ລາວປະສົບຜົນສໍາເລັດສູງໃນການເປັນເຈົ້າພາບຈັດກອງປະຊຸມສຸດຍອດອາຊຽນ

    ໃນແລງວັນທີ 13 ກັນຍານີ້, ທີ່ສະຖານີໂທລະພາບແຫ່ງຊາດ, ທ່ານລັດຖະມົນຕີກະຊວງການຕ່າງປະເທດ ສະເຫລີມໄຊ ກົມມະສິດ, ທ່ານລັດຖະມົນຕີກະຊວງອຸດສາຫະກຳ ແລະ ການຄ້າ ນາງ ເຂັມມະນີ ພົນເສນາ ແລະ ທ່ານລັດຖະມົນຕີກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ບໍ່ແສງຄຳ ວົງດາລາ ໄດ້ຮ່ວມກັນຖະແຫລງກ່ຽວກັບຜົນສຳເລັດຂອງກອງປະຊຸມສຸດຍອດອາຊຽນຄັ້ງທີ 28, 29 ແລະ ກອງປະຊຸມສຸດຍອດອື່ນໆ ທີ່ ສປປ ລາວ ໄດ້ຮັບກຽດຈັດຂຶ້ນແຕ່ວັນທີ 6-8 ກັນຍາຜ່ານມານີ້ວ່າ: ປີ 2016 ເປັນປີເລີ່ມຕົ້ນຈັດຕັ້ງປະຕິບັດວິໄສທັດອາຊຽນຮອດປີ 2025 ໃຫ້ປາກົດຜົນເປັນຈິງ ກໍຄື 8 ບູລິມະສິດທີ່ອາຊຽນໄດ້ຕົກລົງຮັບຮອງເອົາເພື່ອສ້າງຄວາມເຂັ້ມແຂງໃຫ້ແກ່ປະຊາຄົມອາຊຽນ.

    ທ່ານລັດຖະມົນຕີຕ່າງປະເທດ ກ່າວວ່າ: ບັນດາປະເທດສະມາຊິກອາຊຽນ ແລະ ປະເທດຄູ່ຮ່ວມເຈ

ລະຈາແມ່ນມີຄວາມເຊື່ອໝັ້ນຕໍ່ ສປປ ລາວ ຢ່າງໜັກແໜ້ນໃນການເປັນປະທານອາຊຽນ, ໂດຍສະ ເພາະຄວາມເຊື່ອໝັ້ນດ້ານຄວາມໝັ້ນຄົງ ແລະ ການເມືອງ ໃນການອຳນວຍຄວາມສະດວກຕ່າງໆໃຫ້ແກ່ປະມຸກລັດ, ຫົວໜ້າລັດຖະບານ ແລະ ຄະນະຜູ້ແທນມາຮ່ວມປະຊຸມໄດ້ເປັນຢ່າງດີ. ສ່ວນທ່ານລັດຖະມົນຕີກະຊວງອຸດສາຫະກຳ ແລະ ການຄ້າ ໄດ້ກ່າວວ່າ: ໃນ 8 ບູລິມະສິດຂົງເຂດວຽກງານເສດຖະກິດນັ້ນ ສ ປປ ລາວ ໄດ້ເນັ້ນໃສ່ 2 ບູລິມະສິດ ຄື: ການເຂົ້າເຖິງແຫລ່ງທຶນຂອງຫົວໜ່ວຍທຸລະກິດຂະໜາດນ້ອຍ ແລະ ກາງ ແລະ ການອຳນວຍຄວາມສະດວກໃຫ້ແກ່ການສ້າງຕັ້ງ ແລະ ການພັດທະນາທຸລະກິດດັ່ງກ່າວ. ຂະນະທີ່ທ່ານລັດຖະມົນຕີກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ກ່າວວ່າ: ໃນຂົງເຂດວັດທະນະທຳ-ສັງຄົມ, ອາຊຽນໄດ້ຮັບຮອງເອົາເອກະສານສຳຄັນ ຄື: ເອກະສານການຕອບໂຕ້ໄພພິບັດຢູ່ໃນ ແລະ ນອກເຂດອາຊຽນ, ຖະແຫລງການວຽງຈັນກ່ຽວກັບການຫັນປ່ຽນການຈ້າງງານນອກລະບົບໄປສູ່ການຈ້າງງານໃນລະບົບ, ຖະແຫລງການວຽງຈັນວ່າດ້ວຍການຊຸກຍູ້ສົ່ງເສີມການຮ່ວມມືດ້ານມໍລະດົກວັດທະນະທຳອາຊຽນ, ຖະແຫລງການວຽງຈັນວ່າດ້ວຍການສ້າງຄວາມເຂັ້ມແຂງໃຫ້ແກ່ເດັກ ແລະ ຊາວໜຸ່ມຢູ່ນອກໂຮງຮຽນ, ຖະແຫລງການວຽງຈັນວ່າດ້ວຍຂໍ້ຕົກລົງກ່ຽວກັບຄວາມຫລາກຫລາຍທາງດ້ານຊີວະນາໆພັນ, ຖະແຫລງການວຽງຈັນວ່າດ້ວຍການປ່ຽນແປງຂອງດິນຟ້າອາກາດ ແລະ ຖະແຫລງການວຽງຈັນວ່າດ້ວຍຕ້ານພະຍາດຕິດແປດທາງເພດສຳພັນ (ໂລກເອດ).

  ແນວໃດກໍດີ, ລັດຖະມົນຕີທັງສາມທ່ານໄດ້ມີຄວາມເຫັນເອກະພາບກັນວ່າ: ຜົນສໍາເລັດຂອງກອງປະຊຸມສໍາຄັນດັ່ງກ່າວນີ້, ແມ່ນຍ້ອນພວກເຮົາໄດ້ຮັບການສະໜັບສະໜູນ ແລະ ການຮ່ວມມືອັນລໍ້າຄ່າຈາກບັນດາປະເທດສະມາຊິກອາຊຽນ, ຄູ່ເຈລະຈາອາຊຽນ ກໍຄືຄູ່ຮ່ວມມືພາຍນອກປະເທດເພື່ອນມິດ ແລະ ສາກົນ.