ພິທີລົງນາມບົດບັນທຶກຄວາມເຂົ້າໃຈເພື່ອຍົກສູງຄວາມສາມາດໃຫ້ແກ່ພະນັກງານຂັ້ນນຳລາວດ້ວຍການຈັດຝືກອົບຮົມຖ່າຍທອດບົດ ຮຽນຂອງສິງກະໂປລະຫວ່າງ ທ່ານ ຢົງ ຈັນທະລັງສີ ຫົວໜ້າສະຖາ ບັນການຕ່າງປະເທດກະຊວງການຕ່າງປະເທດລາວ ແລະ ທ່ານ ສາດສະດາຈານ ເອີມິງ ຮົວ ຮອງອະທິການບໍດີມະຫາວິທະຍາໄລເຕັກໂນໂລຊີ ນັນຢາງ ແຫ່ງປະເທດສິງກະໂປ, ໄດ້ມີຂຶ້ນເມື່ອທ້າຍອາທິດຜ່ານມາ, ທີ່ນະຄອນຫລວງວຽງຈັນ, ໂດຍການເຂົ້າຮ່ວມຂອງທ່ານລັດຖະມົນຕີຊ່ວຍວ່າການກະຊວງການຕ່າງປະເທດ ແສງເພັດ ຮຸ່ງບຸນຍວງ, ມີຜູ້ບໍລິຫານມູນນິທິເທມາເຊັກ, ຫົວໜ້າກົມ ແລະ ພາກສ່ວນກ່ຽວຂ້ອງເຂົ້າຮ່ວມ.
ການລົງນາມບົດບັນທຶກດັ່ງກ່າວເພື່ອປະຕິບັດຕາມເນື້ອໃນຈິດໃຈຂອງສອງຝ່າຍ
ໃນການຊ່ວຍເຫລືອຍົກສູງເພື່ອສ້າງຄວາມສາມາດໃຫ້ແກ່ພະນັກງານຂັ້ນນຳຂອງລາວດ້ວຍການຈັດຝືກອົບຮົມຖ່າຍທອດບົດຮຽນຂອງສິງກະໂປໃຫ້ຜູ້ເຂົ້າຮ່ວມໄດ້ນຳມາໜູນໃຊ້ເຂົ້າໃນວຽກງານຕົວຈິງ,
ເຊິ່ງເປັນການປະກອບສ່ວນສຳຄັນເຂົ້າໃນການສ້າງສາພັດທະນາປະເທດຊາດໃຫ້ຫລຸດພົ້ນຈາກປະເທດດ້ອຍພັດທະນາ ແລະ ກາຍເປັນປະເທດທີ່ຈະເລີນໃນອະນາຄົດ.
ໂຄງການຝືກອົບຮົມດັ່ງກ່າວ,
ແມ່ນຂີດໝາຍສຳຄັນໃນການສົ່ງເສີມການພົວພັນຮ່ວມມືສອງຝ່າຍລາວ-ສິງກະໂປ, ໂດຍສະເພາະການພັດທະນາຊັບພະຍາກອນມະນຸດຂອງທັງສອງປະເທດໃຫ້ໄດ້ຮັບການເສີມຂະຫຍາຍ ແລະ ພັດທະນາດີຂຶ້ນໄປເລື້ອຍໆ. ໂຄງການດັ່ງກ່າວເກີດຂຶ້ນພາຍໃຕ້ການສະໜັບສະໜູນຈາກລັດຖະບານລາວ ແລະ ມູນນິທິເທມາເຊັກ,
ເຊິ່ງມະຫາວິທະຍາໄລເຕັກໂນໂລຊີນັນຢາງເປັນຜູ້ຈັດຕັ້ງປະຕິບັດ ໂດຍໄດ້ແບ່ງອອກເປັນ 3 ຊຸດຮຽນ, ມີປະມານ 25 ຄົນຕໍ່ຊຸດ, ໄລຍະຝຶກອົບຮົມ 15 ວັນ ຢູ່ປະເທດສິງກະໂປ ເພື່ອຮຽນຮູ້ປະສົບການ, ບົດຮຽນໃນຂົງເຂດການບໍລິຫານລັດ,ນະໂຍບາຍລັດ
ແລະ ການພັດທະນາເສດຖະກິດ-ສັງຄົມຈາກຜູ້ຊ່ຽວຊານທີ່ເຄີຍມີບົດບາດໃນຍຸກຂ້າມຜ່ານຂອງສິງກະໂປ.
No comments:
Post a Comment