ຮອງລັດຖະມົນຕີກະຊວງຖະແຫລງຂ່າວ, ວັດທະ ນະທຳ ແລະ ທ່ອງທ່ຽວເຂົ້າຮ່ວມກອງປະຊຸມແລກປ່ຽນວັດທະນະທຳອາຊຽນ-ຈີນ

   ແຕ່ວັນທີ 10-13 ກັນຍານີ້, ທ່ານ ສະຫວັນຄອນ ລາຊະມຸນຕີ ຮອງລັດຖະມົນຕີກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ, ໄດ້ໄປຮ່ວມກອງປະຊຸມວ່າດ້ວຍການຮ່ວມມື ແລະ ແລກປ່ຽນວັດທະ ນະທຳອາຊຽນ-ຈີນຄັ້ງທີ 11 ທີ່ໜານໜິງ, ເຂດປົກຄອງຕົນເອງກວາງຊີ ສປ ຈີນ.

   ກອງປະຊຸມດັ່ງກ່າວ, ໄດ້ຮັບກຽດເຂົ້າຮ່ວມໂດຍທ່ານ ຕິ່ງເຫວ້ ຮອງລັດຖະມົນຕີວັດທະນະທຳ ສປ ຈີນ, ທ່ານ ຫວັນ ຣິບໍ ຮອງປະທານເຂດປົກຄອງຕົນເອງ ເຊົ່າເຜົ່າຈວງກວາງຊີ ພ້ອມດ້ວຍບັນດາຜູ້ຕາງໜ້າຂະແໜງການວັດທະນະທຳ ຈາກບັນດາປະເທດສະມາຊິກອາຊຽນ, ກອງເລຂາອາຊຽນ, ອາຊຽນ-ຈີນ

ແລະ ສື່ມວນຊົນຫລາຍພາກສ່ວນ ເພື່ອເປັນການແລກປ່ຽນ, ສົ່ງເສີມການຮ່ວມມື ແລະ ພັດທະນາດ້ານການສຶກສາ, ດ້ານວັດທະນະທຳລະຫວ່າງອາຊຽນກັບຈີນ.

   ໃນໂອກາດດັ່ງກ່າວ, ທ່ານ ສະຫວັນຄອນ ລາຊະມຸນຕີ ໄດ້ຂຶ້ນມີຄຳເຫັນ ໂດຍເນັ້ນເຖິງຄວາມສຳຄັນໃນການຊຸກຍູ້ ແລະ ສົ່ງເສີມການແລກປ່ຽນບົດຮຽນໃນການສືບທອດ ແລະ ປົກປັກຮັກສາວັດທະນະ ທຳ ເປັນຕົ້ນ: ການພັດທະນາ, ການສຶກສາດ້ານວັດທະນະທຳ ແລະ ສິລະປະ. ນອກຈາກນັ້ນ, ທ່ານ ຍັງໄດ້ ກ່າວເຖິງການພົວພັນຮ່ວມມືອັນດີງາມ ທີ່ເປັນມູນເຊື້ອທາງດ້ານວັດທະນະທຳ ແລະ ສິລະປະ ລະຫວ່າງສອງປະເທດລາວ ແລະ ຈີນ ເຊິ່ງໄດ້ຮັບການເສີມຂະຫຍາຍກວ້າງຂວາງຫລາຍຂຶ້ນ.

   ໂອກາດດຽວກັນນີ້, ຄະນະຜູ້ແທນກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ສ ປປ ລາວ ຍັງໄດ້ໄປຢ້ຽມຢາມສະຖານທີ່ທ່ອງທ່ຽວມໍລະດົກທາງທຳມະຊາດເມືອງກຸຍຫລິງ ແລະ ສູນວາງສະແດງຜະລິດຕະພັນສິນຄ້າອາຊຽນ-ຈີນ (China-ASEAN Expo) ຄັ້ງທີ 13 ອີກດ້ວຍ.