ສປຊ ຫາລືຜົນປະໂຫຍດຈາກການປ່ຽນແປງດ້ານປະຊາກອນສຳລັບ ສປປ ລາວ

          ວັນທີ 16 ກັນຍາຜ່ານມານີ້, ອົງການສະຫະປະຊາຊາດ ເພື່ອການພັດທະນາປະຈຳລາວ (UNDP) ຮ່ວມກັບ ກອງທຶນເພື່ອປະຊາກອນ (UNFPA), ຈັດກອງປະຊຸມປຶກສາຫາລືກ່ຽວກັບນະໂຍບາຍການປ່ຽນແປງດ້ານປະຊາກອນ, ການພັດທະນາມະນຸດ ແລະ ເປົ້າໝາຍການພັດທະນາແບບຍືນຍົງ, ໂດຍການເຂົ້າຮ່ວມຂອງທ່ານນາງ ຄາຣິນາ ອິມໂມເນັນ ຜູ້ຕາງໜ້າອົງການສະຫະປະຊາຊາດ ເພື່ອການພັດທະນາ ແລະ ຜູ້ປະສານງານອົງການສະຫະປະຊາຊາດ ປະຈຳລາວ, ມີທ່ານ ລີເບີ ລີ່ບົວປ່າວ ຫົວໜ້າສະຖາບັນຄົ້ນຄ້ວາເສດຖະກິດແຫ່ງຊາດ ກະຊວງແຜນການ ແລະ ການລົງທຶນ, ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.

          ຜູ້ຕາງໜ້າອົງການສະຫະປະຊາຊາດ ເພື່ອການພັດທະນາ ແລະ ຜູ້ປະສານງານອົງການສະຫະປະຊາຊາດ ປະຈຳລາວ ກ່າວວ່າ: ໃນບັນດາປະເທດອາຊຽນ, ສປປ ລາວ, ເປັນປະເທດທີ່ມີຈຳນວນປະຊາກອນໄວໜຸ່ມຫລາຍທີ່ສຸດ ແລະ ອີກ 35 ປີຕໍ່ໜ້າ ແມ່ນໄລຍະແຫ່ງໂອກາດສຳລັບລາວ ເມື່ອມີຈຳນວນຄົນເຮັດວຽກເພີ່ມຂຶ້ນ, ສະສົມທຶນ ແລະ ຈ່າຍພາສີກໍເພີ່ມຂຶ້ນ ຈຶ່ງເປັນໂອກາດດີສຳລັບການຂັບເຄື່ອນການພັດທະນາແບບຍືນຍົງ, ສປປ ລາວ ແມ່ນຢູ່ໃນລະດັບເລີ່ມຕົ້ນຂອງການປ່ຽນແປງເພາະ 57% ຂອງປະຊາກອນໃນປັດຈຸບັນແມ່ນມີອາຍຸຕ່ຳກວ່າ 25 ປີ ເພື່ອເປັນການກະກຽມປະຊາກອນໄວເຮັດວຽກນີ້ ສຳລັບຕະຫລາດແຮງງານໃນອະນາຄົດ, ຈຶ່ງມີຄວາມຈຳເປັນທີ່ຈະຕ້ອງລົງທຶນໃສ່ການສຶກສາ ແລະ ສາລະນະສຸກ ອຳນວຍຄວາມສະດວກໃຫ້ແກ່ການປ່ຽນແປງຈາກໄວຮຽນສູ່ໄວເຮັດວຽກ ແລະ ສົ່ງເສີມການມີສ່ວນຮ່ວມຂອງໄວໜຸ່ມໃນກິດຈະກຳເພື່ອສັງຄົມ. ຊຶ່ງການປ່ຽນແປງດ້ານປະຊາ ກອນນີ້ ບໍ່ພຽງແຕ່ນຳເອົາກາລະໂອກາດເພື່ອການບັນລຸເປົ້າໝາຍການພັດທະນາແບບຍືນຍົງເທົ່ານັ້ນ ແຕ່ຍັງນຳເອົາຄວາມທ້າທາຍອັນໃໝ່ມາສູ່ພວກເຮົາ, ຊຶ່ງຂະບວນການສົ່ງເສີມການພັດທະນາແບບຍືນຍົງ, ໂດຍຜ່ານການປ່ຽນແປງດ້ານປະຊາກອນນີ້ ມັນຈະບໍ່ດຳເນີນໄປຢ່າງອັດຕະໂນມັດ ແຕ່ມັນຕ້ອງ ການວິໄສທັດໄລຍະຍາວ, ນະໂຍບາຍທາງຍຸດທະສາດ ແລະ ການປົກຄອງທີ່ດີ ຈຶ່ງຈະສາມາດດຳເນີນໄປດ້ວຍໝາກຜົນ.