ໂຍທານະຄອນຫລວງ ເນັ້ນໃຫ້ບໍລິສັດຜູ້ຮັບເໝົາເຮັດສຳເລັດກໍ່ສ້າງສ້ອມແປງເສັ້ນທາງຈີນາຍໂມ້-ຊາຍຟອງໂດຍໄວ

           ໃນວັນທີ 24 ມີນາ ນີ້, ທ່ານ ຄຳເຜີຍ ວົງສາຄຳຜຸຍ ຜູ້ອຳນວຍການໃຫຍ່ ລັດວິສາຫະກິດນ້ຳປະປານະຄອນຫລວງ ແລະ ທ່ານ ຢັງ ໄມຈາວ(YAN MAICHAO) ປະທານ ບໍລິສັດ ຫາຍຫານການທຸລະກິດຈຳກັດ ໄດ້ຮ່ວມລົງນາມໃນສັນຍາ ຮັບເໝົາຍົກຍ້າຍທໍ່ນ້ຳປະປາອອກຈາກແລວທາງ ເພື່ອອຳນວຍຄວາມສະດວກແກ່ໂຄງການກໍ່ສ້າງເສັ້ນທາງ ແຕ່ສາມແຍກຈີ່ນາຍໂມ້-ບ້ານຫ້ອມ-ບ້ານຊາຍຟອງ ນະຄອນຫລວງວຽງຈັນ, ເຊິ່ງມີຄວາມຍາວ 14 ກິໂລແມັດ ໃນມູນຄ່າເກືອບ 6 ຕື້ກີບ.

          ພາຍຫລັງລົງນາມໃນສັນຍານີ້ແລ້ວ ຜູ້ຮັບເໝົາຕ້ອງໄດ້ຮີບຮ້ອນຈັດຕັ້ງປະຕິບັດ ໃຫ້ສຳເລັດ ພາຍໃນ 150 ວັນ ຕາມທີ່ກຳນົດໄວ້, ດັ່ງນັ້ນ ທາງພະແນກໂຍທາທິການ ແລະ ຂົນສົ່ງ, ວິສາຫະກິດນ້ຳປະປານະຄອນຫລວງ ແລະ ບໍລິສັດ ຫາຍຫານ ຈະຕ້ອງໄດ້ຮ່ວມກັນປຶກສາຫາລື ເພື່ອແກ້ໄຂສິ່ງກີດຂວາງໃນພາກສະໜາມ ເພື່ອເຮັດໃຫ້ການປະຕິບັດໂຄງການສຳເລັດລົງໂດຍໄວ້.

          ທ່ານ ເດດສົງຄາມ ທຳມະວົງ ຫົວໜ້າພະແນກໂຍທາທິການ ແລະ ຂົນສົ່ງ ນະຄອນຫລວງ ວຽງຈັນ, ເປີດເຜີຍວ່າ: ສຳລັບໂຄງການກໍ່ສ້າງທາງແຕ່ສາມແຍກຈີ່ນາຍໂມ້-ບ້ານຫ້ອມ-ບ້ານຊາຍຟອງ ເຊິ່ງແມ່ນບໍລິສັດ ຫາຍຫານ ການທຸລະກິດຈຳກັດ ເປັນຜູ້ຮັບເໝົາກໍ່ສ້າງ ເຊິ່ງມີການເຊັນສັນຍາກໍ່ສ້າງນຳກັນແຕ່ປີ 2015 ໂດຍມີກຳນົດ ຈະໃຫ້ສຳເລັດພາຍໃນປີ 2016, ແຕ່ມາເຖິງປັດຈຸບັນ ໂຄງການນີ້ບໍ່ມີຄວາມຄືບໜ້າ, ເຮັດໃຫ້ປະຊາຊົນ ມີຄວາມຄອງຄອຍ ແລະ ເກີດມີສຽງວິພາກວິຈານຫລາຍຕໍ່ຄວາມຫລ້າຊ້າດັ່ງກ່າວ.

ຢ່າງໃດກໍຕາມ ທາງພະແນກ ຍທຂ ກໍໄດ້ປຶກສາຫາລື ແລະ ຊຸກຍູ້ໃຫ້ບໍລິສັດດັ່ງກ່າວ, ສືບຕໍ່ປະຕິບັດໃຫ້ສຳເລັດ ຖ້າໝົດປີ 2016 ນີ້, ບໍ່ມີຄວາມຄືບໜ້າ ກໍຈະມີການຍົກເລີກ ແລະ ຈັດຫາບໍລິສັດໃໝ່ເຂົ້າມາດຳເນີນການຕໍ່ໄປໃຫ້ສຳເລັດຕາມແຜນລະບຸໄວ້.