່ໄຮ່ໃຫ້ຮັບປະກັນເສຍກ່ອນຈຶ່ງທຳການຈູດ, ການຈູດໄຮ່ຕ້ອງຈູດໃນຍາມແລງ, ຍາມແດດອ່ອນ ຫລື ຍາມຕາເວັນຕົກກິນ ແລະ ບໍ່ມີລົມແຮງ.(12) ເວລາເຂົ້າໄປໃນປ່າຖ້າຈະດັງໄຟກໍຕ້ອງມີການຖາງອ້ອມຮອບຄັກແນ່ເພື່ອປ້ອງກັນບໍ່ໃຫ້ໄຟລຸກລາມໄປສູ່ຈຸດອື່ນໄດ້. (13) ກ່ອນຈະຈາກໄປໃຫ້ມອດໄຟໃຫ້ດີ ແລະ ບໍ່ອະນຸຍາດໃຫ້ຈູດເຕົາ ຫລື ອູດຕົ້ນໄມ້, ປ່າຫຍ້າ ເພື່ອລ່າສັດປ່າ ຫລື ຈຸດປະສົງອື່ນຢ່າງເດັດຂາດ. (14) ບັນດາອາຄານສຳນັກງານ-ອົງການ, ບ້ານ

ເຮືອນທີ່ຕັ້ງຢູ່ໃກ້ປ່າ ຫລື ເດີ່ນຫຍ້າຕ້ອງມີສະຕິເປັນເຈົ້າການໃນການສະກັດກັ້ນໄຟໄໝ້ລາມປ່າ ແລະ (15) ເວລາມີໄຟໄໝ້ລາມປ່າຢູ່ບ່ອນໃດມອບໃຫ້ບ້ານ ແລະ ເມືອງນັ້ນເປັນຜູ້ຮັບຜິດຊອບໃນການປຸກລະດົມປະຊາຊົນຊ່ວຍກັນດັບມອດໄຟ, ກໍລະນີໄຟໄໝ້ລາມປ່າຮຸນແຮງບໍ່ສາມາດດັບມອດໄດ້ຕ້ອງຂໍຄວາມຊ່ວຍເຫລືອຈາກພາກສ່ວນອັກຄີໄພທີ່ຢູ່ໃກ້ຄຽງເພື່ອຊ່ວຍກັນມອດໄຟໄໝ້ປ່າ.