ກົມຊົນລະປະທານກຽມພ້ອມສະໜອງນ້ຳໃຫ້ການຜະລິດລະດູແລ້ງນີ້ໄດ້ພຽງພໍ

ວັນທີ 24 ມີນານີ້, ທ່ານ ອຳໄພ ພັນນຸລັກ ຫົວໜ້າພະແນກຄຸ້ມຄອງການນຳໃຊ້ນ້ຳຊົນ ລະປະ ທານ, ກະຊວງກະສິກຳ ແລະ ປ່າໄມ້ຊີ້ແຈງຕໍ່ນັກຂ່າວພວກເຮົາວ່າ: ປັດຈຸບັນທົ່ວ ປະເທດເຮົາມີໂຄງ ການຊົນລະປະທານທັງໝົດ 11.672 ໂຄງການ,ຊຶ່ງມີຄວາມສາມາດຮັບປະກັນການສະໜອງນ້ຳໃຫ້ແກ່ເນື້ອທີ່ການຜະລິດລະດູແລ້ງນີ້ໄດ້ພຽງພໍເຖິງຈະມີສະພາບ ຄວາມແຫ້ງແລ້ງເກີດຂື້ນ,ເນື່ອງຈາກອ່າງເກັບນ້ຳຕ່າງໆແມ່ນໄດ້ສະສົມນ້ຳໄວ້ເປັນຈຳນວນ ຫຼາຍ,ແຕ່ກົງກັນຂ້າມກະສິກອນຈຳນວນໜຶ່ງໄດ້ຫັນໄປເຮັດອາຊີບອື່ນແທນ ການປູກພືດ,ຕົວຢ່າງໂຄງການຊົນລະປະທານນ້ຳຫຸມສາມາດສະໜອງນ້ຳໃຫ້ເນື່ອທີ່ການຜະລິດລະດູແລ້ງໄດ້ເຖິງ 2400 ເຮັກຕາ, ແຕ່ມີກະສິກອນເຮັດການຜະລິດພຽງ 2000 ເຮັກຕາ, ໂຄງການຊົນລະປະທານນ້ຳຊວງ ສາມາດສະໜອງນ້ຳໄດ້ 1700 ເຮັກຕາ , ແຕ່ຜະລິດພຽງ 1400 ເຮັກຕາ ແລະ ໂຄງການອື່ນໆກໍເຊັ່ນດຽວກັນ, ເຖິງຢ່າງໃດກໍຕາມໃນຜ່ານມານີ້ຢູ່ແຂວງສາລະວັນກໍມີເນື່ອທີ່ການຜະລິດບາງຈຸດ

ຂາດນ້ຳ,ຍ້ອນຊົນລະປະທານເປ່ເພ,ບວກກັບການຜະລິດບາງຈຸດມີນ້ຳໜ້ອຍຈຶ່ງເຮັດໃຫ້ນ້ຳບໍ່ພຽງພໍ,ແຕ່ພາກສ່ວນກ່ຽວຂ້ອງກໍໄດ້ລົງຊ່ວຍເຫຼືອດ້ວຍການໃຊ້ຈັກສູບນ້ຳຈາກຈຸດອື່ນມາແທນ ແລະ ມາຮອດດຽວນີ້ແຂວງດັ່ງກ່າວແມ່ນສາມາດດຳເນີນການຜະລິດໄດ້ເປັນປົກກະຕິແລ້ວ, ແລະ ເພື່ອຮັບປະກັນການສະໜອງນ້ຳແກ່ການຜະລິດລະດູແລ້ງປີນີ້ໄດ້ເປັນປົກກະຕິ,ກະຊວງກະສິກຳ ແລະ ປ່າໄມ້ກໍຄືກົມຊົນລະປະທານກໍໄດ້ມອບຈັກສູບນ້ຳຈຳນວນໜຶ່ງໃຫ້ແຂວງຕ່າງໆໃນທົ່ວປະເທດເພື່ອແຮໄວ້ໃນກໍລະນີສຸກເສີນ, ພ້ອມກັນນັ້ນກົມຊົນລະປະທານກໍຍັງມີຈັກສູບນ້ຳເຄື່ອນທີ່ຂະໜາດ 5 ແຮງ ແລະ 65 ແຮງ 7 ເຄື່ອງ,ເພື່ອກຽມພ້ອມໃຫ້ການຊ່ວຍເຫຼືອເຂດຜະລິດໃດຂາດນ້ຳໃນກໍລະນີຈຳເປັນອື່ນໆ.