ລາວສະເຫຼີມສະຫຼອງວັນປະຊາກອນໂລກໃນຫົວຂໍ້: ” ລົງທຶນໃສ່ໄວໜຸ່ມຍິງ”

        ວັນທີ 11 ກໍລະກົດນີ້, ກະຊວງແຜນການ ແລະ ການລົງທຶນ, ຮ່ວມກັບອົງການສະຫະປະຊາດຊາດກອນທຶນສຳລັບປະຊາກອນ ( UNFPA ) ປະຈຳລາວຈັດພິທີສະເຫຼີມສະຫຼອງວັນປະຊາກອນໂລກຄົບຮອບ 29 ປີ ( 11 ກໍລະກົດ 1987 – 11 ກໍລະກົດ 2016 ) ໃນຫົວຂໍ້: ”ລົງທຶນໃສ່ໄວໜຸ່ມຍິງ” ຂຶ້ນທີ່ນະຄອນຫຼວງຽງຈັນ, ໂດຍການເຂົ້າຮ່ວມຂອງທ່ານ ສຸພັນ ແກ້ວມີໄຊ ລັດຖະມົນ ຕີກະ ຊວງແຜນການ ແລະ ການລົງທຶນ, ມີຜູ້ຕາງໜ້າຈາກອົງການສະຫະປະຊາຊາດກອງທືນສຳລັບປະຊາ ກອນປະຈຳລາວ, ກະຊວງສຶກສາທິການ ແລະ ກິລາ, ກະຊວງສາທາລະນະສຸກ, ສູນກາງສະຫະພັນແມ່ຍິງລາວ, ສູນການຊາວໜຸ່ມປະຊາຊົນປະຕິວັດລາວ, ພ້ອມດວຍຂະແໜງການຕ່າງໆເຂ້າຮ່ວມເປັນຈຳນວນຫຼາຍ.

          ທ່ານລັດຖະມົນຕີມີຄຳເຫັນໃນພິທີວ່າ: ການສະເຫຼີມສະວັນປະຊາກອນລາວປີນີ້ມີຫົວຂໍ້ວ່າ:”ການລົງທຶນໃສ່ໄວໜຸ່ມຍິງ, ເປັນຫົວຂໍ້ເໝາະສົມທີ່ສຸດ, ເນື່ອງຈາກວ່າປະເທດຕ່າງໆໃນທົ່ວໂລກ, ລວມທັງ ສປປ ລາວ ຫາກໍຮັບຮອງເອົາເປົ້າໝາຍການພັດທະນາແບບຍືນຍົງ, ເພື່ອພ້ອມກັນຈັດຕັ້ງປະຕິບັດໃນອີກ 15 ປີຕໍ່ໜ້າ, ຊຶ່ງຫົວຂໍ້ດັ່ງກ່າວໄດ້ຍົກໃຫ້ເຫັນຄວາມຈຳເປັນຂອງປະເທດເຮົາ, ໂດຍສະເພາະແມ່ນພາກສ່ວນກ່ຽວຂ້ອງຕ່າງໆ, ຕະຫຼອດຮອດຊຸມຊົນ ແລະ ຄອບຄົວຕ້ອງໄດ້ເພີ່ມຄວາມເອົາໃຈໃສ່ສະໜັບສະໜັບສະໜູນໄວໜຸ່ມຍິງໃນປັດຈຸບັນ ແລະ ອະນາຄົດ, ເພື່ອໃຫ້ເຂົາເຈົ້າບັນລຸຄວາມມຸ່ມາດປາຖະໜາ ແລະ ເພື່ອໃຫ້ປະເທດເຮົາບັນລຸໄດ້ເປົ້າໝາຍການພັດທະນາແບບຍືນຍົງ ແລະ ສິດສະເໝີພາບລະຫວ່າງຍິງ-ຊາຍ, ດັ່ງທີ່ພວກເຮົາຮູ້ນຳກັນແລ້ວວ່າປັດຈຸບັນລັດຖະບານເຮົາກໍພວມຈັດຕັ້ງປະຕິ ບັດແຜນພັດທະນາເສດຖະກິດ-ສັງຄົມ 5 ປີຄັ້ງທີ 