ຈູດທຳລາຍສິນຄ້າບໍ່ຖືກຕ້ອງຕາມລະບຽບ

    ໃນຕອນບ່າຍວັນທີ 1 ກໍລະກົດນີ້, ເຈົ້າໜ້າທີ່ພະແນກອຸດສາຫະກຳ ແລະ ການຄ້ານະຄອນຫລວງວຽງຈັນ ໄດ້ນຳສິນຄ້າອຸປະໂພກ-ບໍລິໂພກທີ່ນຳເຂົ້າບໍ່ຖືກຕ້ອງຕາມລະບຽບຫລັກການ, ໝົດອາຍຸນຳໃຊ້ ແລະ ສິນຄ້າເກືອດຫ້າມອື່ນໆຫລາຍລາຍການ ລວມມູນຄ່າຫລາຍກວ່າ 60 ລ້ານກີບ ໄປຈູດທຳລາຍຖິ້ມທີ່ສະໜາມກຳຈັດຂີ້ເຫຍື້ອຫລັກ 32 ເມືອງໄຊທານີ ນະຄອນຫລວງວຽງຈັນ, ພາຍຫລັງເຈົ້າໜ້າທີ່ຍຶດໄດ້ຈາກຮ້ານຄ້າຕ່າງໆແຕ່ຕົ້ນເດືອນພຶດສະພາຜ່ານມາ ເພື່ອເປັນການປົກປ້ອງການຜະ ລິດພາຍໃນ ແລະ ປົກປ້ອງຜົນປະໂຫຍດຂອງຜູ້ຊົມໃຊ້ບໍ່ເປັນອັນຕະລາຍຕໍ່ສຸຂະພາບ ແລະ ຊີວິດຕາມກົດໝາຍວ່າດ້ວຍການປົກປ້ອງຜູ້ຊົມໃຊ້.

     ເຈົ້າໜ້າທີ່ກວດກາການຄ້າ ຍັງໄດ້ຝາກເຖິງອຳນາດການປົກຄອງທ້ອງຖິ່ນ ແລະ ຂະແໜງການທີ່ກ່ຽວຂ້ອງ ຂໍຄວາມຮ່ວມມືຊ່ວຍເປັນຫູເປັນຕາຫາກພົບເຫັນແມ່ນໃຫ້ລາຍງານຕໍ່ເຈົ້າໜ້າທີ່ກວດກາ ການຄ້າທຸກຂັ້ນ ເພື່ອສະກັດກັ້ນບໍ່ໃຫ້ສິນຄ້າດັ່ງກ່າວແຜ່ລາມ ຫລື ມີຈຳໜ່າຍຢູ່ໃນຂອບເຂດທົ່ວປະເທດຢ່າງເດັດຂາດ.