ລັດຖະມົນຕີກະຊວງພະລັງງານ
ແລະ ບໍ່ແຮ່ ທ່ານ ຄໍາມະນີ ອິນທິລາດ ແຈ້ງໃຫ້ຮູ້ເມື່ອທ້າຍອາທິດຜ່ານມານີ້ວ່າ: ປັດຈຸບັນ, ສປປ ລາວ ແລະ
ອີກຫລາຍປະເທດໃນພາກພື້ນພວມພະເຊີນກັບໄພແຫ້ງແລ້ງຮ້າຍແຮງແບບບໍ່ເຄີຍມີມາໃນຮອບຫລາຍສີບປີ.
ດັ່ງນັ້ນ ເພື່ອຊ່ວຍແກ້ໄຂສະພາບດັ່ງກ່າວ,ລັດຖະບານໄດ້ຊີ້ນໍາໃຫ້ຂະແໜງການກ່ຽວຂ້ອງປ່ອຍນ້ຳຢູ່ບັນດາເຂື່ອນສາຂາລົງສູ່ແມ່ນ້ຳຂອງຕື່ມເພື່ອແກ້ໄຂສະພາບໄພແຫ້ງແລ້ງຢູ່ໃນເຂດແມ່ນ້ຳຂອງຕອນລຸ່ມ, ໂດຍສະເພາະຢູ່ທົ່ງພຽງປາກແມ່ນ້ຳຂອງຫວຽດນາມທີ່ມີການປູກພືດກະສິກຳຢ່າງຫລວງຫລາຍ
ໂດຍສະເພາະໃນ 4 ສາຍນ້ຳສາຂາໃຫຍ່ຂອງນ້ຳຂອງຄື: ນ້ຳອູ, ນ້ຳຄານ, ນ້ຳງື່ມ ແລະ
ນ້ຳເທີນ. ດັ່ງນັ້ນ ຈະ
ເຮັດໃຫ້ການຜະລິດໄຟຟ້າບາງເຂື່ອນໃຫຍ່ຢູ່ພາກກາງ ແລະ ພາກໃຕ້
ມີຂອບເຂດຈຳກັດ,
ແຕ່ສະເພາະເຂື່ອນນ້ຳງື່ມແມ່ນມີນ້ຳພຽງພໍເພື່ອຜະລິດ
ໃນຂະນະທີ່ສາມາດປ່ອຍນ້ຳລົງສູ່ແມ່ນ້ຳຂອງໄດ້.
ໃນລະຫວ່າງວັນທີ 21-22 ມີນານີ້, ກະຊວງພະລັງງານ
ແລະ ບໍ່ແຮ່ປະເທດເຮົາໄດ້ມີກອງປະຊຸມເພື່ອປຶກສາຫາລືໃນການເກັບກຳຂໍ້ມູນຕື່ມກ່ຽວກັບການສະໜອງນ້ຳ
ເພື່ອຊ່ວຍແກ້ໄຂໄພແຫ້ງ ແລ້ງຢູ່ນ້ຳຂອງຕອນລຸ່ມ ແລະ ນັບແຕ່ວັນທີ 23 ມີນາເປັນຕົ້ນໄປນ້ທີ່ປ່ອຍຈາກເຂື່ອນຕ່າງໆໃນ ສປປ ລາວ
ລົງສູ່ແມ່ນ້ຳຂອງຕອນລຸ່ມມີປະມານ 1.136
ແມັດກ້ອນຕໍ່ວິນາທີບວກກັບນ້ຳທີ່ໄຫລມາຈາກນ້ຳມູນ ແລະ
ສາຍນ້ຳອື່ນໆຂອງປະເທດໄທທີ່ມີປະມານ 220 ແມັດກ້ອນຕໍ່ວິນາທີ ແລະ ນ້ຳທີ່ໄຫລຈາກປະເທດຈີນປະມານ
2.254 ແມັດກ້ອນຕໍ່ວິນາທີ
ລວມແລ້ວປະລິມານນ້ຳທັງໝົດຈາກແມ່ນ້ຳຂອງຜ່ານລາວລົງສູ່ກຳປູເຈຍ ແລະ ຫວຽດນາມ ຕອນໃຕ້ມີປະມານ
3.611 ແມັດກ້ອນຕໍ່ວິນາທີ, ໂດຍນ້ຳທີ່ປ່ອຍລົງຈະໄປຮອດເຂດດັ່ງກ່າວໃນວັນທີ 2 ເມສາ 2016
ເຊິ່ງຈະສາມາດຊ່ວຍແກ້ໄຂຜົນກະທົບກັບໄພແລ້ງທີ່ບັນດາປະເທດດັ່ງກ່າວພວມປະສົບຢູ່ໄດ້ໃນສ່ວນໃດໜຶ່ງ.
ທ່ານລັດຖະມົນຕີ ຢືນ ຢັນວ່າ: ສປປ ລາວ ມີແຜນສະໜອງນ້ຳຈົນຮອດທ້າຍເດືອນພຶດສະພາ 2016 ໄປຄຽງຄູ່ກັບການຮັບປະກັນໃຫ້ການຜະລິດກະແສໄຟຟ້າ
ເພື່ອສະໜອງໃຫ້ແກ່ການຊົມໃຊ້ຢູ່ພາຍໃນ ແລະ ສົ່ງອອກເປັນປົກກະຕິ.
ແຕ່ເຖິງຢ່າງໃດກໍຂໍຮຽກຮ້ອງມາຍັງຜູ້ປະກອບການຕ່າງໆທີ່ນຳໃຊ້ນ້ຳເພື່ອການຜະລິດຕ້ອງຮູ້ປະຢັດ
ແລະ ໃຊ້ນ້ຳໃຫ້ມີຜົນ.
ທ່ານລັດຖະມົນຕີກະຊວງດັ່ງກ່າວ ໃຫ້ຮູ້ວ່າ:
ການສ້າງເຂື່ອນໄຟຟ້ານ້ຳຕົກມີຄຸນປະໂຫຍດຫລາຍ ເພາະພວກເຮົາມີການນຳໃຊ້ແບບອາເນກປະສົງເປັນຕົ້ນ:
ເຂື່ອນໃຊ້ເພື່ອເກັກກັບນ້ຳໃນລະດູຝົນປ້ອງກັນບໍ່ໃຫ້ນ້ຳຖ້ວມຕອນລຸ່ມ ແລະ
ປ່ອຍນ້ຳໃຊ້ໃນລະດູແລ້ງ, ນອກນີ້ຍັງໃຊ້ເປັນເສັ້ນທາງຄົມມະ
ນາຄົມເປັນບ່ອນເພາະພັນສັດນ້ຳ, ເປັນແຫລ່ງທ່ອງທ່ຽວ
ແລະ
ເມື່ອມີໄພແຫ້ງແລ້ງຄືດັ່ງປັດຈຸບັນພວກເຮົາກໍສາມາດນຳໃຊ້ນ້ຳທີ່ກັກເກັບໄວ້ຢ່າງມີປະສິດທິຜົນ.
No comments:
Post a Comment