ຜູ້ໃຊ້ລົດໃຊ້ຖະໜົນຫລາຍຄົນຕ່າງກໍສະແດງຄວາມຄິດເຫັນກັນວ່າ: ຄ່າຝາກລົດແພງຫລາຍ ເຂົ້າຝາກແປັບດຽວກໍ
4.000-5.000 ກີບ ແພງກວ່າຂາຍໜັງສືພິມສະບັບໜຶ່ງທີ່ເຮັດກັນມາເປັນມື້ສອງມື້ ໂດຍສະເພາະຢູ່ສະຖານທີ່ຝາກລົດຫລາຍແຫ່ງໃນເຂດອ້ອມແອ້ມຕະຫລາດເຊົ້າ ນະຄອນຫຼວງວຽງຈັນ ອັນໄດ້ສ້າງຄວາມລຳບາກໃຫ້ຜູ້ມາໃຊ້ບໍລິການ ແລະ ຍັງສ້າງຄວາມສັບສົນໃຫ້ແກ່ການສັນຈອນໄປມາໃນເຂດເສັ້ນທາງບໍລິເວນດັ່ງກ່າວ ແລະ ມີຫລາຍຄົນກໍມັກຕັ້ງຄຳຖາມຂຶ້ນມາວ່າ: ບໍ່ຮູ້ວ່າແມ່ນພາກສ່ວນໃດເປັນຜູ້ປະຕິບັດການຂຶ້ນລາຄາຝາກລົດດັ່ງກ່າວ ແລະ ກໍບໍ່ຮູ້ວ່າຮ່ວງເງິນນີ້ເຂົ້າຖົງໃຜ, ພຽງແຕ່ຮູ້ວ່ານັ້ນເປັນເຂດຝາກລົດທີ່ອົງການບໍລິຫານ ແລະ ພັດທະນາຕົວເມືອງວຽງຈັນ (ອພບ) ຄຸ້ມຄອງ ແລະ ກໍມີ
ຫລາຍຫາງສຽງຈົ່ມວ່າ: ສົມຄວນບໍ່ ທີ່ອົງການດັ່ງກ່າວໄດ້ຈັດສັນເອົາຫລາຍບ່ອນໃນແຄມທາງຫລວງຂອງຕົວເມືອງວຽງຈັນທີ່ຄັບແຄບສັບສົນຢູ່ແລ້ວ ມາເຮັດເປັນບ່ອນຝາກຈອດລົດໃສ່ຕື່ມ ດັ່ງບ່ອນຈອດລົດແຄມທາງຝາກຕະຫລາດຂົວດິນ ແລະ ໜ້າກະຊວງປ້ອງກັນຄວາມສະຫງົບ ແລະ ຫລາຍແຫ່ງອື່ນໆ ຄືຢູ່ບໍລິເວນຕໍ່ໜ້າຮ້ານອາຫານນ້ຳພຸຍິ່ງຮ້າຍແຮງ ສົ່ງຜົນໃຫ້ການສັນຈອນໄປມາຂອງເສັ້ນທາງເສດຖາທິລາດ ນັບແຕ່ຮ້ານອາຫານຂອບໃຈເດີ້ໄປຈົນຮອດ 4 ແຍກສຳນັກງານປະທານປະເທດມື້ໃດກໍມີສະພາບລົດແອອັດເປັນປະຈຳ ແລະ ການຮັບຝາກລົດແບບນີ້ຫລາຍບ່ອນກໍບໍ່ມີຕົນໂຕ ເຊິ່ງຄຳຕອບຕິດປາກຂອງຜູ້ປະກອບການດັ່ງກ່າວກໍພຽງອ້າງວ່າ: ຂຶ້ນກັບເມືອງສັ່ງ ຫລືວ່າ ເຂດນີ້ເປັນເຂດສຳປະທານຮັບເໝົາຂອງເຂົາເຈົ້າ, ຖ້າຈະຈອດລົດຕ້ອງໄດ້ຈ່າຍເງິນໂດຍບໍ່ມີຂໍ້ຍົກເວັ້ນໃດໆ, ຖ້າບໍ່ຈ່າຍເງິນກໍຕ້ອງໄປຈອດບ່ອນອື່ນ ແລະ ໃນປີ້ຝາກລົດກໍຂຽນໄວ້ຢ່າງບໍ່ມີຄວາມຮັບຜິດຊອບວ່າ: ຈອດໄດ້ພຽງ 3 ຊົ່ວໂມງເທົ່ານັ້ນຖ້າກາຍກໍຕ້ອງໄດ້ເສຍຄ່າຝາກຕື່ມ ແລະ ຈະບໍ່ຮັບຜິດຊອບໃດໆຕໍ່ການເສຍຫາຍຂອງລົດ, ພຽງບໍລິການສະຖານທີ່ຈອດລົດເທົ່ານັ້ນ. ເບິ່ງແນວໜຶ່ງກໍຄືຊຽງໝ້ຽງແລ້ວ ຜູ້ອັບປະໂຫຍດກໍແມ່ນຜູ້ໃຊ້ບໍລິການ (ປະຊາຊົນ), ໃນຂະນະທີ່ບ່ອນນັ້ນແມ່ນທາງຫລວງ. ກໍໝາຍວ່າເປັນຂອງສາທາລະນະ ໂດຍລັດເປັນຜູ້ຄຸ້ມຄອງ ແລະ ຖ້າຈະໃຫ້ມີການບໍລິການບ່ອນຈອດລົດຢ່າງແທ້ຈິງກໍຕ້ອງແມ່ນເບື້ອງລັດເປັນຜູ້ອະນຸຍາດ ແລະ ຄຸ້ມຄອງ, ນັບທັງເລື່ອງລາຄາຄ່າຝາກໄປເຖິງການຄຸ້ມຄອງລາຍຮັບ - ລາຍຈ່າຍດັ່ງກ່າວໃຫ້ຈະແຈ້ງໂປ່ງໃສ,
ຖ້າບໍລິການແນວນີ້ຈຶ່ງຈະແມ່ນການບໍລິການເພື່ອປະຊາຊົນຢ່າງແທ້ຈິງ ແລະ ບໍ່ຄວນເຮັດຄືດັ່ງປັດຈຸບັນແລ້ວແຕ່ຜູ້ຈະເຮັດແລ້ວແຕ່ຜູ້ຈະກຳນົດລາຄາຄ່າຝາກແນວໃດກໍໄດ້ເຊັ່ນ: ບາງຈຸດ 8 ພັນກີບ, ບາງຈຸດ 10 ພັນກີບ. ຂະນະທີ່ຜ່ານມາມີລາຄາພຽງ 5-8 ພັນກີບຕໍ່ຄັນເທົ່ານັ້ນ, ແຕ່ໃນຂະນະດຽວກັນ ກໍຂໍຮຽກຮ້ອງໃຫ້ຜູ້ໃຊ້ລົດໃຊ້ຖະໜົນຈົ່ງໃຫ້ການຮ່ວມມື,
ມີສະຕິປະຕິບັດລະບຽບຈະລາຈອນໃຫ້ດີ, ບໍ່ຄວນຈອດລົດຊະຊາຍຕາມແຄມຖະໜົນ ອັນເປັນສິ່ງກີດຂວາງ ແລະ ສ້າງຄວາມແອອັດໃຫ້ແກ່ການສັນຈອນໄປມາ ເພາະຍັງອີກບໍ່ດົນ ລາວເຮົາກໍຈະເປັນເຈົ້າພາບຈັດກອງປະຊຸມສຸດຍອດອາຊຽນ ເຊິ່ງຈະມີແຂກບ້ານ, ແຂກເມືອງລະດັບຜູ້ໃຫຍ່ໄມ້ໂຕມາຮ່ວມ ແລະ ຢ້ຽມຢາມປະເທດເຮົາ. ດັ່ງນັ້ນ ຕ້ອງຮ່ວມກັນສ້າງນະຄອນຫລວງວຽງຈັນໃຫ້ມີຄວາມເປັນລະບຽບຮຽບຮ້ອຍ, ສະຫງົບປອດໄພເປັນສິ່ງເອກອ້າງ ແລະ ໃຫ້ເພິ່ນຍົກຍ້ອງ.
No comments:
Post a Comment