ສະຖາບັນຍຸຕິທໍາຍົກລະດັບດ້ານການເງິນຈຸລະພາກ

     ສະຖາບັນຍຸຕິທໍາແຫ່ງຊາດ ກະຊວງຍຸຕິທໍາ ຮ່ວມກັບກົມຄຸ້ມຄອງສະຖາບັນການເງິນ ທະນາຄານແຫ່ງ ສປປ ລາວ ໄດ້ຈັດຕັ້ງເຜີຍແຜ່ “ການໃຫ້ຄວາມຮູ້ທາງດ້ານການເງິນ ແລະ ການຄຸ້ມຄອງຂອງທະນາຄານແຫ່ງ ສປປ ລາວ” ແກ່ບັນດາຄະນະນໍາ, ຄູອາຈານ ແລະ ນັກສຶກສາໃນທົ່ວສະຖາບັນຍຸຕິ ທໍາແຫ່ງຊາດ ຂຶ້ນໃນວັນທີ 23 ມີນານີ້ ທີ່ສະຖາບັນດັ່ງກ່າວ ໂດຍການເຂົ້າຮ່ວມຂອງທ່ານ ໄກທິບພະຈັນ ພວງພະຈັນ ຮອງຫົວໜ້າສະຖາບັນຍຸຕິທໍາແຫ່ງຊາດ ແລະ ທ່ານ ວິສອນ ໄຊສົງຄາມ ຮອງຫົວໜ້າກົມຄຸ້ມຄອງສະຖາບັນການເງິນ.

           ການເຜີຍແຜ່ຄວາມຮູ້ທາງດ້ານການເງິນ ແລະ ການຄຸ້ມຄອງຂອງທະນາຄານແຫ່ງ ສປປ ລາວ ແມ່ນມີຫຼາຍບັນຫາທີ່ສໍາຄັນ ໂດຍສະເພາະກ່ຽວກັບດໍາລັດວ່າດ້ວຍສະຖາບັນການເງິນຈຸລະພາກ ເຊິ່ງດໍາ

ລັດສະບັບນີ້ໄດ້ກໍານົດຫຼັກການ, ລະບຽບການ ແລະ ມາດຕະການກ່ຽວກັບການສ້າງຕັ້ງ, ການ ເຄື່ອນໄຫວ ແລະ ການຄຸ້ມຄອງສະຖາບັນການເງິນຈຸລະພາກຢູ່ ສປປ ລາວ ໃຫ້ມີຄວາມປອດໄພ ແລະ ໝັ້ນຄົງ, ສ້າງເງື່ອນໄຂໃຫ້ປະຊາຊົນບັນດາເຜົ່າ ສາມາດເຂົ້າເຖິງການບໍລິການທາງດ້ານການເງິນ ປະກອບສ່ວນເຂົ້າໃນການແກ້ໄຂຄວາມທຸກຍາກ ແລະ ພັດທະນາເສດຖະກິດ-ສັງຄົມຂອງຊາດ, ໃນຂະນະດຽວກັນ ວິທະຍາກອນຈາກກົມດັ່ງກ່າວ ຍັງໄດ້ນໍາສະເໜີດໍາລັດວ່າດ້ວຍໂຮງຊວດຈໍາ ເຊິ່ງມີຈຸດປະສົງແນໃສ່ແກ້ໄຂຄວາມຝືດເຄືອງທາງດ້ານການເງິນໃນເວລາຈໍາເປັນ ແລະ ຮີບດ່ວນຂອງປະຊາຊົນ ລວມທັງຮັບ ປະກັນການຊໍາລະໜີ້ສິນ ປະກອບສ່ວນເຂົ້າໃນການພັດທະນາເສດຖະກິດ-ສັງຄົມ ແລະ ສ້າງຄວາມເປັນລະບຽບຮຽບຮ້ອຍດ້ານການຈັດ ຕັ້ງ ແລະ ການເຄື່ອນໄຫວຂອງໂຮງຊວດຈໍາຢູ່ໃນສັງຄົມ, ພ້ອມນັ້ນ ຍັງນໍາສະເໜີຂໍ້ກໍານົດວ່າດ້ວຍການຄຸ້ມຄອງສະຫະກອນສິນເຊື່ອ ແລະ ເງິນຝາກປະຢັດກໍຄືວຽກງານອື່ນທີ່ປິ່ນອ້ອມວຽກງານສະຖາບັນການເງິນ.

