ລາວເລັ່ງມືຮ່ວມຕ້ານການຟອກເງິນ

ສໍານັກງານຂໍ້ມູນຕ້ານການຟອກເງິນ ທະນາຄານແຫ່ງ ສປປ ລາວ ຮ່ວມກັບກົມຕໍາຫຼວດຄຸ້ມຄອງຄົນຕ່າງປະເທດ, ກົມໃຫຍ່ສັນຕິບານ ກະຊວງປ້ອງກັນຄວາມສະຫງົບ ໄດ້ຮ່ວມລົງນາມໃນບົດບັນທຶກຄວາມເຂົ້າໃຈກ່ຽວກັບການເຂົ້າເຖິງການນໍາໃຊ້ ແລະ ແລກປ່ຽນຂໍ້ມູນທາງດ້ານການເງິນ ແລະ ຂໍ້ມູນທີ່ພົວພັນກັບການສົງໃສວ່າເປັນການຟອກເງິນ ໄດ້ມີຂຶ້ນໃນວັນທີ 24 ມີນານີ້ ທີ່ນະຄອນ  ຫຼວງວຽງຈັນ ໂດຍການເຂົ້າຮ່ວມຂອງທ່ານນາງ ວັດທະນາ ດາລາລອຍ ຮອງຜູ້ວ່າການທະນາຄານແຫ່ງ ສປປ ລາວ, ທ່ານ ພັນເອກ ດຣ. ບົວວັນ ວົງສາວັນທອງ ຮອງຫົວໜ້າກົມໃຫຍ່ສັນຕິບານ ກະ ຊວງປ້ອງກັນຄວາມສະຫງົບ ເພື່ອແນໃສ່ເພີ່ມທະວີການຮ່ວມມືຊ່ວຍເຫຼືອກັນຕ້ານການຟອກເງິນ ແລະ ສະໜອງທຶນໃຫ້ແກ່ການກໍ່ການຮ້າຍ ລວມທັງຕ້ານ

ການກໍ່ອາຊະຍາກໍາຂ້າມຊາດໃຫ້ມີປະສິດທິພາບ ໂດຍການຜັນຂະຫຍາຍກົດໝາຍວ່າດ້ວຍການສະກັດກັ້ນການຟອກເງິນ ແລະ ສະໜອງທຶນໃຫ້ແກ່ການກໍ່ການຮ້າຍ; ການກໍານົດເນື້ອໃນກ່ຽວກັບຫຼັກການ, ວິທີການພົວພັນ, ປະສານງານ ແລະ ຮ່ວມມືຢ່າງເປັນລະບົບ, ວ່ອງໄວ, ປອດໄພ ແລະ ຮັບປະກັນໃຫ້ທັນສະພາບການ; ເປັນບ່ອນອີງໃນການຈັດຕັ້ງປະຕິບັດໃນການເຂົ້າເຖິງການແລກປ່ຽນ ແລະ ການນໍາໃຊ້ຂໍ້ມູນຂ່າວສານທີ່ພົວພັນເຖິງການຟອກເງິນ ແລະ ສະໜອງທຶນໃຫ້ແກ່ການກໍ່ການຮ້າຍຂອງທັງສອງຝ່າຍ; ປະກອບສ່ວນເຮັດໃຫ້ສັງຄົມມີຄວາມໝັ້ນຄົງ, ເປັນລະບຽບຮຽບຮ້ອຍ ແລະ ສະຫງົບປອດໄພ.

             ທ່ານຮັກສາການຫົວໜ້າສໍານັກງານຂໍ້ມູນຕ້ານການຟອກເງິນ ໄດ້ເນັ້ນວ່າ: ການຕ້ານການຟອກເງິນ ແລະ ສະໜອງທຶນໃຫ້ແກ່ການກໍ່ການຮ້າຍເປັນບັນຫາສໍາຄັນໃນທົ່ວໂລກ ແລະ ທຸກປະເທດຕ້ອງປະຕິບັດບັນດາມາດຕະຖານສາກົນກ່ຽວກັບວຽກງານນີ້ ແລະ ທັງໃຫ້ສອດຄ່ອງກັບຂອບຄ່າຍທາງດ້ານກົດໝາຍປະເທດຕົນ, ຖ້າປະເທດໃດບໍ່ປະຕິບັດຕາມຫຼັກການ ແລະ ເງື່ອນໄຂນັ້ນກໍຈະຖືກກໍານົດເຂົ້າບັນຊີດໍາຈາກອົງການຈັດຕັ້ງຕ້ານການຟອກເງິນ ແລະ ສະໜອງທຶນໃຫ້ແກ່ການກໍ່ການຮ້າຍສາກົນ ເຊິ່ງຈະມີຜົນກະທົບຕໍ່ການພັດທະນາເສດຖະກິດ-ສັງຄົມຂອງພວກເຮົາ; ຂະແໜງການທະນາຄານ-ການເງິນກໍຈະເສຍຄວາມໜ້າເຊື່ອຖືຈາກນັກລົງທຶນຂອງຕ່າງປະເທດ ແລະ ຈາກລູກຄ້າ, ອີກບັນຫາໜຶ່ງທີ່ສໍາຄັນກໍເພື່ອຈັດຕັ້ງປະຕິບັດ ແລະ ຜັນຂະຫຍາຍກົດໝາຍວ່າດ້ວຍການເຂົ້າ-ອອກ ແລະ ການຄຸ້ມຄອງຄົນຕ່າງປະເທດຢູ່ ສປປ ລາວ ໃຫ້ມີປະສິດທິຜົນສູງຂຶ້ນ.