laophatthananewspaper: ວິສາຫະກິດຫລາຍແຫ່ງລະເມີດກົດໝາຍປະກັນສັງຄົມ

ທ່ານຫົວໜ້າຫ້ອງການກອງທຶນປະກັນສັງຄົມແຫ່ງຊາດ ປະເດີມພອນ ສົນທານີ ໃຫ້ຮູ້ວ່າ: ປັດຈຸບັນຍັງມີຫລາຍວິສາຫະກິດລະເມີດລະບຽບກົດໝາຍວ່າດ້ວຍປະກັນສັງຄົມ ໂດຍບໍ່ຢາກເຂົ້າເປັນສະມາຊິກກອງທຶນປະກັນສັງຄົມແຫ່ງຊາດ ເຊິ່ງກົດໝາຍດັ່ງກ່າວໄດ້ຖືກຮັບຮອງໂດຍສະພາແຫ່ງຊາດ ແລະ ປະທານປະເທດແຫ່ງ ສປປ ລາວ ໄດ້ອອກລັດຖະດຳລັດປະກາດໃຊ້ເມື່ອທ້າຍປີ 2013. ການມີກົດໝາຍດັ່ງກ່າວກໍເພື່ອປົກປ້ອງສິດ ແລະ ຜົນປະໂຫຍດຂອງຜູ້ໃຊ້ແຮງງານ ແລະ ຜູ້ອອກແຮງງານດ້ວຍການປະກອບທຶນສົມທົບ ແລະ ການສະໜອງການອຸດໜູນປະກັນສັງຄົມ ແນໃສ່ຄ້ຳປະກັນການດຳລົງຊີວິດຂັ້ນພື້ນຖານ, ການສ້າງຄວາມສາມັກຄີປອງດອງ ແລະ ປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງຊາດ. ການປະກັນສັງຄົມແມ່ນການຮັບປະກັນໃຫ້ຜູ້ປະກັນຕົນໄດ້ຮັບເງິນອຸດໜູນຈາກກອງທຶນປະກັນສັງຄົມແຫ່ງຊາດໃນກໍລະນີມີການປິ່ນປົວສຸຂະພາບ, ອອກລູກ ຫລື ຫລຸລູກ, ເກີດອຸປະຕິເຫດແຮງງານ, ພະຍາດອາຊີບ, ເສຍກຳລັງແຮງງານ, ເສຍອົງຄະ, ປ່ວຍການ, ບຳນານ, ເສຍຊີວິດ, ອຸດໜູນ

ສະມາຊິກຄອບຄົວ ແລະ ຫວ່າງງານ ເຊິ່ງໃນມາດຕາ 6 ຂອງກົດໝາຍດັ່ງກ່າວລະບຸວ່າ: ລັດຖະບານມີພັນທະແບ່ງປັນງົບປະມານລັດ ເພື່ອສົມທົບທຶນເຂົ້າກອງທຶນປະກັນສັງຄົມແຫ່ງຊາດ ແລະ ຄ້ຳປະກັນຄວາມຍືນຍົງຂອງກອງທຶນ, ຜູ້ໃຊ້ແຮງງານມີພັນທະເຂົ້າຮ່ວມດ້ວຍການສົມທົບເງິນເຂົ້າກອງທຶນປະກັນສັງຄົມດັ່ງກ່າວ, ຜູ້ອອກແຮງງານຜູ້ປະກອບອາຊີບສ່ວນບຸກຄົນ ແລະ ຜູ້ສະໝັກໃຈມີພັນທະຂຶ້ນທະບຽນປະກັນສັງຄົມ ແລະ ສົມທົບເງິນເຂົ້າກອງທຶນໃຫ້ຄົບຖ້ວນ ເຊິ່ງຜ່ານການຈັດຕັ້ງປະຕິບັດກົດໝາຍດັ່ງກ່າວ ເຫັນວ່າມີຜູ້ເປັນສະມາຊິກກອງທຶນປະກັນສັງຄົມປະມານ 6 ແສນກວ່າຄົນ ແລະ ແມ່ນພາກລັດເປັນສ່ວນໃຫຍ່, ສ່ວນພາກວິສາຫະກິດ, ຫົວໜ່ວຍທຸລະກິດຕ່າງໆແມ່ນມີຈຳນວນໜ້ອຍ ເຊິ່ງບັນຫານີ້ຖືວ່າແມ່ນການບໍ່ໃຫ້ຄວາມສຳຄັນແກ່ການປະຕິບັດພັນທະຂອງຕົນເຂົ້າໃນວຽກງານປະກັນສັງຄົມ ທັງເປັນການລະເມີດຕໍ່ລະບຽບກົດໝາຍດັ່ງກ່າວອີກດ້ວຍ.

ທ່ານຫົວໜ້າຫ້ອງການກອງທຶນປະກັນສັງຄົມແຫ່ງຊາດ ກ່າວວ່າ: ມີຫລາຍປັດໄຈພາໃຫ້ວຽກງານປະກັນສັງຄົມແຫ່ງຊາດຍັງບໍ່ທັນເປັນທີ່ສົນໃຈຢາກປະກອບສ່ວນຂອງສັງຄົມ ເຊິ່ງອັນສຳຄັນຕົ້ນຕໍແມ່ນເກີດຈາກຄວາມຮັບຮູ້ ແລະ ເຂົ້າໃຈຂອງສັງຄົມຕໍ່ວຽກງານດັ່ງກ່າວຍັງບໍ່ທັນເລິກເຊິ່ງ ຍ້ອນການໂຄສະນາເຜີຍແຜ່ວຽກງານດັ່ງກ່າວມີລັກສະນະຈຳກັດ, ມີບາງຫົວໜ່ວຍທຸລະກິດບໍ່ໃຫ້ການຮ່ວມມືກັບພາກສ່ວນກ່ຽວຂ້ອງດີເທົ່າທີ່ຄວນໃນການລົງໄປຊຸກຍູ້ ເພື່ອໃຫ້ເຂົ້າເປັນສະມາຊິກກອງທຶນປະກັນສັງຄົມ. ແຕ່ແນວໃດກໍຕາມ, ວຽກງານດັ່ງກ່າວແມ່ນມີຄວາມສຳຄັນຕໍ່ລະບົບເສດຖະກິດ-ສັງຄົມຂອງຊາດ. ສະນັ້ນ ໃນຕໍ່ໜ້ານີ້ ພາກສ່ວນກ່ຽວຂ້ອງຈະຕ້ອງໄດ້ເພີ່ມທະວີເອົາໃຈໃສ່ໃນການໂຄສະນາປຸກລະດົມໃຫ້ທົ່ວສັງຄົມມີຄວາມຮັບຮູ້ ແລະ ເຂົ້າໃຈວຽກງານປະກັນສັງຄົມຫລາຍກວ່າເກົ່າ ເພື່ອປະກອບສ່ວນເຂົ້າໃນການສ້າງສາພັດທະນາເສດຖະກິດຂອງຊາດໃຫ້ເຂັ້ມແຂງເທື່ອລະກ້າວ ທັງເປັນການປະກອບສ່ວນພັນທະຂອງຕົນເຂົ້າໃນການປະກັນສັງຄົມຕາມລະບຽບກົດໝາຍກຳນົດໄວ້.