            ຄືດັ່ງທີ່ຮູ້ແລ້ວວ່າ: ວຽກງານສະຖາບັນການເງິນຈຸລະພາກ ເປັນພາກສ່ວນໜຶ່ງທີ່ມີຄວາມ ຈໍາເປັນ ແລະ ສໍາຄັນໃນລະບົບການເງິນ-ເງິນຕາ, ເປັນແຫຼ່ງທຶນທີ່ສາມາດເຂົ້າຫາງ່າຍ, ສະດວກສະ ບາຍ ທັງຢູ່ໃກ້ຊິດ, ເປັນມິດ ແລະ ປະຊາຊົນຍັງມີສ່ວນຮ່ວມໃນວຽກງານດັ່ງກ່າວ, ໃນອະດີດ ແລະ ປະຈຸບັນວຽກງານດັ່ງກ່າວ ຍັງຄົງຕົວ ແລະ ເປັນສະຖາບັນການເງິນດ່ວນ ປະກອບສ່ວນຊ່ວຍປົດເປື້ອງຄວາມເດືອດຮ້ອນ-ແກ້ຮ້ອນ ແກ້ໜາວ ໃຫ້ປະຊາຊົນຢູ່ບັນດາປະເທດຕ່າງໆ ລວມທັງຢູ່ ສປປ ລາວ, ສະຖາບັນການເງິນຈຸລະພາກ ເຖິງວ່າຈະມີເງິນກູ້ບໍ່ຫຼາຍ ແຕ່ມັນຍັງເປັນຈຸດເລີ່ມຂອງການກໍາເນີດຂອງຫຼາຍທະນາຄານໃນໂລກ.                 

           ເຖິງຢ່າງໃດກໍຕາມ ສໍາລັບຢູ່ປະເທດເຮົາທຸລະກິດດັ່ງກ່າວກໍາລັງປົ່ງຂຶ້ນປານດອກເຫັດ ເຊິ່ງໃນນີ້ມີທັງການເຮັດທຸລະກິດທີ່ຖືກຕ້ອງ ແລະ ເປັນທາງການໂດຍພາຍໃຕ້ການຄຸ້ມຄອງຂອງກົມຄຸ້ມຄອງສະຖາບັນການເງິນທະນາຄານແຫ່ງ ສປປ ລາວ, ແຕ່ໃນຂະນະດຽວກັນກໍມີກຸ່ມຄົນບໍ່ດີຈໍານວນໜຶ່ງຍັງເຮັດທຸລະກໍາເຖື່ອນ, ມີການຕົວະຕົ້ມ-ຕົ້ມຕຸນປະຊາຊົນດ້ວຍການແອບອ້າງຊວນເຊື່ອສັງຄົມດ້ວຍຫຼາຍຮູບການໂດຍໃຫ້ດອກເບ້ຍຈູງໃຈທີ່ສູງ, ລະເມີດລະບຽບຫຼັກການຂອງສະຖາບັນທີ່ກ່ຽວ ຂ້ອງກໍຄືກົດໝາຍຂອງບ້ານເມືອງ, ແຕ່ບໍ່ພໍເທົ່ານັ້ນ ຍັງມີບາງລາຍໄດ້ຫອບເງິນລູກຄ້າໜີໄປບໍ່ຮູ້ຮ່ອງຮອຍ, ບາງພວກ ກໍຖືກເຈົ້າໜ້າທີ່ດໍາເນີນຄະດີ ແລະ ນໍາຕົວຜູ້ກະທໍາຜິດເຂົ້າສູ່ຂະບວນການຍຸຕິທໍາ ເພື່ອຄວາມສະຫງົບຂອງບ້ານເມືອງ.