ລົງນາມສັນຍາຮ່ວມມືລະຫວ່າງສະຖາບັນພັດທະນາສີມືແຮງງານລາວ-ເກົາຫຼີ ແລະ ບໍລິສັດໂຄລາວກຣຸບ

          ວັນທີ 12 ກັນຍານີ້, ທີ່ສະຖາບັນພັດທະນາສີມື ແຮງງານລາວ-ເກົາຫຼີ ໄດ້ມີພິທີລົງນາມສັນຍາຮ່ວມມື ລະຫວ່າງ ທ່ານ ຄຳພຽງ ແກ້ວລັງສີ ຮອງສະຖາບັນພັດທະນາສີມືແຮງງານລາວ-ເກົາຫຼີ ແລະ ທ່ານ ລີຊັງກີ ຮອງປະທານ ບໍລິສັດໂຄລາວກຣຸບ ແລະ ທ່ານ ວຽງທອງ ຈັນລີວົງ ຫົວໜ້າ ພະແນກ ບໍລິການຫລັງການຂາຍຂອງບໍລິສັດ ໂຄລາວກຣຸບ ເພື່ອຮັບເອົານັກສຶກໄປທັດສະນະສຶກສາ ແລະ ລົງ ຝຶກງານຕົວຈິງ ໃນສາຂາອາຊີບລົດຍົນ ແລະ ຈະອອກ ໃບຢັ້ງຢືນສີມືແຮງງານໃນຂົງເຂດລົດຍົນ ໃຫ້ແກ່ຜູ້ທີ່ຜ່ານການເຝິກຈາກບໍລິສັດ ພ້ອມທັງ ຄັດເລືອກນັກຮຽນຜູ້ທີ່ຮຽນດີ ເພື່ອໃຫ້ບຸລິມະສິດພິເສດໃນການສະຫມັກວຽກຂອງຜູ້ທີ່ຮຽນຈົບຈາກສະຖາບັນດັ່ງກ່າວ.

ການຮ່ວມມືດັ່ງກ່າວມີໄລຍະເວລາ 2 ປີ ແລະ ສາມາດຕໍ່ໄດ້ຖ້າຫາກຜົນການຮ່ວມມືເປັນທີ່ພໍໃຈຂອງທັງສອງຝ່າຍໂດຍຈະມີກອງປະຊຸມທຸກໆ 6 ເດືອນ ເພື່ອຖອດຖອນບົດຮຽນປະເມີນຄວາມຄືບຫນ້າຂອງການຮ່ວມມື ແລະ ໃນພິທີດັ່ງກ່າວບໍລິສັດໂຄລາວຍັງໄດ້ມອບລົດ ແລະ ອຸປະກອນກວດສອບຈຳນວນໜຶ່ງເພື່ອເປັນເຄື່ອງມືໃນການປະຕິບັດວຽກງານຕົວຈິງໃຫ້ແກ່ສະຖາບັນເພື່ອນຳໃຊ້ເຂົ້າໃນການຮຽນ-ການສອນໃຫ້ມີປະສິດທິຜົນສູງຂຶ້ນ.