ກອງປະຊຸມ NADI ຄັ້ງທີ 9 ຈັດຂຶ້ນທີ່ນະຄອນຫລວງວຽງຈັນ

          ກອງປະຊຸມເຄືອຂ່າຍສະຖາບັນປ້ອງກັນຊາດ ແລະ ຄວາມໝັ້ນຄົງອາຊຽນຄັ້ງທີ 9 (9th NADI) ຈັດຂຶ້ນໃນວັນທີ 24-25 ມີນານີ້, ທີ່ນະຄອນຫລວງວຽງຈັນ, ໂດຍການເປັນປະທານຂອງທ່ານ ພັອ ສຸລິວັນ ແສງຈັນ ຮອງຫົວໜ້າກົມວິທະຍາສາດ-ປະຫວັດສາດ ການທະຫານ, ກະຊວງປ້ອງກັນປະເທດແຫ່ງ ສປປ ລາວ, ມີບັນດາຫົວໜ້າສະຖາບັນປ້ອງກັນຊາດ ແລະ ຄວາມໝັ້ນຄົງຈາກປະເທດສະມາຊິກອາຊຽນເຂົ້າຮ່ວມຢ່າງພ້ອມພຽງ.

          ທ່ານ ພັອ ສຸລິວັນ ແສງຈັນ ກ່າວວ່າ: ກອງປະຊຸມຄັ້ງນີ້ ແມ່ນມີຄວາມໝາຍສຳຄັນຫລາຍ, ເຊິ່ງຈະໄດ້ປຶກສາຫາລືເຖິງວິໄສທັດດ້ານການເມືອງ ແລະ ຄວາມໝັ້ນຄົງໃນພາກພື້ນກ່ຽວກັບທ່າອ່ຽງ ແລະ ສິ່ງທ້າທາຍຕ່າງໆ ແລະ ແນໃສ່ເພີ່ມທະວີການຮ່ວມມືດ້ານວຽກງານປ້ອງກັນຊາດ ເພື່ອຮັບມືກັບໄພຂົ່ມຂູ່

ແລະ ສິ່ງທ້າທາຍທີ່ບໍ່ແມ່ນດ້ານການທະຫານ, ເພື່ອຄວາມເຂັ້ມແຂງຂອງປະຊາຄົມເສດຖະກິດອາຊຽນ.

          ກອງປະຊຸມດັ່ງກ່າວ ຈັດຂຶ້ນຫລັງຈາກການສ້າງຕັ້ງປະຊາຄົມອາຊຽນ ແລະ ເປັນຄັ້ງທຳອິດທີ່ມີການຈັດຕັ້ງປະຕິບັດແຜນງານອາຊຽນໃນປີ 2025 ຮ່ວມກັນ, ໂດຍສະເພາະແຜນແມ່ບົດດ້ານການ ເມືອງ ແລະ ຄວາມໝັ້ນຄົງ ແລະ ແຜນແມ່ບົດຂອງປະຊາຄົມອາຊຽນໃນປີ 2025, ເຊິ່ງມັນສະແດງໃຫ້ເຫັນວ່າປະຊາຊົນ ແລະ ສະມາຊິກລັດອາຊຽນ ສາມາດດຳລົງຊີວິດຢູ່ຮ່ວມກັນໄດ້ໂດຍສັນຕິ, ມີປະຊາທິປະໄຕ ແລະ ມີສະພາບແວດລ້ອມທີ່ດີ.

          ທ່ານ ພັອ ກ່າວວ່າ: ນັບແຕ່ການສ້າງຕັ້ງສະຖາບັນປ້ອງກັນຊາດ ແລະ ຄວາມໝັ້ນຄົງອາຊຽນກອງປະຊຸມ NADI ກໍມີບົດບາດສຳຄັນຕໍ່ການສ້າງຄວາມໄວ້ເນື້ອເຊື່ອໃຈ ແລະ ສ້າງຄວາມສະນິດແໜ້ນລະຫວ່າງສະຖາບັນຄົງປັນຍາ ແລະ ສະຖາບັນຄົ້ນຄວ້າ ກ່ຽວກັບການຮ່ວມມືດ້ານວຽກງານປ້ອງກັນຊາດ ແລະ ຄວາມໝັ້ນຄົງ ເພື່ອສະເໜີນະໂຍບາຍຕ່າງໆໄປຍັງກອງປະຊຸມລັດຖະມົນຕີປ້ອງກັນປະເທດອາຊຽນ (ADMM), ໃນນັ້ນ ການເປັນປະທານອາຊຽນ ແລະ ການເປັນປະທານກອງປະຊຸມ ADMM ຂອງລາວ ລ້ວນແຕ່ມີຈຸດປະສົງ ສົ່ງເສີມການຮ່ວມມືລະຫວ່າງກອງທັບອາຊຽນດ້ວຍກັນ ແລະ ລະຫວ່າງອາຊຽນກັບປະເທດບວກ, ເພື່ອເສີມຂະຫຍາຍສັນຕິພາບໃນພາກພື້ນ, ສະຖຽນລະພາບ ແລະ ການພັດທະນາ. ກອງປະຊຸມປີນີ້ແມ່ນໄດ້ຈັດຂຶ້ນພາຍໃຕ້ຄຳຂັວນ “ວິໄສທັດການຮ່ວມມືທາງດ້ານວຽກງານປ້ອງກັນຊາດ ແລະ ຄວາມໝັ້ນຄົງອາຊຽນ ຫລັງຈາກການສ້າງຕັ້ງປະຊາຄົມເສດຖະກິດອາຊຽນ”.