ປະທານສະພາແຫ່ງຊາດຕ້ອນຮັບທູດອາເມລິກາເຂົ້າອຳລາ

  ໃນວັນທີ 14 ກັນຍານີ້, ທ່ານນາງ ປານີ ຢາທໍ່ຕູ້ ປະທານສະພາແຫ່ງຊາດ ໄດ້ໃຫ້ກຽດຕ້ອນ ຮັບການເຂົ້າຢ້ຽມຂໍ່ານັບອຳລາຂອງ ທ່ານ ດານຽວ ເອ ຄລູນ (Daniel A. Clune) ເອກອັກຄະລັດຖະທູດວິສາມັນຜູ້ມີອໍານາດເຕັມແຫ່ງ ສະຫະລັດອາເມລິກາປະຈໍາລາວ, ຫລັງຈາກໄດ້ສໍາເລັດການປະຕິບັດໜ້າທີ່ການທູດ ຢູ່ ສ ປປ ລາວ ເປັນເວລາ 3 ປີ.

   ໃນໂອກາດດັ່ງກ່າວ, ທ່ານປະທານສະພາແຫ່ງຊາດໄດ້ສະແດງຄວາມຊົມເຊີຍຍິນດີຕ້ອນຮັບ ແລະ ຂອບໃຈຕໍ່ທ່ານ ດານຽວ ຄລູນ ທີ່ໄດ້ປະກອບສ່ວນສົ່ງເສີມ ແລະ ຊຸກຍູ້ການພົວພັນຮ່ວມມືລະ ຫວ່າງລາວ ແລະ ສະຫະລັດອາເມລິກາໃຫ້ນັບມື້ນັບກ້ວາງຂວາງໃນໄລຍະການປະຕິບັດໜ້າທີ່ການທູດຢູ່ລາວ,

ອັນພົ້ນເດັ່ນນັບແຕ່ປີ 2013 ເປັນຕົ້ນມາທ່ານທູດໄດ້ຊຸກຍູ້ການເດີນທາງມາຢ້ຽມຢາມ ສປປ ລາວ ຢ່າງເປັນທາງການຂອງຜູ້ນໍາຂັ້ນສູງຂອງສະຫະລັດອາເມລິກາ ກໍຄືໄດ້ຍົກລະດັບການຮ່ວມມືເປັນຄູ່ຮ່ວມມືແບບກວມລວມທີ່ເປັນຫລັກການໃນຂອບການຮ່ວມມືຫລາຍດ້ານເຊັ່ນ: ດ້ານເສດຖະ ກິດ, ການລົງທຶນ, ການສຶກສາ, ສາທາລະນະສຸກ ແລະ ວັດທະນະທໍາ, ອັນໄດ້ນຳຜົນປະໂຫຍດຕົວຈິງມາສູ່ປະຊາຊົນສອງຊາດລາວ-ອາເມລິກາ. ພ້ອມທັງໄດ້ອວຍພອນໃຫ້ທ່ານ ດານຽວ ເອຄລູນ ຈົ່ງມີສຸຂະພາບເຂັ້ມແຂງ, ມີພະລານາໄມສົມບູນ ແລະ ປະສົບຜົນສໍາເລັດໃນການປະຕິບັດໜ້າທີ່ໃໝ່.

           ໂອກາດດຽວກັນ, ທ່ານ ດານຽວ ເອຄລູນ ໄດ້ສະແດງຄວາມຂອບອົກຂອບໃຈຕໍ່ທ່ານປະ ທານສະພາແຫ່ງຊາດ ກໍຄືລັດຖະບານລາວທີ່ໄດ້ໃຫ້ການສະໜັບສະໜູນຊຸກຍູ້ຊ່ວຍເຫລືອໃຫ້ການຮ່ວມມືເປັນຢ່າງດີຕະຫລອດໄລຍະທີ່ໄດ້ມາປະຕິບັດໜ້າທີ່ການທູດຢູ່ລາວຈົນໄດ້ຮັບຜົນສໍາເລັດເປັນຢ່າງດີ.