8, ຊຶ່ງເປັນແຜນທີ່ໄດ້ນຳເອົາເປົ້າໝາຍພັດທະນາແບບຍືນຍົງເຊື່ອມສານເຂົ້າໃສ່ຄາດໝາຍທີ່ສຳຄັນຂອງແຜນດັ່ງກ່າວ, ເພື່ອເຮັດໃຫ້ເສດຖະກິດຂະ ຫຍາຍຕົວ ແລະ ຕໍ່ເນື່ອງໄປຕາມທິດທີ່ຍືນຍົງ, ສີຂຽວ, ການພັດທະນາທາງດ້ານວັດທະນະທຳ ແລະ ສັງຄົມມີຄວາມກ້າວໜ້າ, ເຮັດໃຫ້ອັດຕາສ່ວນຄວາມທຸກຍາກຫຼຸດໜ້ອຍຖ່ອຍລົງ ແລະ ປົກປັກຮັກສາສິ່ງແວດລ້ອມໃຫ້ມີຄວາມຍືນຍົງ, ທັງໝົດນີ້ກໍເພື່ອຮັບປະກັນໃຫັ ສປປ ລາວ ຫຼຸດຜ່ອນອອກຈາກສະ ຖານະພາບດ້ອຍພັດທະນາໃນປີ 2020 ເພາະສະນັ້ນການພັດທະນາຊັບພະຍາກອນມະນຸດຈຶ່ງແມ່ນໜຶ່ງໃນວຍກງານບຸລິມະສິດທີ່ສຳຄັນທີ່ສຸດໃນໄລຍະນີ້, ເຖິງວ່າຜ່ານມາການລົງທຶນໃສ່ຂະແໜງສັງຄົມເປັນຕົ້ນແມ່ນ: ການສຶກສາ, ສາທາລະນະສຸກແມ່ນໄດ້ຮັບຜົນດີ, ໂດຍສະເພາະແມ່ນຕໍ່ເດັກນ້ອຍ ແລະ ແມ່ຍິງ, ອັນໄດ້ຊ່ວຍໃຫ້ອັດຕາການຕາຍຂອງແມ່ ແລະ ເດັກຫຼຸດລົງຢ່າງຕໍ່ເນື່ອງ, ສາມາດບັນລະເປົ້າໝາຍສະຫັດສະຫວັດການພັດທະນາ, ເປັນຕົ້ນແມ່ນເປົ້າໝາຍທີ 4 ແລະ 5, ອັດຕາການເຂົ້າຮຽນຊັ້ນປະຖົມດີຂື້ນ, ຊ່ອງຫວ່າງການເຂົ້າຮຽນໃນຊັ້ນປະຖົມລະຫວ່າງຍິງຊາຍແມ່ນຫຼຸດລົງ, ຊຶ່ງສິ່ງດັ່ງລ້ວນແຕ່ແມ່ນຜົນສຳເລັດອັນສຳຄັນທີ່ປະເທດເຮົາສາມາດບັນລຸໄດ້.

          ທ່ານລັດຖະມົນຕີກ່າວວ່າ: ເຖິງຢາງໃດກໍຕາມຕໍ່ຜົນສຳເລັດດັ່ງກ່າວນັ້ນ, ກໍຍັງມີຫຼາຍບັນຫາທີ່ເຮົາຈະຕ້ອງໄດ້ເອົາໃຈໃສ່ຄື: ເດັກຍິງຍັງບໍ່ທັນໄດ້ຮັບຜົນປະໂຫຍດຢ່າງເຕັມສ່ວນ, ຕາມການສຳຫຼວດພົນລະເມືອງປີ 2015 ຜ່ານມາໃນຈຳນວນ 22% ຂອງພົນລະເມືອງທັງໝົດແມ່ນເຍົາວະຊົນທີ່ຢູ່ໃນເກນອາຍຸ 10-19 ປີ, ແຕ່ໄປຄຽງຄູ່ກັບການພັດທະນາທາງດ້ານຮ່າງກາຍ, ການເຕີບໂຕທາງເພດກໍຍັງມີປັດໃຈສ່ຽງບາງຢ່າງໃນຄອບຄົວເຊັ່ນ: ການສ້າງຄອບຄົວ, ຖືພາ ແລະ ມີລູກ່ອນໄວອັນຄວນ,ໂດຍສະເພາະໄວໜຸ່ມຊົນເຜົ່າໃນເຂດຊົນນະບົດ-ຫ່າງໄກສອກຫຼີກ, ອີງຕາມຂໍ້ມູນການສຳຫຼວດດັດສະນີໝາຍສັງຄົມລາວໃນສົກປີ 2011-2012 ຊີ້ໃຫ້ເຫັນວ່າ: 1 ໃນ 4 ຄົນຂອງໄວໜຸ່ມແຕ່ອາຍຸ 15-19 ປີ ຢູ່ເຂດຊົນນະບົດຫ່າງໄກສອກຫຼີກແມ່ນໄດ້ແຕ່ງງານ ແລະ ແມ່ຍິງ 1 ໃນ 10 ຄົນໃດທີ່ໄດ້ສ້າງຄອບຄົວແມ່ນແຕ່ງງານກ່ອນອາຍຸ 15 ປີ, ຊຶ່ງເຮັດໃຫ້ໄວໜຸ່ມຍິງຖືພາແຕ່ອາຍຸຍັງນ້ອຍ ແລະ ມີຄວາມສ່ຽງຕໍ່ັບັນຫາສຸຂະພາບ, ສຳລັບປະເທດເຮົາມີອັດຕາການເກີດລູກໃນໄວໜຸ່ມສຸງກ່ວາໝູ່ໃນບັນດາປະເທດພາກພ້ື້ນຄື: ແມ່ຍິງໃນ 1000 ຄົນໃດທີ່ມີອາຍຸ 15-19 ປີແມ່ນໄດ້ເກີດລູກເຖິງ 94 ຄົນ, ມີຍິງເກືອບ 1 ໃນ 5 ຄົນໄດ້ກາຍເປັນແມ່ແຕ່ຕອນອາຍຸ 18 ປີ, ຊຶ່ງສິ່ງດັ່ງກ່າວແມ່ນຄວາມທ້າທາຍທີ່ສຸດທີປະເທດເຮົາຕ້ອງໄດ້ມີມາດຕະການທີ່ເໝາະສົມເພື່ອຫຼຸດຜ່ອນຄວາມສ່ຽງເຫຼົ່ານີ້, ໂດຍການສ້າງຄວາມເຂັ້ມແຂງໃຫ້ໄວໜຸ່ມຍິງໃນທຸກດ້ານຊຶ່ງເປັນບຸລິມະສິດທີ່ສຳຄັນຂອງລັດຖະບານທີ່ຈະຕ້ອງໄດ້ລົງທຶນໃສ່ໄວໜຸ່ມທີ່ເປັນອະນາຄົດຂອງປະເທດຊາດ, ໃນນັ້ນສຳຄັນກວ່າໝູ່ແມ່ນໄວໜຸ່ມຍິງ, ຊຶ່ງໃນແຜນທັດທະນາເສດຖະກິດ-ສັງຄົມ 5 ປີຄັ້ງທີ່ 8 ນີ້ລັດຖະບານໄດ້ກຳນົດບຸລິມະສິດໄວ້ຢ່າງຈະແຈ້ງໃນການລົງທືນໃສ່ໄວໜຸ່ມຍິງປະມານ 7 ແສນຄົນໃນທົ່ວປະເທດ, ໃຫ້ສາມາດປ່ຽນແປງສະພາບການດຳລົງຊີວິດຂອງເຂົາເຈົ້າໃຫ້ມີຄວາມກ້າວໜ້າ ແລະ ມີຄວາມເຂັ້ມແຂງຂຶ້ນເລື້ອຍໆ, ເປັນຕົ້ນແມ່ນການລົງທືນໃຫ້ເຂົ້າເຈົ້າສາມາດເຂົ້າເຖິງການສຶກສາທີ່ດີ, ເຂົ້າເຖິງການບໍລິການດ້ານສຸຂະພາບ ເຮັດໃຫ້ເຂົ້າເຈົ້າສາມາດເປັນກຳລັງແຮງປະກອບສ່ວນຮ່ວມເຂົ້າໃນການສ້າງສາພັດທະນາປະເທດຊາດ.ກໍຄືເຮັດໃຫ້ເສດຖະກິດ-ສັງຄົມຂອງຊາດມີຄວາມເຂັ້ມແຂງ, ຊຶ່ງສິ່ງດັ່ງກ່າວລ້ວມແລ້ວແຕ່ແມ່ນຄວາມຮັບຜິດຊອບຂອງທຸກຂະແໜງການ ແລະ ທຸກໆພາກສ່ວນ.