ຜູ້ບໍລິຫານດົນຕີບັນດາປະເທດອາຊຽນແລກປ່ຽນບົດຮຽນເຊິ່ງກັນ ແລະ ກັນ ແນໃສ່ເປີດກວ້າງການຮ່ວມມື

          ບັນດາຜູ້ແທນຜູ້ບໍລິຫານທາງດ້ານດົນຕີຂອງບັນດາປະເທດອາຊຽນ ໄດ້ຈັດກອງປະຊຸມ (Seadom) ຄັ້ງທີ 8 ຂຶ້ນທີ່ນະຄອນຫລວງວຽງຈັນ ເພື່ອປຶກສາຫາລືແລກປ່ຽນບົດຮຽນທາງດ້ານສິລະປະດົນຕີຮ່ວມກັນ ໃນວັນທີ 24-26 ມີນານີ້ ໂດຍມີທ່ານ ບົວເງິນ ຊາພູວົງ ຮອງລັດຖະມົນຕີກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ, ທ່ານ ເບີນາດ ແລນສະກີ ປະທານອົງການຄະນະບໍດີດົນຕີອາຊີຕາເວັນອອກສຽງ ໃຕ້ (Seadom)  ແລະ ບັນດາຜູ້ບໍລິຫານທາງດ້ານດົນຕີຈາກ 10 ປະເທດດສະມາຊິກອາຊຽນ ແລະ ຜູ້ຊ່ຽວຊານດ້ານດົນຕີ ຈາກປະເທດຍີ່ປຸ່ນ, ສະວິດ, ໄອແລນ, ເຢຍລະມັນ ແລະ ອາເມລິກາເຂົ້າຮ່ວມນຳດ້ວຍ.

          ທ່ານ ບົວເງິນ ຊາພູວົງ ກ່າວເປີດກອງປະຊຸມວ່າ: ກອງປະຊຸມຄັ້ງນີ້ມີຄວາມສຳຄັນຫລາຍ ແລະ ຈະເປັນໂອກາດໃຫ້ຜູ້ເຮັດວຽກງານດັ່ງກ່າວໄດ້ແລກປ່ຽນບົດຮຽນ ແລະ ປະສົບການຕ່າງໆໃນການຂຸດຄົ້ນ, ຟື້ນຟູອະນຸລັກ, ພັດທະນາ ແລະ ເຊື່ອມໂຍງທາງສິລະປະດ້ານດົນຕີ ລະຫວ່າງ ປະເທດໃຫ້ຈະເລີນກ້າວໜ້າ ແລະ ສ້າງຄວາມບັນເທີງໃຫ້ແກ່ສັງຄົມນັບມື້ດີຂຶ້ນ. ທ່ານ ບົວເງິນ ຊາພູວົງ ໃຫ້ຮູ້ວ່າ: ສໍາລັບ ສປປ ລາວ ໃນໄລຍະຜ່ານມາໄດ້ມີຄວາມພະຍາຍາມບຸກບືນ ແລະ ພັດທະນາຕົນເອງໃນດ້ານດົນຕີຫລາຍສົມຄວນ ແຕ່ກໍຍັງພົບກັບຄວາມຫຍຸ້ງຍາກຫລາຍດ້ານເຊັ່ນ: ດ້ານຫລັກສູດ, ຕໍາລາຮຽນ ແລະ ບົດຮຽນໃນການບໍລິ ຫານງານກໍຍັງອ່ອນນ້ອຍ, ເຄື່ອງມືຮັບໃຊ້ໃຫ້ແກ່ການສຶກສາກໍຍັງຂາດເຂີນ, ບຸກຄະລາກອນຄູອາຈານກໍຍັງບໍ່ທັນພຽງພໍກັບຄວາມຕ້ອງການ. ສະນັ້ນ, ຈຶ່ງຫວັງຢ່າງຍິ່ງວ່າຜ່ານກອງປະຊຸມຄັ້ງນີ້ ບັນດາທ່ານຜູ້ບໍລິ ຫານຂັ້ນສູງຈາກບັນດາປະເທດເພື່ອນມິດ ຄົງຈະບິແບ່ງໃຫ້ການຊ່ວຍເຫລືອໃນດ້ານຕ່າງໆແກ່ວົງການດົນຕີຂອງລາວ ເພື່ອສາມາດເຊື່ອມໂຍງເຂົ້າກັບພາກພື້ນ ແລະ ສາກົນເທື່ອລະກ້າວ.